ރޮހިންޖާ ނަސްލު ފޮހެލުމުގެ ނިޒާމީ ހެކިތައް އައިސީޖޭއަށް ހުށަހަޅައިފި

ރޮހިންޖާ ނަސްލު ފޮހެލުމުގެ ނިޒާމީ ހެކިތައް އައިސީޖޭއަށް ހުށަހަޅައިފިއެވެ.

ބައިނަލްއަގުވާމީ ޖިނާއީ ކޯޓު (އައިސީޖޭ) ގައި ކުރިއަށްދާ މިޔަންމާގެ މައްޗަށް ރޮހިންޖާ ނަސްލު ފޮހެލުމުގެ ތުހުމަތުގައި ގެމްބިއާއިން ހުށަހަޅާފައިވާ މައްސަލައިގެ ދެވަނަ ދުވަހުގެ އަޑުއެހުމުގައި، މިޔަންމާ ސިފައިން ނިޒާމީ ގޮތެއްގައި ރޮހިންޖާ ދަރިކޮޅުގެ ފިރިހެނުންނާއި އަންހެނުން އަދި ކުޑަކުދިން މަރައި، ރޭޕްކޮށް، ގަދަކަމުން ނެތިކޮށްލަމުން ދިޔަކަމުގެ ހެކިތައް މިދިޔަ ހޯމަ ދުވަހު ވަނީ ހުށަހަޅާފައެވެ.

ގެމްބިއާއިން ހުށަހަޅާފައިވާ މި މައްސަލަ ބިނާކޮށްފައިވަނީ 2017 ވަނަ އަހަރު ރޮހިންޖާއިންނާ ދެކޮޅަށް މިޔަންމާ ސިފައިން ހިންގި ޖަރީމާތަކުގެ މައްޗަށެވެ. މި ތުހުމަތުތަކާ ގުޅޭ ހެކި ތިން ހަފްތާގެ ތެރޭގައި ނަގަން ކޯޓުގެ ފަނޑިޔާރުން ވަނީ ނިންމަވައިފައެވެ.

ގެމްބިއާގެ ވަކީލު ތަފަދްޒްވާ ޕަސިޕަނޯޑްޔާ ކޯޓަށް ހުށަހެޅުއްވި ހެކިތަކުގެ ތަފްސީލުތަކުގައި، މިޔަންމާގެ އުތުރު ރާޚީން ސްޓޭޓްގެ އަވަށެއްގައި ހިންގި ލާއިންސާނީ ހަމަލާތަކުގައި ސިފައިން ދުވަސްވީ މީހުންގެ ބޯ ބުރިކޮށްފައިވާކަމަށާއި، އަންހެނުންނާއި އަންހެން ކުދިން ގޭންގް ރޭޕްކޮށް އަދި ތުއްތު ކުދިން ކޯރުތަކަށް އުކާލާފައިވާކަމަށް ބަޔާންކުރެއްވިއެވެ.

އޭނާ އިތުރަށް ތުހުމަތު ކުރެއްވީ، ރޮހިންޖާ އަވަށްތަކުގެ ހުރިހާ އެންމެން މެރުމަށްފަހު، “ސާފުކުރުމުގެ އޮޕަރޭޝަން” ތަކުގެ ނަމުގައި ނިޒާމީ ގޮތެއްގައި އިމާރާތްތަކުގައި ހުޅުޖަހާފައިވާ ކަމަށެވެ. “މި ހުރިހާ ހެކިތަކަކުން ދަލީލުކޮށްދެނީ، މިޔަންމާގެ ދައުލަތުގެ މުއައްސަސާތައް މެދުވެރިކޮށް، ރޮހިންޖާ ދަރިކޮޅު ނައްތާލުމުގެ ނިޔަތުގައި އެގައުމުން އަމަލުކޮށްފައިވާކަން،” ޕަސިޕަނޯޑްޔާ ވިދާޅުވިއެވެ.

ނަމަވެސް، މިޔަންމާގެ އަސްކަރިއްޔާއިން އަބަދުވެސް ބުނަމުންދަނީ، އެ ހަރަކާތްތަކަކީ ރޮހިންޖާ ހަނގުރާމަވެރިން ސަލާމަތީ ބާރުތަކުގެ ބަޔަކު މަރާލުމުން ހިންގަންޖެހުނު އޮޕަރޭޝަނެއް ކަމަށެވެ. އެމީހުން ދެކޭ ގޮތުގައި، މި އޮޕަރޭޝަންތައް ހިންގާފައިވަނީ ހަމައެކަނި ބަޣާވާތްތެރިންނާ ދެކޮޅަށެވެ.

މި އަނިޔާވެރިކަމުގެ ސަބަބުން އެތައް ލައްކަ ރޮހިންޖާ މުސްލިމުންނެއް ވަނީ އަވަށްޓެރި ބަންގްލަދޭޝްއަށް ހިޖުރަކޮށްފައެވެ. މިހާރުވެސް ބަންގްލަދޭޝްގެ ކޮކްސް ބާޒާރުގައި އޮންނަ 8،000 އޭކަރުގެ ސަރަހައްދެއްގައި އޮންނަ ކުދި ކޭމްޕުތަކުގައި ރޮހިންޖާގެ 1.17 މިލިއަން މީހުން ދިރިއުޅެއެވެ.

މި ތުހުމަތުތަކަށް ރައްދު ދިނުމަށް މިޔަންމާގެ ވަކީލުންނަށް ފުރުސަތު ދިނުމަށް ހަމަޖެހިފައިވަނީ އަންނަ ހުކުރު ދުވަހުއެވެ. މި އަޑުއެހުންތަކަށް ބައިނަލްއަގުވާމީ މުޖުތަމަޢުގެ ބޮޑު ސަމާލުކަމެއް ލިބެމުންދެއެވެ.