ފައްޔާޒް އިސްމާއިލްގެ ކެމްޕެއިނުގައި އުޅެނީ މަޖުބޫރު ވެގެން

ފައްޔާޒް އިސްމާއިލްގެ ކެމްޕެއިނުގައި އުޅެނީ މަޖުބޫރު ވެގެން ކަމަށް ބުނެ ފޮނުވާ މެސެޖް ތަކަކީ ރައީސް ނަޝީދުގެ ފޯނަށް މިހާރު އެންމެ ގިނައިން ލިބޭ މެސެޖްތައް ކަމުގައި ރައީސް ނަޝީދު ވިދާޅުވެއްޖެއެވެ.

އެމްޑީޕީގެ ޤައުމީ މަޖިލީހުގެ ވަޓްސްއެޕް ގްރޫޕެއްގައި މިވާހަކަ ވިދާޅުވަމުން އެމްޑީޕީގެ ލީޑަރ ރައީސް ނަޝީދު ވިދާޅުވީ، މިއީ އެމަނިކުފާނުގެ ފޯނަށް އެންމެ ގިނައިން އަންނަ މެސެޖު ކަމަށެވެ.

“އަޅުގަނޑު ހުރީ އަދި މިގޭ މީހުން ތިބީ ރައީސް ނަޝީދާއި ދެކޮޅަކަށް ނޫން, ކެމްޕޭން ކުރީ މަޖުބޫރުވީމަ. މި ވަގުތު އެންމެ ގިނައިން ލިބޭ ޓެކްސްޓް” ރައީސް ނަޝީދުގެ މެސެޖުގައި އޮތް އެއްޗެއް އޮތްގޮތަށް ވަޓްސް އެޕް ގުރޫޕަށް ފޮނުވި މެސެޖުގައިވެއެވެ.

އެމްޑީޕީން އެންމެ ފަހުން ބޭއްވި ގައުމީ މަޖިލީހުގައި ހަމަނުޖެހުންތައް ބޮޑުވި ވާހަކައަށް އިޝާރާތް ކުރައްވާ ނަޝީދުގެ މެސުޖުގައި ވަނީ އެމަނިކުފާނުގެ ފެކްޝަނުން ޗެއަޕާސަން ކަމަށް ވާދަކުރައްވާ އިންތިއާއި އިދިކޮޅު ކެންޑިޑޭޓު ފައްޔާޒް އިސްމާއިލާއި، އޭނާއަށް ތާއިދުކުރައްވާ އެމްޑީޕީ މެމްބަރު ރޮޒެއިނާ އާދަމަށްވެސް ބަހުގެ ހަމަލާތައް ރައްދުކުރައްވާފައެވެ.

އެގޮތުން ރޮޒައިނާއާއި ފައްޔާޒްއަށް އިޝާރާތް ކުރައްވާ ރައީސް ނަޝީދު ވިދާޅުވީ ”އެހާބޮޑަށް އަތް އުކައި, ކަނޑިކި ނަގާ, ކަރުބުޑުން ނެރޭ އަޑުފަށްގަނޑު ނެރެ ހަޅޭލެވުމަކީ ޕާޓީއަށް ލިބޭ ވަރަށް ބޮޑު ހުތުރެއް” ކަމަށެވެ.