ސީރިޔާގެ ދެބައިކުޅަ އެއްބަޔަށްވުރެ ގިނަ ކުދިންނަށް ސްކޫލަށް ނުދެވޭ: ސޭވް ދަ ޗިލްޑްރަން
ސީރިޔާގެ ސްކޫލް އުމުރުގެ ކުދިންގެ ތެރެއިން ދެބައިކުޅަ އެއްބަޔަށްވުރެ ގިނަ ކުދިންނަކީ ސްކޫލަށް ދިއުމުގެ ފުރުޞަތު ލިބިފައި ނެތް ކުދިން ކަމަށް ސޭވް ދަ ޗިލްޑްރަން އިން ހާމަކޮށްފިއެވެ. އެ ޖަމްޢިއްޔާގެ ސީރިޔާގެ ޑިރެކްޓަރު ރަޝާ މުހްރެޒް ވިދާޅުވި ގޮތުގައި ސީރިއާގެ 3.7 މިލިއަން ކުދިންނަކީ ސްކޫލަށް ދިއުމުގެ ފުރުޞަތު ނެތް ކުދިންނެވެ.
“ގާތްގަނޑަކަށް 3.7 މިލިއަން ކުދިން އެބަތިބި ސްކޫލަށް ނުދެވިފައި. މި ކުދިން އަލުން ސްކޫލަށް ގެނައުމަށް އަވަސް ފިޔަވަޅުތަކެއް އަޅަން ޖެހޭ. މިއީ ސްކޫލް އުމުރުގެ ކުދިންގެ ދެބައިކުޅަ އެއްބަޔަށްވުރެ ގިނަ އަދަދެއް،” މުހްރެޒް ވިދާޅުވިއެވެ.
ސީރިޔާގައި ދިގު މުއްދަތަކަށް ދެމިގެންދިޔަ ހަނގުރާމައިގެ ސަބަބުން އެ ޤައުމުގެ ކުޑަކުދިންގެ ހާލަތު ވަރަށް ބޮޑަށް ދަށްވެފައިވާކަމަށް މުހްރެޒް ފާހަގަކުރެއްވިއެވެ. އޭނާ ވިދާޅުވި ގޮތުގައި ސީރިޔާގެ 7.5 މިލިއަން ކުޑަކުދިންނަށް އަވަސް އިންސާނީ އެހީތެރިކަން ބޭނުންވެފައިވެއެވެ. އަދި މީގެ ތެރެއިން ދެބައިކުޅަ އެއްބަޔަށްވުރެ ގިނަ ކުދިންނަށް ހަނގުރާމައިގެ ސަބަބުން ލިބިފައިވާ ނަފްސާނީ އަނިޔާތަކުން އަރައިގަތުމަށް ނަފްސާނީ އެހީތެރިކަން ބޭނުންވެފައިވާ ކަމަށްވެސް އޭނާ ވިދާޅުވިއެވެ.
2011 ވަނަ އަހަރު ފެށުނު ހަނގުރާމައިގެ ސަބަބުން ސީރިޔާގެ އިޤްތިޞާދާއި އާންމު ވަސީލަތްތައް ވަނީ ބޮޑުތަނުން ހަލާކުވެފައެވެ. އަދި މިދިޔަ ޑިސެމްބަރު 8 ގައި ރައީސް ބައްޝާރު އަލް-އަސަދުގެ ވެރިކަން ވައްޓާލި އާ ބަޣާވާތުގެ ސަބަބުން 700،000 އަށްވުރެ ގިނަ މީހުން ގޭދޮރު ދޫކޮށް ދާން މަޖުބޫރުވެފައިވާކަމަށް އދ. އިން ބުނެފައިވެއެވެ.
“އަޅުގަނޑުމެން ކުޑަކުދިން އަނބުރާ ސްކޫލަށް ގެނެވޭނެކަން ޔަޤީންކުރަން ޖެހޭ. އަދި އެ ކުދިންނަށް އަލުން ޞިއްޙީ ޚިދުމަތްތަކާއި، ކާބޯތަކެއްޗާއި އަދި ރައްކާތެރިކަން ލިބޭކަންވެސް ޔަޤީންކުރަން ޖެހޭ،” މުހްރެޒް ވިދާޅުވިއެވެ.
ސީރިޔާގެ ހަނގުރާމަ 2011 ވަނަ އަހަރު ފެށި ފަހުން އަވަސް ދުވެއްޔެއްގައި ބޮޑު އާންމު ހަނގުރާމައަކަށް ބަދަލުވެ، ގިނަބަޔަކުވަނީ ފަގީރުހާލަތަށް ވެއްޓިފައެވެ. ވޯލްޑް ބޭންކުން ބުނާ ގޮތުގައި މިހާރު ސީރިޔާގެ ކޮންމެ ހަތަރު މީހަކުން އެކަކު ދިރިއުޅެމުންދަނީ ނިކަމެތިކަމުގެ އެންމެ ދަށު ފަންތީގައެވެ. އަދި 2023 ވަނަ އަހަރުގެ ފެބްރުއަރީ މަހު އައި ފުރާނައަށް ނުރައްކާވި ބިންހެލުމުގެ ސަބަބުން އިތުރު ދަތިތަކާ ކުރިމަތިވިއެވެ.
