މާދަމާއިން ފެށިގެން ތެރަޕީތަކަށް އާސަންދަ ލިބޭގޮތް ހަމަޖައްސާ، ތެލަސީމިއާ އެލަވަންސް ތައާރަފުކޮށްފި

މާދަމާއިން ފެށިގެން ތެރަޕީތަކަށް އާސަންދަ ލިބޭގޮތް ހަމަޖައްސުމާއި، ތެލަސީމިއާ އެލަވަންސް ތައާރަފުކުރުން ހިމެނޭހެން މާދަމާއިން ފެށިގެން މުހިންމު 5 ޕްރޮގްރާމެއް ފެށުމަށް އެންސްޕާއިން ނިންމައިފިއެވެ.

މިގޮތުން، ތެލަސީމިއާ ކުދިންނަށް 2,000 ރުފިޔާގެ އެލަވަންސެއް ދިނުމާއި، ޕްރައިވެޓް ކްލިނިކްތަކުންނާއި ހޮސްޕިޓަލްތަކުން ދޭ ހުރިހާ ތެރަޕީ ޚިދުމަތަކަށް އާސަންދަ ލިބޭނެ އިންތިޒާމު ހަމަޖެއްސުމާއި، ނަފްސާނީ ބަލިތަކަށް ހިނގާ ހުރިހާ ޚަރަދަކަށް އާސަންދަ ލިބޭނެ އިންތިޒާމު ހަމަޖެއްސުން ހިމެނެއެވެ.

މީގެ އިތުރުން، ފިލިޕީންސްގައި ދިރިއުޅޭ ފަރާތްތަކަށް “މެރަނާ ސްކީމް” ގެ ތެރެއިން ބޭސްފަރުވާ ކުރެވޭ އިންތިޒާމު ހަމަޖައްސައި، އެ ސްކީމުގެ ދަށުން ހިނގާ ޚަރަދުގެ 65 އިންސައްތަ އާއި ހަމައަށް ހަމަޖެއްސުން ހިމެނެއެވެ. އަދި އެކަނިވެރި މައިންނާއި ބަފައިންނަށް ދޭ އެލަވަންސް ބޮޑުކޮށް، ކޮންމެ ކުއްޖަކަށް 3,000 ރުފިޔާގެ މަގުން 4 ކުދިންނާ ހަމައަށް، ޖުމްލަ 12,000 ރުފިޔާ އާއި ހަމައަށް އިތުރުކުރުން ވެސް ހިމެނޭކަން އެންސްޕާއިން ވަނީ ހާމަކޮށްފައެވެ.

މިއަދު ބޭއްވި ރަސްމިއްޔާތެއްގައި މި ޕްރޮގްރާމްތައް އިފްތިތާޙްކޮށްދެއްވީ ހެލްތު މިނިސްޓަރު އަބްދުﷲ ނާޒިމް އާއި ޖެންޑާ މިނިސްޓަރު ޑރ. އައިޝަތު ޝިހާމެވެ. އެންސްޕާގެ ސީއީއޯ ހީނާ ވަލީދު ވިދާޅުވިގޮތުގައި މާދަމާއިން ފެށިގެން މި ހުރިހާ ޕްރޮގްރާމެއްވެސް “މައިންޑް ކޯ” ސިސްޓަމްގެ ތެރެއިން ޑިޖިޓަލްކޮށް ޚިދުމަތް ދެވޭނެއެވެ.