ފީފާ ވޯލްޑް ކަޕް 2026 ގެ ގްރޫޕް ‘ކޭ’ ގައި ހިމެނޭ ޕޯޗުގަލް އާއި އުޒުބަކިސްތާނު މިރޭ ބައްދަލުކުރާއިރު، މުޅި ދުނިޔޭގެ ސަމާލުކަން ހުއްޓިފައިވަނީ ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ އަށެވެ. މުބާރާތުގެ ފުރަތަމަ މެޗުގައި ޑީއާރު ކޮންގޯއާ ވާދަކޮށް 1-1 އިން ޕޯޗުގަލް އެއްވަރުވިއިރު، ރޮނާލްޑޯގެ ފަރާތުން ފެނުނު އާދައިގެ ކުޅުމުގެ ސަބަބުން އޭނާއަށް ވަނީ ބޮޑެތި ފާޑުކިޔުންތަކެއް އަމާޒުވެފައެވެ. އެ މެޗުގައި ބޯޅައިގައި ފައިޖެހުނީ އެންމެ 25 ފަހަރު ކަމަށްވާއިރު، ގޯލާ އަމާޒުކޮށް އެންމެ ހަމަލާއެއްވެސް އޭނާއަށް ފޮނުވާލެވިފައެއް ނުވެއެވެ.
ބޮޑެތި މުބާރާތްތަކުގައި ރޮނާލްޑޯ ލަނޑެއް ނުޖަހާތާ މިހާރު ޖެހިޖެހިގެން 10 މެޗު ވެފައިވާއިރު، ގައުމީ ޓީމަށް އޯޕަން ޕްލޭއަކުން އެންމެ ފަހުން އޭނާ ގޯލެއް ކާމިޔާބުކޮށްދިނީ 2025 ވަނަ އަހަރުގެ އޮކްޓޯބަރު މަހުގައެވެ. އުމުރުން މިހާރު 41 އަހަރުވެފައިވާ ރޮނާލްޑޯ އަދިވެސް ފުރަތަމަ އެގާރައިގައި ހިމަނާތީ ގިނަ ބަޔަކު ސުވާލު އުފައްދަމުންދާއިރު، ބައެއް ފުޓްބޯޅަ ދިރާސާކުރާ ފަރާތްތަކުން ދަނީ އޭނާ ބެންޗުކުރުމަށްވެސް ގޮވާލަމުންނެވެ. ނަމަވެސް، ކޯޗު ރޮބާޓޯ މާޓިނޭޒްގެ އިތުބާރު އަދިވެސް ރޮނާލްޑޯއަށް އެބައޮތް ކަމަށް ބެލެވޭތީ، މިރޭގެ މެޗުގައިވެސް އޭނާ ފުރަތަމަ އެގާރައިން ފެނުމުގެ ފުރުސަތު ބޮޑެވެ.
މިރޭގެ މެޗަށް ނިކުންނައިރު ޕޯޗުގަލްގެ އެޓޭކިން ވަރުގަދަކުރުމުގެ ގޮތުން ޕެޑްރޯ ނެޓޯގެ ބަދަލުގައި ފްރާންސިސްކޯ ކޮންސެއިސާއޯ ފެނުމަކީ އެކަށީގެންވާ ކަމެކެވެ. އަދި އަނިޔާއިން ސަލާމަތްވެ ޑިފެންޑަރު ރޫބެން ޑިއާސް އެނބުރާ ޓީމާ ގުޅޭނެ ކަމަށް ލަފާކުރެވޭއިރު، ޕޯޗުގަލް މިރޭ ކުޅޭނެ ކަމަށް ބެލެވެނީ 4-2-3-1 ގެ ފޯމޭޝަނަށެވެ. މި ރޭވުމުގެ ދަށުން ބެނާޑޯ ސިލްވާ، ބްރޫނޯ ފެނާންޑޭޒް އަދި ކޮންސެއިސާއޯ ތިބޭނީ ކުރިއަށް ކުޅޭ ރޮނާލްޑޯއަށް ގޯލު ޖަހާނެ ފުރުސަތުތައް ތަނަވަސްކޮށްދިނުމަށް ތައްޔާރަށެވެ.
އިދިކޮޅުން ނިކުންނަ އުޒުބަކިސްތާނަކީ މިއީ ވޯލްޑް ކަޕްގައި ވާދަކުރާ ފުރަތަމަ ފަހަރު ކަމަށްވިޔަސް، އިޓަލީގެ ކުރީގެ މަޝްހޫރު ޑިފެންޑަރު ފަބިއޯ ކެނަވާރޯގެ އިރުޝާދުގެ ދަށުން އެމީހުން ނިކުންނާނީ ފަސޭހައިން ދޫދޭ ގޮތަކަށް ނޫނެވެ. ފުރަތަމަ މެޗުން ކޮލަމްބިއާ އަތުން 3-1 އިން ބަލިވެފައިވާތީ، މުބާރާތުގައި ކުރިއަށްދިއުމުގެ އުއްމީދު ދަމަހައްޓަން އުޒުބަކިސްތާނަށްވެސް މިރޭ ޕޮއިންޓެއް ހޯދުން މަޖުބޫރެވެ. އެ ޓީމުގެ ގިނަ ކުޅުންތެރިންނަކީ ރޮނާލްޑޯއަށް ވަރަށް ސަޕޯޓުކުރާ ބައެއް ނަމަވެސް، ދަނޑުމަތީގައި އެމީހުންގެ މައިގަނޑު އަމާޒަކަށް ވާނީ ރޮނާލްޑޯ ހިފެހެއްޓުމެވެ.
ގްރޫޕްގެ ހާލަތު އޮތްގޮތުން ދެވަނަ ބުރަށް ދިއުމުގެ ފުރުސަތު ބޮޑުކުރަން ޕޯޗުގަލްއަށް މިރޭ މޮޅުވުން ނޫން ގޮތެއް ނެތެވެ. މިއީ އަމިއްލަ ފޯމު އަލުން އަނބުރާ ހޯދައި، ފާޑުކިޔުންތެރިންގެ އަނގަ ބަންދުކޮށްލަން ރޮނާލްޑޯއަށް ލިބޭނެ އެންމެ ރަނގަޅު ރެޑެމްޕްޝަން ފުރުސަތެވެ.
