ސީރިއާގެ ކަމާބެހޭ ފަރާތްތަކުން އިތުރު ދެލައްކަ ކެޕްޓަގަން ގުޅަ އަތުލައިގަނެފި
ސީރިއާގެ ކަމާބެހޭ އިދާރާތަކުން ބުރާސްފަތި ދުވަހު އިތުރު 200,000 ކެޕްޓަގަން ގުޅަ އަތުލައިގަނެފިއެވެ.
ސީރިއާގެ ޑްރަގް އެންފޯސްމަންޓް އެޑްމިނިސްޓްރޭޝަނުން މި ތަކެތި އަތުލައިގަތީ އުރުދުންގެ ބޯޑަރު ކައިރީގައި އޮންނަ ދަރާ ޕްރޮވިންސްގައި ހަރަކާތްތެރިވާ ކުށްވެރިންގެ ނެޓްވޯކަކަށް އަމާޒުކޮށް ހިންގި އޮޕަރޭޝަނެއްގައެވެ. ސީރިއާގެ ރަސްމީ ނޫސް އެޖެންސީ (ސަނާ) އިން ރިޕޯޓްކޮށްފައިވާ ގޮތުގައި، މެދުއިރުމަތީގެ އެކި ގައުމުތަކަށް މަސްތުވާތަކެތި އެތެރެކުރުމަށް ބޭނުންކުރާ ހަ ބެލޫން ވެސް މި އޮޕަރޭޝަނުގައި ވަނީ ހޯދާފައެވެ.
އދ. ގެ އޮފީސް އޮން ސީރިއާ އޮން ޑްރަގްސް އެންޑް ކްރައިމް (UNODC) އިން ފާހަގަކުރާ ގޮތުގައި، އެމްފެޓަމިންގެ ބާވަތެއް ކަމަށްވާ ކެޕްޓަގަންގެ ވަގުފާރީގެ ސަބަބުން މެދުއިރުމަތީގެ އާންމު ސިއްހަތަށާއި ސަލާމަތީ މަސްލަހަތަށް ބޮޑެތި ނުރައްކާތަކެއް ކުރިމަތިވަމުންދެއެވެ. އެ އިދާރާއިން މިދިޔަ އަހަރުގެ ނިޔަލަށް އާންމުކުރި ތަފާސްހިސާބުތަކަށް ބަލާއިރު، 2024 ވަނަ އަހަރުގެ ފަހުކޮޅުން ފެށިގެން އަރަބި ގައުމުތަކުގެ ކަމާބެހޭ ފަރާތްތަކުން ވަނީ މަދުވެގެން 177 މިލިއަން ކެޕްޓަގަން ގުޅަ އަތުލައިގަނެފައެވެ.
ކުރީގެ ރައީސް ބައްޝާރުލް އަސަދުގެ ވެރިކަމުގައި ސީރިއާ ވެފައިވަނީ ކެޕްޓަގަން އުފައްދާ އަދި އެކި ގައުމުތަކަށް ފޮނުވާ މައި މަރުކަޒަކަށެވެ. ގާތްގަނޑަކަށް 14 އަހަރުވީ ދާޚިލީ ހަނގުރާމައަށްފަހު، އިދިކޮޅު ހަނގުރާމަވެރިން އަސަދުގެ ސަރުކާރު ވައްޓާލުމާ ގުޅިގެން އޭނާ ވަނީ 2024 ވަނަ އަހަރުގެ ޑިސެމްބަރު މަހު ރަޝިއާއަށް ފިލައިގެން ގޮސްފައެވެ. އަސަދުގެ ސަރުކާރުން ވަނީ މި ވަގުފާރީގެ ސަބަބުން އަވަށްޓެރި ގައުމުތަކަށް ކުރިމަތިވަމުންދާ ނޭދެވޭ އަސަރުތަކާ މެދު އެ ގައުމުތަކުން ފާޅުކުރަމުންދިޔަ ކަންބޮޑުވުންތަކަށް ބީރު ކަންފަތެއް ދީފައެވެ.
މަސްތުވާތަކެތި އުފެއްދުމާއި، އޭގެ ވަގުފާރިކުރުމާއި، ބެހުމާ ދެކޮޅަށް މަސައްކަތްކުރާނެ ރޭވުންތަކާ ބެހޭގޮތުން މަޝްވަރާކޮށް، ގުޅިގެން މަސައްކަތް ކުރުމަށްޓަކައި އުރުދުން، ސީރިއާ، އިރާގު، މިސްރު، ސައޫދީ އަަރަބިއްޔާ އަދި ލުބުނާނުގެ އިސްވެރިން މި ހަފުތާގައި އައްމާންގައި ވަނީ ބައްދަލުކުރައްވާފައެވެ.
މިދިޔަ މަހު ޝާއިއުކުރި UNODC ގެ 2026 ވަނަ އަހަރުގެ ވޯލްޑް ޑްރަގް ރިޕޯޓުގައި ބަޔާންކޮށްފައިވާ ގޮތުގައި، އަސަދުގެ ސަރުކާރު ވެއްޓުނު ފަހުން ސީރިއާ އާއި ލުބުނާނުގެ ކަމާބެހޭ ފަރާތްތަކުން ގިނަ އަދަދެއްގެ މަސްތުވާތަކެތި އަތުލައިގަންނަމުން ދިޔަ ނަމަވެސް، މެދުއިރުމަތީގައި އެންމެ ފުޅާދާއިރާއެއްގައި ދައުރުވާ މަސްތުވާތަކެއްޗަކީ އަދިވެސް ކެޕްޓަގަންއެވެ.
