ސޫރިޔާގެ ދިފާއީ ވަޒީރު އައި.އެސް އާ ދެކޮޅަށް މަސައްކަތްކުރާ ވަފުދަކާ ބައްދަލުކުރައްވައިފި

ސޫރިޔާގެ ދިފާއީ ވަޒީރު މުރުހަފް އަބޫ ގަސްރާ، އައި.އެސް (ދާއިޝް) އާ ދެކޮޅަށް މަސައްކަތްކުރާ ބައިނަލްއަގުވާމީ އިއްތިހާދުގެ ކޮމާންޑަރު، މޭޖަރ ޖެނެރަލް ކެވިން ޖޭ. ލެމްބަރޓް އިސްކޮށް ހުންނެވި އެމެރިކާގެ އަސްކަރީ ވަފުދަކާ އަންގާރަ ދުވަހު ބައްދަލުކުރައްވައި މަޝްވަރާކުރައްވައިފިއެވެ.

“އޮޕަރޭޝަން އިންހެރެންޓް ރިޒޯލްވް” ގެ ކޮމްބައިންޑް ޖޮއިންޓް ޓާސްކް ފޯސްގެ އިސްވެރިޔާ ލެމްބަރޓް ވަނީ ސޫރިޔާގެ ދިފާއީ ވަޒީރުގެ އިތުރުން އެ ގައުމުގެ ޖެނެރަލް އިންޓެލިޖެންސްގެ ވެރިޔާ ހުސައިން އަލް-ސަލާމާއާ އެކު ސަރަހައްދީ މަސްރަހުގައި ހިނގަމުންދާ ކަންކަމާ ގުޅޭގޮތުން ވާހަކަދައްކަވާފައެވެ.

ސޫރިޔާގެ ރަސްމީ ނޫސް އެޖެންސީ (ސަނާ) އިން ރިޕޯޓްކޮށްފައިވާ ގޮތުގައި، މި ބައްދަލުވުމުގައި އަސްކަރީ އެކި ދާއިރާތަކުން ދެފަރާތުގެ މެދުގައި އޮތް ގުޅުން އިތުރަށް ހަރުދަނާކުރެވޭނެ ގޮތްތަކާ ބެހޭގޮތުން ފުޅާ ދާއިރާއެއްގައި މަޝްވަރާކުރެވުނެވެ.

މި މަޝްވަރާތައް ބާއްވާފައި މިވަނީ، ހަސަކާގެ ރަށްފުށުގައި އޮންނަ ގަސްރަކް ވައިގެ ބަނދަރުގެ ކޮންޓްރޯލް މި ހަފުތާގައި ސޫރިޔާ ސަރުކާރުގެ ދަށަށް ގެނައުމާ ގުޅިގެންނެވެ. މިއީ އެމެރިކާގެ ސިފައިން ސޫރިޔާގެ އަސްކަރިއްޔާއާ ހަވާލުކުރި އެންމެ ފަހު އަސްކަރީ މަރުކަޒެވެ. މިއާއެކު ދިމިޝްގުގެ ސަރުކާރަށް މުޅި ގައުމުގެ ފުރިހަމަ ބާރު އަލުން ވަނީ ލިބިފައެވެ.

މި ނިންމުމަކީ 2025 ވަނަ އަހަރުގެ އޮކްޓޫބަރު މަހު ސޫރިޔާގެ ރައީސް އަހުމަދު އަލް-ޝަރުއު އާއި އެމެރިކާގެ ރައީސް ޑޮނަލްޑް ޓްރަމްޕް ވައިޓް ހައުސްގައި ބޭއްވި ބައްދަލުވުމަށްފަހު، ދެ ގައުމުގެ މެދުގައި އޮތް ގުޅުން ރަނގަޅުވަމުންދާކަން ހާމަކޮށްދޭ ކަމެކެވެ.

އެމެރިކާއިން ސޫރިޔާގައި އަސްކަރީ ހަރަކާތްތައް ފަށާފައިވަނީ 2014 ވަނަ އަހަރު ބައިނަލްއަގުވާމީ އިއްތިހާދަކާއެކު، ސޫރިޔާގެ ބޮޑު ބަޔަކާއި އިރާގުގެ އުތުރުގެ ސަރަހައްދުތަކަށް އަތްގަދަކޮށްގެން އުޅުނު އައި.އެސް ޖަމާއަތާ ދެކޮޅަށް ކުރި ހަނގުރާމައިގެ ތެރެއިންނެވެ.