ވަކީލު ނާޒިމް ސައްތާރަށް ތޫނު އެއްޗަކުން ހަމަލާދީ ޒަހަމްކޮށްލައިފި
މާލޭގައި ރޭ ހިނގި ނުރައްކާތެރި ހާދިސާއެއްގައި މަޝްހޫރު ގާނޫނީ ވަކީލު ނާޒިމް ސައްތާރަށް ތޫނު އެއްޗަކުން ހަމަލާދީ ޒަހަމްކޮށްލައިފިއެވެ. މި ހަމަލާއާ ގުޅިގެން ލިބުނު އަނިޔާތަކަށް އޭނާއަށް މިހާރު ދަނީ އޭޑީކޭ ހޮސްޕިޓަލުގައި ފަރުވާ ދެމުންނެވެ.
ފުލުހުންގެ އިދާރާއިން މައުލޫމާތު ދޭ ގޮތުގައި، ތޫނު އެއްޗަކުން މީހަކަށް ހަމަލާދީފައިވާ ކަމުގެ ރިޕޯޓު ލިބިފައިވަނީ ރޭ ދަންވަރު 12 ޖަހާކަންހާއިރުއެވެ. މި ހަމަލާގައި އަނިޔާވެފައިވަނީ އުމުރުން 49 އަހަރުގެ ދިވެހި ފިރިހެނަކަށް ކަމަށް ފުލުހުން ބުނި ނަމަވެސް، އެއީ ނާޒިމް ސައްތާރުކަން މިހާރު ވަނީ ކަށަވަރުވެފައެވެ.
މި ހަމަލާ އަމާޒުވި ސީދާ ސަރަހައްދެއް ނުވަތަ ހަމަލާ ދިނުމަށް ބޭނުންކުރި އެއްޗެއްގެ ތަފްސީލު ފުލުހުން އަދި ހާމައެއް ނުކުރެއެވެ. ނާޒިމަށް ލިބުނު ޒަހަމްތަކަށް ފަރުވާ ދެމުންދާއިރު، އޭނާގެ ހާލު ސީރިއަސް ނޫން ކަމަށް ހޮސްޕިޓަލުން ލިބުނު މައުލޫމާތުތަކުން އެނގެއެވެ.
މި މައްސަލައިގައި މިހާތަނަށް އެއްވެސް މީހަކު ހައްޔަރުކުރި ކަމެއް ފުލުހުން ހާމަކޮށްފައެއް ނުވެއެވެ. ނަމަވެސް މި މައްސަލަ ވަރަށް ސީރިއަސް މައްސަލައެއްގެ ގޮތުގައި ތަހުގީގު ކުރަމުންދާ ކަމަށް ފުލުހުން ބުނެފައިވެއެވެ.
