ފިލްމީ ދުނިޔެއާ އަލްވަދާޢު ކިޔުމަށް ފަހު، އަރްޖިތުގެ ފުރަތަމަ އަމިއްލަ ލަވަ ‘ރައިނާ’ ރިލީޒްކޮށްފި

އިންޑިއާގެ މަޝްހޫރު ލަވަކިޔުންތެރިޔާ އަރްޖިތު ސިންގް، ފިލްމުތަކަށް ލަވަކިޔުން ހުއްޓާލުމަށް ކުއްލި ގޮތަކަށް ނިންމުމަށް ފަހު، އޭނާގެ ފުރަތަމަ އަމިއްލަ ލަވަ “ރައިނާ” އިއްޔެ ރިލީޒްކޮށްފި އެވެ. މި ލަވަ އޭނާ ނެރެފައި ވަނީ މަޝްހޫރު މިއުޒިކް ޑައިރެކްޓަރު ޝޭކަރް ރަވްޖިއާނީއާ ގުޅިގެންނެވެ. މި އާ ލަވައާ އެކު، އަރްޖިތުގެ ފޭނުން ވަނީ އޭނާގެ އަސަރުގަދަ އަޑަށް ތައުރީފުކޮށް، “އަރްޖިތު ފަދަ ދެވަނަ އެހެން ލަވަކިޔުންތެރިއަކު ނެތް” ކަމަށް ބުނެފަ އެވެ.

އަރްޖިތު ސިންގްގެ އަމިއްލަ ލަވަ “ރައިނާ” ރިލީޒްކުރުމަށް މީގެ ކުރިން އިއުލާންކޮށްފައި އޮތް ނަމަވެސް، ފޭނުން ތިބީ މި ލަވައަށް އިންތިހާއަށް އިންތިޒާރުކޮށެވެ. އޭނާގެ މި އާ މަސައްކަތަކީ، ފިލްމުތަކަށް ލަވަކިޔުން ހުއްޓާލުމަށް އޭނާ ކުރި ނިންމުމަށް ފަހު، އެޅި ފުރަތަމަ މުހިންމު ފިޔަވަޅެވެ. މި ލަވައަށް މިއުޒިކް ހަދާފައި ވަނީ ޝޭކަރް ރަވްޖިއާނީ ކަމަށް ވާއިރު، ލަވަ ފުރަތަމަ ފަހަރަށް އިވިގެން ދިޔައިރު ވެސް ވަނީ ގިނަ ބައެއްގެ ސަމާލުކަން ހޯދާފަ އެވެ. މި ލަވައަށް މިހާރު ވެސް އަންނަނީ ފޭނުންގެ ފަރާތުން ހޫނު ތަރުހީބެއް ލިބެމުންނެވެ.

ލަވަ “ރައިނާ” ނެރުމާ އެކު، ސޯޝަލް މީޑިއާގައި ގިނަ ބަޔަކު ދަނީ އަރްޖިތުގެ އަސަރުގަދަ އަޑަށް ތައުރީފު ކުރަމުންނެވެ. ބައެއް ފޭނުން ބުނެފައި ވަނީ އޭނާއަކީ އަދިވެސް އިންޑިއާގެ “ނަންބާ ވަން” ކަމަށާއި، އޭނާ ލަވަކިޔާ ގޮތް ވަރަށް ތަފާތުވެފައި ހިތްތަކާ ކުޅެލާ ކަމަށެވެ. މީގެ އިތުރުން، އޭނާގެ އަޑުގެ ޖާދޫގައި ޖެހިފައިވާ އެތައް ބަޔަކު ވަނީ، އޭނާ ފިލްމުތަކަށް ލަވަކިޔުން ހުއްޓާލި ނަމަވެސް، އޭނާގެ އަމިއްލަ މަސައްކަތްތައް ކުރިއަށް ގެންދިއުމަށް ދިން މި ނިންމުމަށް މަރުހަބާ ކިޔާފަ އެވެ.

