ކެލިފޯނިއާގެ ރެޕްރެޒެންޓޭޓިވް އާދަމް ޝިފް ބައިޑެންގެ ކެންޑިޑެސީ އަނބުރާ ގެންދިއުމަށް ގޮވާލައިފި

ކެލިފޯނިއާގެ ރެޕްރެޒެންޓޭޓިވް އާދަމް ޝިފް ބައިޑެންގެ ކެންޑިޑެސީ އަނބުރާ ގެންދިއުމަށް ގޮވާލައްވައިފިއެވެ.

އާދަމް ޝިފް ވިދާޅުވީ ބައިޑެން ވިސްނަވަންވާނީ ޒުވާން ކެންޑިޑޭޓަކަށް “ޓޯޗް” ހަވާލުކުރެއްވުމަށް ކަމަށާއި، އެއީ ކުރީގެ ރައީސް ޑޮނަލްޑް ޓްރަމްޕް ބަލިކުރުމުގެ ފުރުސަތު ބޮޑު ކަމެއް ކަމުގައެވެ.
ޝިފް ކަންބޮޑުވުން ފާޅުކުރެއްވީ ބައިޑެންގެ ކެންޑިޑެސީގެ ސަބަބުން ޑިމޮކްރެޓުންނަށް ރިޔާސަތު ގެއްލުމުގެ އިތުރުން ސެނެޓާއި ހައުސް އޮފް ރެޕްރެޒެންޓޭޓިވްސް ވެސް ގެއްލިދާނެތީއެވެ. މިހާރު ޝިފް ވަނީ ސެޕްޓެމްބަރު 29، 2023 ގައި އަވަހާރަވި ޑައިއޭން ފެއިންސްޓީންގެ ސެނެޓް ގޮނޑިއަށް ވާދަކުރައްވަމުންނެވެ.
ޝިފް ވިދާޅުވީ ޓްރަމްޕް ބަލިކުރުމަކީ “އެންމެ މުހިންމު އެއް ލަނޑުދަނޑި” ކަމަށާއި، މިކަމުގެ ނަތީޖާ ވަރަށް “ބޮޑު” ކަމަށެވެ.

ފާއިތުވި ދުވަސްތަކުގައި ޕެންސިލްވޭނިއާގެ ބަޓްލަރގައި ބޭއްވުނު ޓްރަމްޕްގެ ރެލީއެއްގައި އެކަކު މަރުވެ، ދެ މީހަކަށް ވަޒަންއަރައި، އަދި ހަމަލާދިން މީހާ ސީކްރެޓް ސަރވިސްއިން މަރާލާފައިވާކަން ފާހަގަކޮށްލެވެއެވެ.

ބައިޑެން މިހާރު ވަނީ ޑިމޮކްރެޓިކް ނޮމިނޭޝަނަށް ބޭނުންވާ 1،976 ޑެލިގޭޓުންގެ ބަދަލުގައި 3،896 ޑެލިގޭޓުން ހޯއްދަވާފައެވެ. ހަމައެއާއެކު ބައިޑެން ވިދާޅުވެފައިވަނީ އޭނާގެ ކެންޑިޑެސީ އަނބުރާ ނުގެންދަވާނެ ކަމަށެވެ. މިވަގުތު ބައިޑެން ގެންދަވަނީ ސްވިންގ ސްޓޭޓްތަކުގައި ކެމްޕޭން ކުރައްވަމުންނެވެ.

ރިޕަބްލިކަން ނެޝަނަލް ކޮންވެންޝަން މިލްވޯކީގައި ކުރިއަށްދާއިރު، ޓްރަމްޕް ވަނީ ސެނެޓަރ ޖޭ.ޑީ. ވޭންސް އޭނާގެ ރަނިންގ މޭޓްގެ ގޮތުގައި އިޢުލާނުކުރައްވާފައެވެ.

ޑިމޮކްރެޓިކް ނެޝަނަލް ކޮންވެންޝަން ފެށުމަށް ހަމަޖެހިފައިވަނީ އޯގަސްޓް 19 ވަނަ ދުވަހު ޝިކާގޯގައެވެ.