މާލެ ސަރަހައްދުގެ ބޯހިޔާވަހިކަމަށް ބޮޑު ތަރުހީބެއް: 58،505 މީހުން ފޯމު ހުށަހަޅައިފި
ސަރުކާރުން މާލެ ސަރަހައްދުގައި ކުރިއަށްގެންދާ ބޯހިޔާވަހިކަމުގެ ބޮޑު މަޝްރޫއު ކަމަށްވާ “އާއިލީ ބޯހިޔާވަހިކަން” އަދި “ގޯތިގެދޮރު” ސްކީމަށް ފޯމު ހުށަހެޅުމުގެ މުއްދަތު ހަމަވިއިރު، ޖުމްލަ 58،505 އެޕްލިކޭޝަން ލިބިފައިވާކަމަށް ހައުސިން މިނިސްޓްރީން ހާމަކޮށްފިއެވެ. މިދިޔަ ޖެނުއަރީ މަހުން ފެށިގެން މި ޖޫން މަހުގެ 15 އަށް ހުޅުވާލި މި ފުރުސަތުގައި އެންމެ ގިނަ ބަޔަކު ކުރިމަތިލާފައިވަނީ ފްލެޓްތަކަށެވެ.
ތަފާސްހިސާބުތަކަށް ބަލާއިރު، އާއިލީ ބޯހިޔާވަހިކަން ސްކީމުގެ ދަށުން ފްލެޓަށް އެދި 35،818 މީހުން ފޯމު ހުށަހަޅާފައިވާއިރު، ގޯއްޗަށް އެދި ހުށަހެޅީ 9،826 މީހުންނެވެ. އަދި ގޯތިގެދޮރު ސްކީމުގެ ދަށުން ގޯއްޗަށް 12،749 މީހުން އަދި ފްލެޓަށް 112 މީހުން ކުރިމަތިލާފައިވެއެވެ. ސަރުކާރުގެ އަމާޒަކީ މި ސްކީމްތަކުގެ ދަށުން 1,250 އަކަފޫޓުގެ 15,000 ގޯއްޗާއި 7,900 ފްލެޓް ރައްޔިތުންނަށް ފޯރުކޮށްދިނުމެވެ.
މި މަޝްރޫއުގެ ދަށުން މާލޭގެ ރަށްވެހިންނަށް ގްރޭޓާ މާލެ ސަރަހައްދުން ބިން ހަމަޖައްސައިދޭއިރު، މާލޭގައި ދިރިއުޅޭ އެހެން ރަށްރަށުގެ މީހުންނަށް ބިން ދޫކުރާނީ އަލަށް ތަރައްގީކުރާ ރަސްމާލެއިންނެވެ. ރައީސް ޑރ. މުހައްމަދު މުއިއްޒުގެ ބޯހިޔާވަހިކަމުގެ ސިޔާސަތުގެ ދަށުން ކުރިއަށްދާ މި މަސައްކަތަކީ މާލެ ސަރަހައްދުގައި ދިމާވެފައިވާ ބޯހިޔާވަހިކަމުގެ ދަތިކަމަށް ލުޔެއް ހޯދައިދިނުމަށް ފެށި ވަރަށް ބޮޑު އުންމީދީ މަސައްކަތެކެވެ.
