ޢީދު ޚުތުބާގައި ރަޙިމުގެ ގުޅުން ދެމެހެއްޓުމުގެ މުހިންމުކަން ފާހަގަކޮށްފި
ފިޠުރު ޢީދު ދުވަހު ދެވުނު ޚުތުބާގައި އިސްލާމްދީނުގައި ޢީދުތަކުގެ މުހިންމުކަމާއި ފިޠުރު ޢީދުގެ ޙިކުމަތްތައް ބަޔާންކޮށްފިއެވެ. ކީރިތި ރަސޫލާ ﷺ ޖާހިލީ ޒަމާނުގެ ޢީދުތަކުގެ ބަދަލުގައި އިސްލާމީ ދެ ޢީދު ތަޢާރަފުކުރެއްވި ކަމަށާއި، ފިޠުރު ޢީދަކީ ރޯދަމަހުގެ އަޅުކަން ފުރިހަމަކުރުމުން އެކަމަށް ޝުކުރުކުރުމުގެ ގޮތުން ފާހަގަކުރެވޭ ދުވަހެއް ކަމުގައި ޚުތުބާގައި ފާހަގަކުރެވުނެވެ.
އިސްލާމީ ޢީދުތަކުގެ މައިގަނޑު މަޤްޞަދުތަކުގެ ތެރޭގައި އިސްލާމީ އުޚުއްވަތްތެރިކަން ބަދަހިކުރުމާއި، ޖަމާޢަތުގައި ބައިވެރިވެ، ސަލާމްކޮށް، ހެޔޮ އެދުންތައް ބަދަލުކުރުން ހިމެނޭ ކަމަށް ޚުތުބާގައި ބަޔާންކުރެވުނެވެ. ކޮންމެ މުސްލިމަކަށްވެސް ޢީދުގެ އުފާވެރިކަމުގައި ބައިވެރިވެވޭނެ މަގު ތަނަވަސްކުރުމަށްޓަކައި ޢީދު ނަމާދުގެ ކުރިން ފިޠުރު ޒަކާތް ނެރުމުގެ މުހިންމުކަން ޚުތުބާގައި ފާހަގަކުރެވުނެވެ.
ޚުތުބާގެ ޚާއްޞަ ނަސޭހަތެއްގެ ގޮތުގައި ގާތްތިމާގެ މީހުންނާ ގުޅުން ދެމެހެއްޓުމުގެ މުހިންމުކަން ބަޔާންކުރެވުނެވެ. “ރަޙިމުގެ ގުޅުން ދެމެހެއްޓުމަކީ މައިންބަފައިންގެ ޙައްޤުތަކާ ގުޅިފައިވާ ކަމެއްކަމަށާއި، ޢީދު ދުވަހު ގާތްތިމާގެ މީހުންނަށް ޒިޔާރަތްކޮށް ހެޔޮފޯރުކޮށްދިނުމަށް އިލްތިމާސް ކުރެވުނެވެ. ޚުތުބާގައި ބަޔާންކުރެވުނު މުހިންމު މެސެޖަކީ “އެ މީހުން ތިބާއާ ގުޅުން ނުބޭއްވިޔަސް، ތިބާ އެމީހުންނާ ދުރަށް ނުދިއުން” ކަމަށެވެ.
އިސްލާމްދީނުގައި ޢާއިލީ ގުޅުންތަކަށް ދެއްވާ މުހިންމުކަމުގެ ތެރެއިން، ޚާއްޞަކޮށް ރަޙިމުގެ ގުޅުން ދެމެހެއްޓުމަކީ ކޮންމެ މުސްލިމަކަށްވެސް ލާޒިމުކުރެވިފައިވާ ކަމެއްކަމަށް ޚުތުބާގައި އިތުރަށް ބަޔާންކުރެވުނެވެ. މިޒަމާނުގައި ޓެކްނޮލޮޖީގެ ވަސީލަތްތައް ތަރައްޤީވެފައިވާއިރު، ފޯނުކޮށް، މެސެޖެއް ނުވަތަ ފޮޓޯއެއް ފޮނުވާލައިގެން ނަމަވެސް ގާތްތިމާގެ މީހުންނަށް ގުޅުމަކީ ވަރަށް ފަސޭހަކަމެއްކަމަށާއި، އެގޮތުން ޢީދުގެ ދުވަސްތަކަކީ ރަޙިމުގެ ގުޅުން އާލާކުރުމަށް އެންމެ އެކަށީގެންވާ ފުރުޞަތުތަކެއްކަމަށް ޚުތުބާގައި ފާހަގަކުރެވުނެވެ.
