މަސްކް ސަރުކާރާ ވަކިވެވަޑައިގަތުމުގެ ޚަބަރަކީ “ފޭކް ނިއުސް” އެއް: އެމެރިކާގެ ނައިބްރައީސް
ބުރާސްފަތި ދުވަހު ފޮކްސް ނިއުސްއަށް ދެއްވި އިންޓަވިއުއެއްގައި ވޭންސް ވިދާޅުވީ، މަސްކްގެ ހަ މަސް ދުވަހުގެ ޚާއްޞަ ސަރުކާރުގެ މަޤާމު ރޭވިފައިވާ ގޮތަށް ނިމޭނެ ނަމަވެސް، އެމެރިކާގެ ރައީސް ޑޮނަލްޑް ޓްރަމްޕްގެ އެންމެ ބޮޑު ކެމްޕޭން ހަދިޔާ ކުރައްވާ ފަރާތް، ލަފާދޭ ފަރާތެއްގެ ގޮތުގައި ދެމިހުންނަވާނެ ކަމަށެވެ.
“އީލޮން އަކީ އަހަރެންނާއި ރައީސްގެ ރައްޓެއްސެއް އަދި ލަފާދޭ ފަރާތެއްގެ ގޮތުގައި ދެމިހުންނަވާނެ,” ވޭންސް ވިދާޅުވިއެވެ.
ސަރުކާރުގެ މަސައްކަތްތައް ކުޑަކުރުމަށް މަސްކް ކުރައްވާ މަސައްކަތްތަކާ ގުޅޭ ގޮތުން ވާހަކަފުޅު ދައްކަވަމުން، ވޭންސް ވިދާޅުވީ “އޮޅުވާލައިގެން” ސޯޝަލް ސެކިއުރިޓީ ފައިސާ ނަގާ މައްސަލަތައް ހޯދުން ފަދަ މިސާލުތަކެއް ދެއްކެވިއެވެ. “އަހަރެމެން މިހާރު މިކަމުގައި މަސައްކަތް ފަށައިފިން، އެކަމަކު އަދިވެސް ވަރަށް ގިނަ މަސައްކަތް އެބަހުރި,” އޭނާ ވިދާޅުވިއެވެ.
މަސްކް ވަނީ ސޯޝަލް ސެކިއުރިޓީ އަކީ “ޕޮންޒީ ސްކީމެއް” ކަމަށް ވެސް ވިދާޅުވެފައެވެ. މިކަމުން މި މަޤްބޫލު ޕްރޮގްރާމް ނިމުމަކަށް ގެންނަން އޭނާ ބޭނުންފުޅުވާ ކަމަށްވެސް ވޭންސް ވިދާޅުވިއެވެ.
އީލޮން މަސްކް އަކީ ޓެސްލާ އަދި ސްޕޭސްއެކްސްގެ ސީއީއޯ އަދި ޓްވިޓަރގެ މިލްކުވެރިޔާއެވެ. އޭނާ ވަނީ 2023 ވަނަ އަހަރުގެ ނޮވެމްބަރު މަހު އެމެރިކާގެ ރައީސް ޑޮނަލްޑް ޓްރަމްޕްގެ އިދާރާގައި ޚާއްޞަ ލަފާދޭ ފަރާތެއްގެ ގޮތުގައި ހަ މަސް ދުވަހުގެ މުއްދަތަށް ޢައްޔަންކުރެވިފައެވެ. މި މުއްދަތުގައި މަސްކް ވަނީ ސަރުކާރުގެ ޚަރަދުތައް ކުޑަކުރުމަށް އަމާޒުކޮށް ގިނަގުނަ ހުށަހެޅުންތަކެއް ހުށަހަޅުއްވާފައެވެ. ނަމަވެސް އޭނާގެ ބައެއް ހުށަހެޅުންތަކާއި ބަޔާންތަކުގެ ސަބަބުން ވަނީ ފާޑުކިޔުންތަކާ ކުރިމަތިލާންޖެހިފައެވެ.
މަސްކް އާ ބެހޭގޮތުން ވޭންސް މިފަދައިން ވާހަކަފުޅު ދެއްކެވިޔަސް އެމެރިކާގެ މީޑިއާތަކުން ބުނާ ގޮތުގައި މަސްކް، ސަރުކާރުން ވަރަށް އަވަހަށް ވަކިވާނެ ކަމަށް ޓްރަމްޕް ވަނީ އޭނާގެ ކެބިނެޓްގައި ހިމެނޭ ވަޒީރުންނާއި، އަދި ވަރަށް އަރިސް ބޭފުޅުން ކައިރީ ވިދާޅުވެފައެވެ.
މަސްކް ޓްރަމްޕްގެ ސަރުކާރުން ވަކިވާން އުޅޭކަމުގެ އަޑުތައް ފެތުރުނީ މިދިޔަ ހަފްތާގައި ވިސްކޮންސިންގައި ފަނޑިޔާރަކު ހޮވަން މަސްކް ބޮޑު ހަރަދެއް ކުރި ނަމަވެސް އިދިކޮޅު ޑިމޮކްރެޓިކް ޕާޓީގެ ތާއިދު އޮތް ފަނޑިޔާރު އިންތިހާބު ކާމިޔާބު ކުރުމުން މަސްކްއަށް ފާޑުކިޔުން އިތުރުވެފައި ވަނިކޮށެވެ.
