ބީއެމްއެލްގެ ޑިޖިޓަލް ހިދުމަތްތަކަށް ބުރޫއަރައި، މައްސަލަ ހައްލުކުރަނީ
ބީއެމްއެލްގެ ޑިޖިޓަލް ހިދުމަތްތަކަށް ބުރޫއަރައި، މައްސަލަ ހައްލުކުރުމުގެ މަސައްކަތް ކުރަމުންދާ ކަމަށް އެބޭންކުން ބުނެފިއެވެ.
ޓެކްނިކަލް މައްސަލައަކާ ހެދި މޯބައިލް އަދި އިންޓަނެޓް ބޭންކިން ހިދުމަތްތައް މެދުކެނޑިފައިވާއިރު، އެހެނިހެން ބައެއް ހިދުމަތްތަކަށްވެސް ވަނީ ބުރޫއަރައިފައެވެ.
ދިވެހިރާއްޖޭގެ އެންމެ ބޮޑު ބޭންކު ކަމުގައިވާ ބޭންކް އޮފް މޯލްޑިވްސް (ބީއެމްއެލް) ގެ މޯބައިލް ބޭންކިން އާއި އިންޓަނެޓް ބޭންކިން ހިދުމަތަށް މިއަދު މެންދުރުފަހު ފެށިގެން ހުރަސްއެޅި، ގިނަ ކަސްޓަމަރުންނަށް ދަތިތަކާ ކުރިމަތިލާން ޖެހިފައިވާއިރު، ބޭންކުން ބުނެފައި ވަނީ މިއީ ޓެކްނިކަލް މައްސަލައެއް ކަމަށާއި، މި މައްސަލަ ހައްލުކުރުމުގެ މަސައްކަތް ހަލުވިކަމާއެކު ކުރިއަށްދާ ކަމަށެވެ.
Due to a technical issue, customers are facing interruptions to our Mobile and Internet Banking services. We are working to resolve this as soon as possible and our apologies for the inconvenience caused.
— Bank of Maldives (@bankofmaldives) November 30, 2025
ބީއެމްއެލްގެ މޯބައިލް އެޕްލިކޭޝަން އަދި އިންޓަނެޓް ބޭންކިން ޕޯޓަލް މެދުކެނޑިފައިވާކަން ފާހަގަވީ މީގެ ގަޑިއެއްހާއިރު ކުރިންނެވެ.
މީގެ ސަބަބުން ފައިސާ ފޮނުވުމާއި ބިލް ދެއްކުން ފަދަ އާންމު މުއާމަލާތްތައް ކުރުމުގައި ކަސްޓަމަރުންނަށް ދަތިތަކާ ކުރިމަތިލާން ޖެހިފައިވެ އެވެ. ބޭންކުން އެކަމާ ބެހޭގޮތުން ސޯޝަލް މީޑިއާގައި ބުނެފައި ވަނީ ދިމާވެފައި ވަނީ ޓެކްނިކަލް މައްސަލައެއް ކަމަށާއި، ކަސްޓަމަރުންނަށް ދިމާވި ދަތިތަކަށް މާފަށް އެދޭ ކަމަށެވެ.
މި މައްސަލަ ހައްލުކުރުމަށް ބޭންކުގެ އިންޖިނިއަރުންނާއި ޓެކްނިކަލް ޓީމުތަކުން މަސައްކަތް ކުރަމުންދާ ކަމަށް ބީއެމްއެލުން ބުނެފައިވެ އެވެ. އަދި ވީހާވެސް އަވަހަކަށް ހިދުމަތްތައް އާންމު ހާލަތަށް ގެނައުމަށް ބޮޑު އިސްކަމެއް ދީގެން މަސައްކަތް ކުރަމުން އަންނަ ކަމަށް ވެސް އެ ބޭންކުން ވަނީ ފާހަގަކޮށްފަ އެވެ.
ޑިޖިޓަލް ހިދުމަތްތައް މެދުކެނޑުނު ނަމަވެސް، ޕޮއިންޓް އޮފް ސޭލް (ޕީއޯއެސް) މެޝިންތައް މެދުވެރިކޮށް ކާޑުން ފައިސާ ދެއްކުމުގައި އެއްވެސް މައްސަލައެއް ދިމާވެފައި ނުވާ ކަމަށް ބޭންކުން ވަނީ ހާމަކޮށްފަ އެވެ. މީގެ އިތުރުން ބޭންކުގެ އޭޓީއެމްތަކުން ފައިސާ ނެގުމާއި ޑިޕޮޒިޓް ކުރުމުގެ ހިދުމަތްތައް ވެސް ދަނީ އާދައިގެ ގޮތަށް ކުރިއަށެވެ.
ރާއްޖޭގައި އެންމެ ގިނަ ކަސްޓަމަރުންނަށް ހިދުމަތްދޭ ބޭންކު ކަމަށްވާ ބީއެމްއެލްގެ އިންޓަނެޓް ބޭންކިން އާއި މޯބައިލް ބޭންކިން ހިދުމަތަށް މީގެ ކުރިން ވެސް ބައެއް ފަހަރު މިފަދަ ޓެކްނިކަލް މައްސަލަތައް ދިމާވެފައިވެ އެވެ. ނަމަވެސް، އާންމުކޮށް މި މައްސަލަތައް ކުރު މުއްދަތެއްގެ ތެރޭގައި ހައްލުކުރެވި، ހިދުމަތްތައް އަނބުރާ އާންމު ހާލަތަށް އާދެ އެވެ.
