މަޖިލީހުގެ ނައިބު ރައީސް ކަމަށް އަހުމަދު ސަލީމް އިންތިހާބުކޮށްފި
ރައްޔިތުންގެ މަޖިލީހުގެ ނައިބު ރައީސްގެ މަގާމަށް އޭދަފުށި ދާއިރާގެ ޕީއެންސީ މެންބަރު އަހުމަދު ސަލީމް (ރެޑްވޭވް ސަލީމް) މިއަދު އިންތިހާބުކޮށްފިއެވެ.
މަޖިލީހުގެ ރައީސް އަބްދުއްރަހީމް އަބްދުﷲ ރިޔާސަތު ބަލަހައްޓަވާ މިއަދުގެ ޖަލްސާގައި ނެގި ސިއްރު ވޯޓުގައި ސަލީމް މި މަގާމަށް ހޮވުނީ 62 މެންބަރުންގެ ތާއީދާއެކުގައެވެ. އޭނާއާ ވާދަކުރެއްވި އިދިކޮޅު އެމްޑީޕީގެ ކެންޑިޑޭޓް، ވައިކަރަދޫ ދާއިރާގެ މެންބަރު ހުސައިން ޒިޔާދަށް ލިބިވަޑައިގަތީ 10 ވޯޓެވެ.
މި މަގާމު ހުސްވީ ކުރިން ނައިބު ރައީސްގެ މަގާމުގައި ހުންނެވި ދިއްގަރު ދާއިރާގެ މެންބަރު އަހުމަދު ނާޒިމް އިއްޔެ އިސްތިއުފާ ދެއްވުމާ ގުޅިގެންނެވެ. ނާޒިމް އިސްތިއުފާ ދެއްވީ މަޖިލީހުގެ ސުޕަ މެޖޯރިޓީ އޮތް ޕީއެންސީން އޭނާގެ އިތުބާރު ނެތް ކަމުގެ މައްސަލައެއް ވައްދާފައި ވަނިކޮށެވެ. ނާޒިމްގެ މައްޗަށް މެންބަރުންގެ މެދުގައި މަސްލަހަތު ނަގާލުމުގެ ތުހުމަތު ކުރި ނަމަވެސް، އޭނާ ވަނީ އެކަން ދޮގުކުރައްވައި ޕާޓީގެ އެދުމުގެ މަތިން ޑިމޮކްރަސީގެ އުސޫލުން މަގާމުން ވަކިވެވަޑައިގެންފައެވެ.
އަހުމަދު ސަލީމަކީ 2004 ވަނަ އަހަރުން ފެށިގެން މެދުކެނޑުމެއް ނެތި މަޖިލީހުގެ ފަސް ދައުރު ފުރިހަމަކުރައްވަމުން ގެންދަވާ ތަޖުރިބާކާރު މެންބަރެކެވެ. ނިމިދިޔަ 19 ވަނަ މަޖިލީހުގެ މައިނޯރިޓީ ލީޑަރުކަން ވެސް ކުރެއްވި ސަލީމްގެ އިންތިހާބާއެކު، މަޖިލީހުގެ ރައީސް އަބްދުއްރަހީމް އަބްދުﷲ އާއެކު މަޖިލީހުގެ އިސް ދެ މަގާމު މިހާރު ފުރަމުންދަނީ ސަރުކާރު ހިންގާ ޕީއެންސީގެ މެންބަރުންނެވެ.
