ނިއު ޔޯކްގެ މޭޔަރުކަމުގެ ހުވާ ޚަތިމުގައި އަތްލައިގެން ހުރެ ޒަހްރާން މަމްދާނީ ކުރައްވައިފި
އެމެރިކާގެ އެންމެ ބޮޑު ސިޓީ ކަމަށްވާ ނިއު ޔޯކްގެ މޭޔަރުކަމުގެ މަގާމަށް އިންތިހާބުވި ޒުވާން ކެންޑިޑޭޓް، ޒަހްރާން މަމްދާނީ، އާ އަހަރާ އެކު އެ މަގާމުގެ ހުވާކުރައްވައި، ރަސްމީކޮށް މަގާމުގެ ޒިންމާތައް އަދާކުރައްވަން ފައްޓަވައިފި އެވެ.
ޝިއައީ މުސްލިމެއް ކަމަށްވާ، އުމުރުން 34 އަހަރުގެ މަމްދާނީ މަގާމުގެ ހުވާކުރެއްވީ ނިއު ޔޯކަށް 2026 ވަނަ އަހަރު ފެށުނު ވަގުތު، ސިޓީ ހޯލްގެ ދަށުގައި ދޫކޮށްލާފައިވާ ސަބްވޭ ސްޓޮޕެއްގައި ބޭއްވި ހާއްސަ ރަސްމިއްޔާތެއްގަ އެވެ. މި ރަސްމިއްޔާތު ބޭއްވީ، ވަޒީފާ އަދާކުރާ މީހުންނަށް ދެއްވި ވައުދުތަކަށް އިހުތިރާމްކުރުމުގެ ރަމްޒެއްގެ ގޮތުގައެވެ.
މި ހާއްސަ ރަސްމިއްޔާތުގައި، މޭޔަރު މަމްދާނީ މަގާމުގެ ހުވާކުރެއްވީ ގުރުއާން މުސްހަފެއްގައި އަތްތިލަ ބީއްސަވައިގެން ހުންނަވައެވެ. އެ މުސްހަފު ހިފަހައްޓަވައިގެން ހުންނެވީ އެމަނިކުފާނުގެ އަނބިކަނބަލުން ރާމާ ދުވާޖީ އެވެ. މަގާމުގެ ހުވާކުރެއްވުމަށް ފަހު ނޫސްވެރިންނާ ބައްދަލުކުރައްވައި މަމްދާނީ ވިދާޅުވީ، ނިއު ޔޯކަށް ހިދުމަތްކުރުމުގެ ފުރުސަތު ލިބިވަޑައިގަތުމަކީ “މުޅި އުމުރަށް ލިބިގެން ދިޔަ ޝަރަފެއް އަދި ފަހުރެއް” ކަމަށެވެ.
މޭޔަރު މަމްދާނީގެ އޮފީހުން ހާމަކުރެއްވި ގޮތުގައި، ސަބްވޭ ސްޓޮޕެއްގައި ހުވާކުރުމުގެ ރަސްމިއްޔާތު ބޭއްވުމުގެ ބޭނުމަކީ، ވަޒީފާ އަދާކޮށް ބުރަކޮށް މަސައްކަތްކުރާ މީހުންނަށް އެމަނިކުފާނު ވެ ވަޑައިގެންފައިވާ ވައުދުތަކަށް އިހުތިރާމްކުރައްވާނެ ކަމުގެ ޔަގީންކަން ދިނުމުގެ ރަމްޒެއްގެ ގޮތުގައެވެ. ކުލި ކޮންޓްރޯލްކުރުމާއި، އާންމު ދިރިއުޅުމުގެ އަގުތައް ދަށްކުރުމާއި، ހިލޭ ބަސް ދަތުރުކުރެވޭނެ ގޮތް ހެދުން ފަދަ ބޮޑެތި ވައުދުތަކާ އެކު މަމްދާނީ ވަނީ އިންތިހާބު ކާމިޔާބުކުރައްވާފައެވެ.
އިންތިހާބުގެ ކުރިން ގިނަ ބަޔަކަށް އެހާ މަޝްހޫރު ބޭފުޅެއް ނޫން ނަމަވެސް، ޑިމޮކްރެޓިކް ޕާޓީގެ ފަރާތުން މޭޔަރުކަމަށް ވާދަކުރައްވާނެ ކެންޑިޑޭޓެއްގެ ގޮތުގައި ހޮވިވަޑައިގަތުމަށް ފަހު މަމްދާނީއަށް ވަނީ ބޮޑު މަގުބޫލުކަމެއް ލިބިވަޑައިގެންފައެވެ. ރައީސް ޑޮނަލްޑް ޓްރަމްޕާއި ބޮޑެތި މަހުޖަނުންގެ އެންޓި ކެމްޕޭންތަކާ ކުރިމަތިލާން ޖެހިވަޑައިގަތް ނަމަވެސް، އެމަނިކުފާނު ވަނީ ކުއްލި މަގުބޫލުކަމާއެކު ބޮޑު ކާމިޔާބީއެއް ހޯއްދަވާފައެވެ.
މޭޔަރުކަމުގެ ދައުރު ފައްޓަވާއިރު، މަމްދާނީއަށް ކުރިމަތިވެވަޑައިގަންނަވާނެ އެންމެ ބޮޑު ގޮންޖެހުމަކީ، އެމަނިކުފާނު ދެއްވި ވައުދުތައް ހަގީގަތަކަށް ހެދުމެވެ. ދިރާސާކުރާ ފަރާތްތަކުން ބުނާ ގޮތުގައި، މި ވައުދުތައް ހަގީގަތަކަށް ހެދުމަށްޓަކައި ރައީސް ޑޮނަލްޑް ޓްރަމްޕުގެ އެއްބާރުލުން ލިބޭ މިންވަރަކީ މުހިންމު ކަމެކެވެ. ނިއު ޔޯކުގެ ރައްޔިތުންގެ އުންމީދުތައް އައު މޭޔަރާ އެކު ވަނީ އާވެފައެވެ.
