ފޯޅަވަހި މޮރިޝަސްއަށް ދިނުން މަޑުޖައްސާލުމުން ސަރުކާރުން މަރުޙަބާ ކިޔައިފި

ފޯޅަވަހީގެ މައްޗަށް ރާއްޖެއިން ކުރާ ދައުވާއަށް އައު ފުރުޞަތުތަކެއް ހުޅުވިއްޖެކަމަށް ބަލައި، އެ ރަށްތައް މޮރިޝަސްއާ ޙަވާލުކުރުމުގެ މަސައްކަތް އިނގިރޭސިވިލާތުން މަޑުޖައްސާލި ނިންމުމަށް ދިވެހި ސަރުކާރުން ހޫނު މަރުޙަބާއެއް ކިޔައިފިއެވެ.

އިނގިރޭސި ސަރުކާރުން މިކަން މަޑުޖައްސާލީ އެމެރިކާގެ އިންތިޚާބީ ރައީސް ޑޮނަލްޑް ޓްރަމްޕް މިކަމާ ދެކޮޅަށް ފާޅުގައި ވާހަކަފުޅުދެއްކެވުމާ ގުޅިގެންނެވެ. ކުރިން ހަމަޖެހިފައި އޮތީ މޮރިޝަސްއަށް ފޯޅަވަހި ދިނުމުގެ ބިލެއް އިނގިރޭސިވިލާތުގެ ޤާނޫނު ހަދާ މަޖިލީހުގެ މަތީގެ (ހައުސް އޮފް ލޯޑްސް) އަށް ހުށަހަޅައި ބަހުސް ފެށުމަށެވެ. ނަމަވެސް، ބޭރުގެ މީޑިއާތަކުން ރިޕޯޓުކުރާ ގޮތުގައި ކުރިއަށް އޮތް ދައުރަށް އިނގިރޭސި ސަރުކާރުން އެކުލަވާލި ބިލުތަކުގެ ލިސްޓުން މިހާރު ވަނީ މި ބިލު އުނިކޮށްފައެވެ.

މި ކުއްލި ބަދަލާ ގުޅިގެން ދިވެހި ސަރުކާރުން ނެރުއްވި ބަޔާނެއްގައި ވިދާޅުވީ، މިއީ ފޯޅަވަހީގެ ސިޔާދަތީ ބާރު ހޯދުމަށް ރާއްޖެއިން ކުރަމުންދާ މަސައްކަތަށް ލިބުނު ވަރަށް ބޮޑު ކުރިއެރުމެއް ކަމަށެވެ. އަދި އިންޑިއާ ކަނޑުގެ ސަލާމަތާއި ހަމަޖެހުން ކަށަވަރުކުރުމާއެކު، މި މައްސަލައިގައި ރާއްޖޭގެ ޙައްޤުތަކަށް އިންސާފުވެރިކަމާއެކު ރިއާޔަތްކުރުމަށް ގޮވާލައްވާފައިވެއެވެ. މީގެ އިތުރުން ފޯޅަވައްސަކީ ޙައްޤު ގޮތުގައި ރާއްޖޭގެ ބައެއްކަމަށް ސަރުކާރުން ވަނީ ތަކުރާރުކޮށްފައެވެ.

ފޯޅަވަހީގެ މައްޗަށް މޮރިޝަސްއިން ދައުވާކުރި ނަމަވެސް، ޖިއޮގްރަފީ ގޮތުން ބަލާއިރު އެ ރަށްތަކާ އެންމެ ކައިރީގައި އޮތް ޤައުމަކީ ދިވެހިރާއްޖެއެވެ. މޮރިޝަސްގެ ވެރިރަށް ޕޯޓް ލުއީއާއި ފޯޅަވައްސާ ދެމެދު 1،300 އެއްހާ މޭލުގެ ދުރުމިން ހުރިއިރު، ރާއްޖޭގެ ވެރިރަށް މާލެއިން ފެށިގެން ފޯޅަވައްސަށް ހުރީ އެންމެ 310 މޭލުގެ ރާސްތާއެކެވެ.

ތާރީޚީ އަދި ސަގާފީ ގޮތުންވެސް ފޯޅަވައްސާއި ރާއްޖެއާ ދެމެދު އޮތީ ވަރަށް ބަދަހި ގުޅުމެކެވެ. އެ ރަށްރަށުން ފެނިފައިވާ މަހާނަގާތަކުގައި ދިވެހި ބަހުން ލިޔެފައިވާއިރު، އެ ގާތަކާއި ރާއްޖޭގެ އެހެން ރަށްރަށުން ފެންނަން ހުރި އާސާރީ މަހާނަގާތަކާ އެއްވެސް ތަފާތެއް ނެތެވެ. ހަމައެހެންމެ، 16 ވަނަ ޤަރުނުގައި ލިޔެފައިވާ ދިވެހި ރަސްކަލެއްގެ ފަތްކޮޅެއްގައި ފޯޅަވައްސަކީ ދިވެހި ދައުލަތުގެ ބައެއްކަން ސާފުކޮށް ބަޔާންކޮށްފައިވެއެވެ. މިއީ މޮރިޝަސްގައި މީހުން ވަޒަންވެރިވުމުގެ އެތައް ސަތޭކަ އަހަރެއް ކުރީގެ ލިޔުމެކެވެ.

ދިވެހިންގެ ޒަމާންވީ ފުލޯކު ވާހަކަތަކުންނާއި ކާބަން-ޑޭޓިންގްގެ ހޯދުންތަކުންވެސް މި ގުޅުން ސާބިތުވެއެވެ. މީގެ އިތުރުން އެންމެ ފާހަގަކޮށްލެވޭ އަނެއް ކަމަކީ، 1970 ގެ އަހަރުތަކުގައި އެމެރިކާއާއި އިނގިރޭސިންގެ އަސްކަރީ މަރުކަޒެއް ހެދުމަށް ފޯޅަވަހިން ގަދަކަމުން ބޭރުކޮށްލި އެރަށުގެ އަސްލު ވަޒަންވެރިންގެ ޑީއެންއޭ ތަޙުލީލުތަކުން، އެމީހުންގެ ނަސްލުގައި ދިވެހިންނާއި ކްރިއޯލް ނަސްލުގެ ބޮޑު ޙިއްޞާއެއް ވާކަން ކަށަވަރުވެފައި ވުމެވެ.