ޓްރަމްޕްގެ ޓެރިފްތަކާ ގުޅިގެން އެމެރިކާގެ އިޤްތިޞާދަށް ބޮޑެތި ގެއްލުންތަކެއް ލިބިދާނެ: މާހިރުން
އެމެރިކާގެ ރައީސް ޑޮނަލްޑް ޓްރަމްޕް އިޢުލާނުކުރެއްވި އާ ޓެރިފްތަކާ ގުޅިގެން އެ ޤައުމުގެ އިޤްތިޞާދަށް ބޮޑެތި ގެއްްލުންތަކެއް ލިބިދާނެކަމަށް ވޯލް ސްޓްރީޓްގެ އިސްވެރިން އިންޒާރުދީފިއެވެ.
މިގޮތުން އެމެރިކާގެ އެންމެ ބޮޑު ބޭންކު ކަމުގައިވާ ޖޭޕީ މޯގަން ޗޭސްގެ ސީއީއޯ ޖެމީ ޑައިމަން ވިދާޅުވެފައިވަނީ މި ޓެރިފްތަކުގެ ސަބަބުން އަގުތައް މައްޗަށް ދާނެ ކަމަށާއި، އިޤްތިޞާދީ ދުވެލި ލަސްވެ، އެމެރިކާގެ ބައިނަލްއަޤްވާމީ މަޤާމަށް އަސަރުކުރާނެ ކަމަށެވެ.
ބުދަ ދުވަހު ޢަމަލުކުރަން ފެށުމަށް ހަމަޖެހިފައިވާ ގިނަ ޓެރިފްތަކާ ގުޅިގެން ވޭތުވެދިޔަ ތިން ދުވަހު ސްޓޮކް މާކެޓްގައި ބޮޑެތި އަރައިފޭބުންތަކެއް އައިސްފައިވެއެވެ. މިކަމާ ގުޅިގެން ޖޭޕީ މޯގަންގެ ޗީފް އިކޮނޮމިސްޓް ވަނީ މި އަހަރު އެމެރިކާ ރިސެޝަނަކަށް ވެއްޓިދާނެކަމަށް އިންޒާރުދެއްވާފައެވެ. ނަމަވެސް، ޖެމީ ޑައިމަން ވިދާޅުވެފައިވަނީ ރިސެޝަނަކަށް ވެއްޓޭނެކަން އަދި ޔަޤީންނުވާ ކަމަށެވެ.
އެމެރިކާގެ ވިޔަފާރި ދާއިރާއިން ޢާންމުކޮށް ރައީސް ޓްރަމްޕްގެ ސިޔާސަތުތަކަށް ހާމަކޮށް ފާޑުކިޔުމުން އެއްކިބާވެފައިވީ ނަމަވެސް، މިފަހަރުގެ މާކެޓް ވިޔަފާރިތަކާ ގުޅިގެން މާލީ ދާއިރާގެ ގިނަ ބަޔަކު ވަނީ އެމީހުންގެ ކަންބޮޑުވުންތައް ފާޅުކޮށްފައެވެ.
ޖެމީ ޑައިމަން ވިދާޅުވެފައިވަނީ މިކަމުގެ ސަބަބުން އެމެރިކާގެ ދިގު މުއްދަތުގެ އިޤްތިޞާދީ އިއްތިހާދުތަކަށް ކުރާނެ އަސަރާ މެދު އެންމެ ބޮޑަށް ކަންބޮޑުވާ ކަމަށެވެ.
މި މައްސަލަ އަވަހަށް ހައްލުކުރެވޭވަރަކަށް އޭގެ ނޭދެވޭ އަސަރުތައް ކުޑަވާނެ ކަމަށް ޖެމީ ޑައިމަން ވިދާޅުވެފައިވެއެވެ.
އެމެރިކާގެ ރައީސް ޑޮނަލްޑް ޓްރަމްޕް ވަނީ އޭނާގެ “އެމެރިކާ ފަސްޓް” ސިޔާސަތުގެ ދަށުން ބައިނަލްއަޤްވާމީ ވިޔަފާރީގައި އެމެރިކާގެ މަޞްލަޙަތު ހިމާޔަތްކުރުމަށްޓަކައި ގިނަ ޓެރިފްތަކެއް ތަޢާރަފުކުރައްވާފައެވެ. މީގެ ތެރޭގައި ޗައިނާއިން އިމްޕޯޓްކުރާ މުދަލަށް ބޮޑެތި ޓެރިފްތަކެއް ކަނޑައެޅުމާއި، ސްޓީލް އަދި އެލުމިނިއަމް އިމްޕޯޓަށް ޓެރިފް ނެގުން ހިމެނެއެވެ.
މި ފިޔަވަޅުތަކުގެ ސަބަބުން ޗައިނާ އަދި ޔޫރަޕިއަން ޔޫނިއަންފަދަ ބޮޑެތި އިޤްތިޞާދުތަކުން ވަނީ ޖަވާބީ ފިޔަވަޅުތަކެއް އަޅާފައެވެ. މިކަމުގެ ސަބަބުން ދުނިޔޭގެ އިޤްތިޞާދަށް ކުރާނެ އަސަރާމެދު ގިނަ އިޤްތިޞާދީ މާހިރުން ވަނީ ކަންބޮޑުވުން ފާޅުކޮށްފައެވެ. ޚާއްޞަކޮށް ވިޔަފާރީގެ ހަނގުރާމައެއް ފެށުމުގެ ބިރު އޮތްކަމަށް ބައެއް ފަރާތްތަކުން ވަނީ އިންޒާރުދީފައެވެ.
