ޕްރިމިއާ ލީގު: ޔުނައިޓެޑުން ފަހު ވަގުތު މޮޅުވިއިރު، ސިޓީއަށް ޓޮޓްނަމް އަތުން މޮޅެއް ނުވެވުނު
އިނގިރޭސި ޕްރިމިއާ ލީގުގައި ރޭ މެންޗެސްޓަރ ޔުނައިޓެޑާއި ފުލަމް ބައްދަލުކުރި މެޗު 3-2 އިން ޔުނައިޓެޑް ކާމިޔާބުކުރިއިރު، މެންޗެސްޓަރ ސިޓީއަށް ޓޮޓްނަމް އަތުން ލިބުނީ 2-2 އިން އެއްވަރުގެ ނަތީޖާއެކެވެ.
ޔުނައިޓެޑަށް ތިން ޕޮއިންޓް ކަށަވަރުކޮށްދިނީ އިންޖަރީ ވަގުތުގައި ބެންޖަމިން ސެސްކޯ ޖެހި ލަނޑުންނެވެ. މި މޮޅާއެކު ޔުނައިޓެޑް މިހާރު އޮތީ 41 ޕޮއިންޓާއެކު ތާވަލުގެ ހަތަރުވަނައިގައެވެ.
މެންޗެސްޓަރ ސިޓީ އާއި ޓޮޓްނަމް ބައްދަލުކުރި މެޗުގެ ފުރަތަމަ ހާފު ސިޓީން 2-0 ގެ ލީޑެއްގައި އޮވެ ނިންމާލި ނަމަވެސް، ދެވަނަ ހާފުގައި ޓޮޓްނަމްގެ ޑޮމިނިކް ސޮލާންކޭ ޖެހި ދެ ލަނޑާއެކު މެޗު ވަނީ އެއްވަރުވެފައެވެ. މި ނަތީޖާގެ ސަބަބުން ސިޓީއަށް އެއްވަނައިގައި އޮތް އާސެނަލްއާ ދެމެދު އޮތް ފަރަގު ކުޑަކުރުމަށް ލިބުނު ފުރުސަތު ވަނީ ގެއްލިފައެވެ. ސިޓީ މިހާރު އޮތީ 47 ޕޮއިންޓާއެކު ދެވަނައިގައެވެ.
ރޭގެ މެޗުތަކަށްފަހު އާސެނަލް ތާވަލުގެ ކުރީގައި އޮތީ ހަ ޕޮއިންޓުގެ ލީޑަކާއެކުގައެވެ. ޔުނައިޓެޑުން ގަދަ ހަތަރެއްގެ މަގާމު ހަރުދަނާކުރިއިރު، ސިޓީއަށް މިވަނީ ތަށި ހޯދުމުގެ ރޭހުގައި އިތުރު ގޮންޖެހުންތަކާ ކުރިމަތިވެފައެވެ. ޓޮޓްނަމް މިހާރު އޮތީ 29 ޕޮއިންޓާއެކު ތާވަލުގެ 14 ވަނައިގައެވެ. އާސެނަލުން ތާވަލުގެ އެއްވަނައިގައި އޮތީ 53 ޕޮއިންޓާއެކުގައެވެ.
