ބީބީސީ ބްރޯޑްކާސްޓިން ހައުސް ކުރިމަތީގައި ހުރި ސްޓެޗޫއެއް ތަޅާލަން މީހަކު މަސައްކަތްކޮށްފި
ބީބީސީގެ ބްރޯޑްކާސްޓިން ހައުސްގެ މައި މަރުކަޒު ފާރުމައްޗަށް މީހަކު އަރައި އެރިކް ގިލްގެ މަޝްހޫރު ސްޓެޗޫއަކަށް ގެއްލުން ދިނުމަށް މަރުތޭލަ ބޭނުންކޮށްފި އެވެ.
ލަންޑަން މައި މަރުކަޒުގައި 1933 ވަނަ އަހަރު ހަރުކުރި އެރިކް ގިލްގެ އާޓްވޯކް އާ މެދު ދެބަސްވުން އުފެދިފައިވާތާ ޒަމާންތަކެއް ވެފައިވާއިރު، ގިނަބަޔަކު ދެކޭގޮތުގައި އެ ސްޓެޗޫ ނިސްބަތްވާ އާޓިސްޓަކީ ކުޑަކުދިންނަށް ޖިންސީ ގޯނާ ކުރާ މީހެކެވެ.
ގިލް އަކީ 1940 ވަނަ އަހަރު މަރުވުމާ ހަމައަށް 20 ވަނަ ގަރުނުގެ ކުރީކޮޅު އިނގިރޭސި އާޓިސްޓުންނާއި ޑިޒައިނަރުންގެ ތެރެއިން އެންމެ ފާހަގަކޮށްލެވޭ އެއް ފަންނާނެވެ. އެކަމަކު އޭގެ އެތައް ގަރުނެއް ފަހުން ޝާއިއުކުރި އޭނާގެ ޑައިރީތަކުން އޭނާގެ އަންހެން ދަރިންނާއި އާއިލީ ކުއްތާއަށް ޖިންސީ ގޯނާ ކުރާ ކަން ވަނީ ހާމަވެފަ އެވެ.
ޝޭކްސްޕިއާގެ ދަ ޓެމްޕެސްޓްގެ ޕްރޮސްޕެރޯ އާއި ޕާޓް-ނޭކެޑް އޭރިއަލް ދައްކުވައިދޭ މި ކުރެހުން ހަރުކުރީ 1933 ވަނަ އަހަރު ލަންޑަންގައި ހުންނަ ބީބީސީގެ ބްރޯޑްކާސްޓިން ހައުސްގެ މައި މަރުކަޒު ގެ ކުރިމަތީގައި، އިމާރާތް ހުޅުވިތާ ކުޑަ ދުވަސްކޮޅެއްގެ ތެރޭގަ އެވެ. މިއީ ރިޖެންޓް ސްޓްރީޓްގައި ހުންނަ ބީބީސީއަށް ވަންނަ ދޮރާށިން ފެށިގެން މަތީގައި ހުންނަ، ދުނިޔޭގެ ފެންވަރުގައި ފާހަގަކޮށްލެވޭ ތަރިކައިގެތެރޭގައި ލިސްޓްކޮށްފައިވާ އިމާރާތުގެ މުހިންމު ބައެކެވެ.
ގައުމީ ބްރޯޑްކާސްޓަރުގެ މައި މަރުކަޒުގައި ކުޑަކުދިންނަށް ޖިންސީ ގޯނާކުރާ މަޝްހޫރު މީހެއްގެ އާޓްވޯކެއް ހުރުމުން ސޯޝަލް މީޑިއާ ޑިސްކަޝަންގެ އާންމު ފޯކަސްއަކަށް ވެފައިވާ އިރު ޓޮމީ ރޮބިންސަން ފަދަ ކަނާތު ފިޔައިގެ އެކްޓިވިސްޓުން ބީބީސީއަށް ފާޑުކިޔާފައިވެ އެވެ.
ބްރޯޑްކާސްޓަރުގެ ކަލްޗާ އެޑިޓަރު ކޭޓީ ރަޒަލް ބުނި ގޮތުގައި ސްޓެޗޫއަށް ހަމަލާދީން މީހާ މަރުތޭލައެއް ހިފައިގެން ސިޑިން އަރައިގެން ދިޔަ އިރު، އެހެން މީހަކު ކައިރީގައި ލައިވްސްޓްރީމްކޮށް “ކުޑަކުދިންނަށް ޖިންސީ ގޯނާ ކުރާ މީހުންގެ ވާހަކަ” ދައްކަމުން އެމަންޒަރު ދުރަށް ފޮނުވަމުންދިޔަ އެވެ.
ބީބީސީގެ މޮނިޓަރިން ޖާނަލިސްޓް ޝަޔާން ސަރްދާރިޒާދާ ވިދާޅުވީ، އިމާރާތުގެ ކުރިމަތީގައި ގިލްގެ ސްޓެޗޫ ހުރުމަކީ “ބްރިޓިޝް ކާނަން، ‘އަހަރެމެންގެ ދަރިން ސަލާމަތް ކުރޭ’، ‘ސެޓަނިކް ރިސާޗު ގޯނާ’ އަދި އެނޫންވެސް މަކަރުވެރި ޖަމާއަތްތަކަށް ވަރަށް ވަރަށް ކުރިއްސުރެ ހަޖަމް ކުރަންއުނދަގޫވި ކަމެއް” ކަމަށެވެ. މި ސްޓެޗޫއަށް މަރުތޭލައެއް ބޭނުންކޮށްގެން ހަމަލާދިން މީހާގެ މަގްސަދު ނުވަތަ އައިޑެންޓިޓީ އަދި ސާފެއް ނުވެއެވެ.
ލަންޑަންގެ ފުލުހުން މިމައްސަލަ ގެންދަނީ ތަޙްޤީޤު ކުރަމުންނެވެ.
