ޕާކިސްތާނުގައި ހިނގި ނުރައްކާތެރި ހާދިސާގައި 60 މީހުން މަރުވެއްޖެ
ޕާކިސްތާނުގެ ކަރާޗީގައި ހުންނަ ވިޔަފާރި މަރުކަޒެއްގައި ހިނގި ނުރައްކާތެރި އަލިފާނުގެ ހާދިސާގައި މަރުވި މީހުންގެ އަދަދު 60 އަށްވުރެ މައްޗަށް އަރާފައިވާ ކަމަށް އެގައުމުގެ ކަމާބެހޭ ފަރާތްތަކުން ހާމަކޮށްފިއެވެ. މީގެ ތެރެއިން 30 މީހެއްގެ ހަށިގަނޑު ފެނިފައިވަނީ އެނދުމުގެ ސަބަބުން ބޮޑެތި ގެއްލުންތަކެއް ލިބިފައިވާ އެއް ފިހާރައެއްގެ ތެރެއިންނެވެ.
“ގުލް ޕްލާޒާ” ޝޮޕިންގް ސެންޓަރުގައި ހިނގި މި ހާދިސާއާ ގުޅިގެން ގެއްލިފައިވާ 80 އަށްވުރެ ގިނަ މީހުން ހޯދުމުގެ މަސައްކަތް ބުރާސްފަތި ދުވަހުވެސް ވަނީ ކުރިއަށް ގެންގޮސްފައެވެ. މި ހާދިސާ ހިނގާފައިވަނީ މިދިޔަ ހޮނިހިރު ދުވަހުއެވެ.
ކަރާޗީ ސައުތުގެ ޑެޕިއުޓީ އިންސްޕެކްޓަރ ޖެނެރަލް ސައްޔިދު އަސަދު ރަޒާ “ޑޯން” ނޫހަށް މައުލޫމާތު ދެއްވަމުން ވިދާޅުވީ، އިމާރާތުގެ މެޒަނިން ފްލޯގައި ހުރި ފިހާރައަކުން 30 މީހެއްގެ ހަށިގަނޑު ފެނިފައިވާ ކަމަށެވެ. އަދި މިހާތަނަށް މަރުވި މީހުންގެ ޖުމްލަ އަދަދު 61 އަށް އަރާފައިވާ ކަމަށް ލަފާކުރެވޭއިރު، މަރުވި މީހުންގެ ފަހުގެ އަދަދު ކަށަވަރު ކުރެވޭނީ ޑީ.އެން.އޭ ތަހުލީލުތަކަށް ފަހުގައި ކަމަށް އޭނާ ވިދާޅުވިއެވެ.
މި 30 ހަށިގަނޑު ފެނިފައިވަނީ “ދުބާއީ ކްރޮކަރީ” ކިޔާ ފިހާރައަކުން ކަމަށް ކަރާޗީ ސައުތުގެ ޑެޕިއުޓީ ކޮމިޝަނަރު ޖާވިދު ނަބީ ހޯސޯ ވިދާޅުވިއެވެ.
އޭނާ ހާމަކުރެއްވި ގޮތުގައި، އެ މީހުން މަރުވެފައިވަނީ އަލިފާނުން ސަލާމަތްވުމަށްޓަކައި އެ ފިހާރައިގެ ތެރެއަށް ވަދެ ދޮރު ތަޅުލައިގެން ތިއްބައެވެ. ލޯކަލް މީޑިއާތަކުން ރިޕޯޓްކޮށްފައިވާ ގޮތުގައި، އަލިފާން ރޯވުމާއެކު މަރުކަޒު ތެރޭގައި އުފެދުނު ހާސްކަމާއި ފިތިބާރުވުމުގެ ތެރޭގައި ސަލާމަތްވާނެ ތަނެއް ހޯދުމަށް އެ މީހުން ވަނީ އެ ފިހާރައިގެ ތެރެއަށް ވަދެފައެވެ.
ސިންދު ޕްރޮވިންސްގެ ޗީފް މިނިސްޓަރު މުރާދު އަލީ ޝާހު ވަނީ މި ހާދިސާގައި ގިނަ ބަޔަކު މަރުވުމާ ގުޅިގެން ވަރަށް ބޮޑަށް ހިތާމަ ފާޅުކުރައްވާފައެވެ. އަދި ހުރިހާ ހަށިގަނޑުތަކެއް ނެރެ ނިމެންދެން އިމާރާތުގެ ކުނިތައް ނެގުމުގެ މަސައްކަތް ހުއްޓާލުމަށް އޭނާ ވަނީ އަމުރުކުރައްވާފައެވެ.
ކަމާބެހޭ ޓީމުތަކުން މިހާރު ދަނީ މަރުވި މީހުން ދެނެގަތުމަށްޓަކައި ހަށިގަނޑުތަކުން ސާމްޕަލް ނަގަމުންނެވެ. އޮފިޝަލުން އިންޒާރު ދެއްވާ ގޮތުގައި، މަރުވި މީހުންގެ އަދަދު ކުރިއަށް އޮތް ތަނުގައި އަދިވެސް އިތުރުވުން އެކަށީގެންވެއެވެ.
