ފީފާ ވޯލްޑް ކަޕް ފުޓްބޯޅަ މުބާރާތުގެ ކުއާޓާ ފައިނަލުގައި މިރޭ ދުނިޔޭގެ ޗެމްޕިއަން އާޖެންޓީނާއާ ދެކޮޅަށް ނުކުންނައިރު، އެ ޓީމުގައި ހުރި ބަލިފައިތައް ދެނެގަނެވިފައިވާ ކަމަށް ސްވިޒަލެންޑްގެ ކޯޗު މުރާތު ޔަކިން ބުނުމާއެކު، މި ފަހަރުގެ ކުރިމަތިލުން ދެ ޓީމަށް ވެސް ފަސޭހަނުވާނެކަން ހާމަވެއްޖެއެވެ.
ޔުނައިޓެޑް ސްޓޭޓްސްގެ ކަންސަސް ސިޓީގައި ކުޅޭ މި މެޗަކީ ސްވިޒަލެންޑުން 72 އަހަރުގެ ދިގު އިންތިޒާރަކަށް ފަހު ވޯލްޑް ކަޕްގެ ކުއާޓާ ފައިނަލުން ޖާގަ ހޯދި ފުރަތަމަ ފަހަރެވެ.
މެޗުގެ ކުރިން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަމުން ޔަކީން ބުނީ، އާޖެންޓީނާއަކީ މި ވަގުތު ދުނިޔޭގެ އެންމެ ވަރުގަދަ އެއް ޓީމަށް ވިޔަސް، އެ މީހުންނަކީ ބަލިނުކުރެވޭނެ ބައެއް ނޫން ކަމަށެވެ. އަދި އެ ޓީމާ ދެކޮޅަށް ކުޅޭއިރު ވިސްނަންޖެހޭ މުހިންމު ކަންތައްތަކެއް ފާހަގަކޮށް، މެޗަށް ހާއްސަ ސަމާލުކަމެއް ދީފައިވާނެ ކަމަށް އޭނާ ހާމަކުރި އެވެ.
ޔަކީން އިތުރަށް ފާހަގަކުރި ގޮތުގައި، އެންމެ ފަހުން އާޖެންޓީނާ ކުޅުނު ދެ މެޗަށް ބަލާއިރު އެ ޓީމުގެ ކުޅުމުން ބަލިކަށި ދަނޑިވަޅުތަކެއް ފެނިފައިވެ އެވެ. ދުނިޔޭގެ ޗެމްޕިއަނުންނާ ދެކޮޅަށް ކުޅުމަކީ ލިބޭ ބޮޑު ފުރުސަތެއްގެ ގޮތުގައި ސިފަކުރަމުން އޭނާ ބުނީ، ސްވިޒަލެންޑުން ނުކުންނާނީ އެ ބަލިފައިތަކުގެ ބޭނުން ހިފަން ކަމަށެވެ.
މި ފަހަރުގެ މުބާރާތުގެ ނޮކައުޓް ބުރުގައި އާޖެންޓީނާ އިން ކުރިމަތިލީ ވަރަށް ބޮޑެތި ގޮންޖެހުންތަކާ އެވެ. ގަދަ 32 ޓީމުގެ ބުރުގައި މުޅިން އަލަށް ވާދަކުރި ކޭޕް ވާޑް އަތުން އެ ޓީމު މޮޅުވީ 120 މިނިޓަށް މެޗު ދަންމާލައިގެން 3-2 އިންނެވެ. އަދި ގަދަ 16 ޓީމުގެ ބުރުގައި މިސްރާ ދެކޮޅަށް ކުޅުނު މެޗުގެ 80 މިނިޓާ ހަމައަށް މިސްރު ދެ ގޯލުގެ ކުރީގައި އޮއްވައި، އާޖެންޓީނާ އަށް މެޗުން މޮޅުވެވުނީ ފަހަތުން އަރައި ކާމިޔާބުކުރި ލަނޑުތަކުންނެވެ.
ސްވިޒަލެންޑުން ކުއާޓާގެ ޖާގައެއް ކަށަވަރުކުރީ ގަދަ 16 ގެ ބުރުގައި ވަރުގަދަ ކޮލަމްބިއާާާ ދެކޮޅަށް ކުޅެ، މެޗުގެ ފުރިހަމަ ވަގުތު ހަމަވިއިރު އެއްވަރުވުމުން ޕެނަލްޓީ ޖަހައިގެންނެވެ. ޔަކީން ބުނި ގޮތުގައި ސްވިޒަލެންޑަކީ މިހާރު ކޮންމެ ފަދަ ޓީމަކާ ދެކޮޅަށް ވެސް ނުކުމެ، އަމިއްލަ ނަފްސަށް އޮތް އިތުބާރާއެކު ނަތީޖާ ނެރެވޭނެ ފެންވަރުގެ ޓީމެކެވެ.
މި މެޗަކީ ޓެކްޓިކަލް ގޮތުން ވަރަށް ފޯރިގަދަ އަދި މި ލެވެލްގެ ކުޅުމެއް ފެންނާނެ މެޗެއްގެ ގޮތުގައި ޔަކީން ސިފަކުރި އެވެ. އާޖެންޓީނާ ފަދަ ބޮޑު ޓީމަކާ އެއްވަރަކަށް ހިފަހައްޓާލުމުގެ ގާބިލުކަން ސްވިޒަލެންޑްގައި އެބަހުރި ކަމަށާއި، ގައުމުގެ އުންމީދުތައް މަތީގައި ހުރިއިރު މިއީ ލިބޭ ބޮޑު ޝަރަފެއް ކަމަށް ވެސް އޭނާ ބުންޏެވެ.
މި ދެ ޓީމު އެންމެ ފަހުން ވޯލްޑް ކަޕެއްގައި ބައްދަލުކޮށްފައިވަނީ 2014 ވަނަ އަހަރެވެ. އެ ފަހަރުގެ ގަދަ 16 ގެ ބުރުގައި ވާދަވެރި ކުޅުމަކަށް ފަހު 1-0 ގެ ނަތީޖާއަކުން ސްވިޒަލެންޑް ވަނީ އާޖެންޓީނާ އަތުން ބަލިވެފަ އެވެ.
