ސްޕެނިޝް ލީގުގައި ރޭ ރެއާލް ބެޓިސް އަތުން 3-1 އިން މޮޅުވެ، ބާސެލޯނާއިން ލީގު ސީޒަނެއްގެ އަމިއްލަ ދަނޑުގައި ކުޅުނު ހުރިހާ މެޗަކުން މޮޅުވި ފުރަތަމަ ޓީމުގެ ޝަރަފު ހޯދައިފިއެވެ.
38 މެޗު ކުޅޭ ލީގު ފޯމެޓެއްގައި އަމިއްލަ ދަނޑުގައި ކުޅުނު 19 މެޗުން ވެސް މޮޅުވެ ބާސެލޯނާ ތާރީޚީ ރެކޯޑެއް ހެދިއިރު، ރޭގެ މެޗުގައި އެޓީމަށް ރަފީނިއާ ދެ ލަނޑު އަދި ޖޮއާއޯ ކަންސޭލޯ އެއް ލަނޑު ޖަހައިދިނެވެ. މިހާރު ލީގު ޗެމްޕިއަން ބާސެލޯނާ އޮތީ 37 މެޗުން 94 ޕޮއިންޓާއެކު ތާވަލުގެ އެއްވަނައިގައެވެ.
ލީގުގެ ދެވަނައިގައި އޮތް ރެއާލް މެޑްރިޑުން ރޭ ސެވިއްޔާގެ މައްޗަށް 1-0 އިން ކުރިހޯދިއިރު، މެޗުގެ ހަމައެކަނި ލަނޑު ކީލިއަން އެމްބާޕޭ ތަނަވަސްކޮށްދިން ފުރުސަތަކުން ޖަހައިދިނީ ވިނީޝިއުސް ޖޫނިއާއެވެ. މިއީ މި ސީޒަނުގައި ވިނީޝިއުސް ކާމިޔާބުކުރި 22 ވަނަ ލަނޑެވެ. މި މޮޅާއެކު ރެއާލް މެޑްރިޑަށް 37 މެޗުން 83 ޕޮއިންޓް ލިބިފައިވާއިރު، އެޓީމަކީ މީގެ ކުރިން 1985/1986 ވަނަ އަހަރު އަމިއްލަ ދަނޑުގައި 17 މެޗުން މޮޅުވެގެން ރެކޯޑެއް ހެދި ޓީމެކެވެ.
ގަދަ ހަތަރެއްގެ ވާދަވެރިކަމަށް ބަލާއިރު، ތިންވަނައިގައި އޮތް ވިޔަރެއާލް ރޭ ރަޔޯ ވަޔެކާނޯ އަތުން 2-0 އިން ބަލިވުމުން އެޓީމަށް ވަނީ ހާސްކަން ކުރިމަތިވެފައެވެ. ހަތަރުވަނައިގައި އޮތް އެތުލެޓިކޯ މެޑްރިޑުން ރޭ ޖިރޯނާ އަތުން 1-0 އިން މޮޅުވެ، ވިޔަރެއާލާ އެއްވަރަށް 69 ޕޮއިންޓް ވަނީ ހަމަކޮށްފައެވެ. މިވަގުތު ވިޔަރެއާލަށް ތިންވަނަ ލިބެނީ ޖެހި ގޯލުގެ ތަފާތުން ކަމަށްވާއިރު، ލީގުގެ ގަދަ ތިނެއް ކަށަވަރުވާނީ ފަހު މެޗުގެ ނަތީޖާއަށް ފަހުގައެވެ.