ރަޙިމުގެ ގުޅުން ދެމެހެއްޓުމުގެ މަތިވެރި ދަރުމައާއި ސަވާބުގެ ވާހަކަވެސް ޚުތުބާގައި ފާހަގަކުރެވުނެވެ. ޞަޙީޙް ޙަދީޘްތަކުގައި ބަޔާންކުރެވިފައިވާ ގޮތުގައި، ރަޙިމުގެ ގުޅުން ބަދަހިކުރުމަކީ މީހާގެ ރިޒްޤު އިތުރުކޮށްދޭ ކަމެއްކަމަށާއި، ޢުމުރު ދިގުކޮށްދޭ ކަމެއްކަމަށް ބަޔާންކޮށްފައިވެއެވެ. އަދި ރަޙިމުގެ ގުޅުން ކަނޑާލުމަކީ ބޮޑެތި ފާފަތަކުގެ ތެރެއިން ހިމެނޭ ކަމެއްކަންވެސް ޚުތުބާގައި ހަނދާންކޮށްދެވުނެވެ.
ޚުތުބާގައި އިތުރަށް ފާހަގަކުރެވުނު ގޮތުގައި، ގާތްތިމާގެ މީހުންގެ ތެރެއިން ބައެއް މީހުން އަޅާނުލައި ތިބިނަމަވެސް، އެބައިމީހުންނާ ދުރަށް ނުގޮސް ގުޅުން ދެމެހެއްޓުމަކީ ޙަޤީޤީ މުސްލިމެއްގެ ސިފައެވެ. މައިންބަފައިންނާއި، އެއްބަނޑު އެއްބަފާ މީހުންނާއި، މާމައިންނާއި ކާފައިންނާއި، ބޮޑުދައިތައިންނާއި ބޮޑުބޭބެއިންނާއި، ކޮއްކޮމެންނާއި ދައްތައިންފަދަ ގާތްތިމާގެ މީހުންނަށް ޚާއްޞަ ސަމާލުކަމެއް ދިނުމަށް ޚުތުބާގައި އިލްތިމާސްކުރެވުނެވެ.
ޢީދުގެ ދުވަސްތަކަކީ މުޖުތަމަޢުގެ ހުރިހާ ފަންތިއެއްގެ މީހުންނަށް އެއްވަރަކަށް އުފާވެރިކަން ލިބެންވާނެ ދުވަސްތަކެއްކަމަށާއި، ޒަކާތް ދިނުމަށް ޝަރީޢަތުގައި އިސްކަންދޭ ފަރާތްތަކަކީ އާއިލާ ތެރެއިން ބޭނުންޖެހިފައިވާ ފަރާތްތައްކަން ފާހަގަކުރެވުނެވެ. ފަޤީރުންނާއި މިސްކީނުންގެ ތެރެއިންވެސް ގާތްތިމާގެ މީހުންނަށް އިސްކަންދީގެން ރަޙިމުގެ ގުޅުން ހަރުދަނާކުރުމަށް ބާރުއެޅުނެވެ.
ނިންމާލަމުން، ޢީދު ޚުތުބާގައި ބަޔާންކުރެވުނު ގޮތުގައި، ރަޙިމުގެ ގުޅުން ދެމެހެއްޓުމަކީ މިދުނިޔެއާއި އާޚިރަތުގައި އުފާވެރިކަމާއި ބަރަކާތް ހޯދައިދޭނެ ކަމެކެވެ. ޢީދު ދުވަހަކީ ހަމައެކަނި ކާންބޯން އުޅޭ ދުވަހެއްގެ ގޮތުގައި ނުބަލައި، އިޖުތިމާޢީ ގުޅުންތައް ބަދަހިކޮށް، ރަޙިމުގެ ގުޅުން އާލާކުރުމަށް އިސްކަންދޭ ދުވަހެއްގެ ގޮތުގައި ހެދުމަށް ޚުތުބާގައި ގޮވާލެވުނެވެ.