ފިލްމުތަކަށް ލަވަކިޔުން ހުއްޓާލިކަން އަރްޖިތު އިއުލާންކުރީ މިދިޔަ ޖެނުއަރީ މަހު ކުއްލި ގޮތަކަށެވެ. އޭނާ ބުނީ މިހާރު ބޭނުންވަނީ ކްލެސިކަލް މިއުޒިކަށް އިސްކަންދީ، އޭނާ އެންމެ ކުރާހިތްވާ މަސައްކަތްތަކަށް ވަގުތު ހުސްކުރަން ކަމަށެވެ. މި ނިންމުމަކީ އޭނާގެ ދިގު މިއުޒިކީ ދަތުރުގައި އެޅިފައިވާ ވަރަށް މުހިންމު ފިޔަވަޅެއް ކަމަށް ގިނަ ބަޔަކު ދެކެ އެވެ. އޭނާގެ މި ބަދަލާއެކު، އޭނާގެ ފޭނުންނަށް ވަނީ އާ ތަފާތު ތަޖުރިބާތަކެއް ލިބިގެންދާނެ ކަމުގެ އުއްމީދު ބޮޑުވެފަ އެވެ.

އިންޑިއާގައި މިވަގުތު ހުރި އެންމެ މަގުބޫލު ފިރިހެން ލަވަކިޔުންތެރިޔާ އަރްޖިތު ބުނި ގޮތުގައި، ފިލްމުތަކަށް ލަވަކިޔުމުގެ އިތުރު ޕްރޮޖެކްޓުތަކާ ހަވާލުވުން ހުއްޓާލި ނަމަވެސް، އަދިވެސް ނުނިމި ހުރި ގިނަ މަސައްކަތްތަކެއް އެބަހުއްޓެވެ. ނުނިމި ހުރި ލަވަތަކުގެ ލިސްޓު ވަރަށް ދިގު ކަމަށާއި މި އަހަރުގެ ނިޔަލަށް ނުވަތަ އަންނަ އަހަރުގެ ތެރޭގައި ވެސް އޭނާ ފިލްމުތަކަށް ކިޔާފައިވާ އާ ލަވަތައް ރިލީޒްވަމުން ދާނެ ކަމަށް އަރްޖިތު ވަނީ ހާމަކޮށްފަ އެވެ. މީގެ ސަބަބުން، އޭނާގެ ފޭނުންނަށް އޭނާގެ އަޑު އިވުމުގެ ފުރުސަތުތައް އަދިވެސް ލިބިގެންދާނެ އެވެ.

އަރްޖިތަކީ މިހާރު އިންޑިއާގެ މިއުޒިކް އިންޑަސްޓްރީގައި އެންމެ ބޮޑު އެއް ނަމެވެ. ބޮލީވުޑްގެ ކޮންމެ ފިލްމެއްގައިހެން އޭނާގެ ލަވައެއް ހިމެނެ އެވެ. އިންޑިއާގެ ވެސްޓް ބެންގޯލްއަށް އުފަން އަރްޖިތު، 2005 ވަނަ އަހަރު ރިއަލިޓީ ޝޯ “ފޭމް ގްރުކުލް”ގައި ބައިވެރިވި ނަމަވެސް، އޭނާ ބޮޑަށް މަޝްހޫރުވީ 2013 ވަނަ އަހަރު ނުކުތް ބޮލީވުޑްގެ ފިލްމު “އާޝިގީ 2″އަށް ކިޔައިދިން ލަވަ “ތުމް ހީ ހޯ” އިންނެވެ. އޭގެ ފަހުން “ޗަންނާ މޭރެޔާ” އާއި “ރާބްތާ” އާއި “ކޭސަރިޔާ” އަދި “ގެރުއާ” ކަހަލަ މަޝްހޫރު އެތައް ލަވައެއް އޭނާ ފިލްމުތަކަށް ކިޔައިދީފައިވެ އެވެ.

އަރްޖިތުގެ މި އާ ދަތުރަކީ އޭނާގެ ފަންނުގައި އާ ބާބެއް ފެށުން ކަމަށް ލަފާކުރެވެ އެވެ. ފިލްމުތަކަށް ލަވަކިޔުން ހުއްޓާލުމަށް ނިންމި ނަމަވެސް، “ރައިނާ” ކަހަލަ އަމިއްލަ މަސައްކަތްތަކުން އޭނާގެ ފޭނުންނާ އަދިވެސް ގުޅިފައި ހުންނާނެ ކަމަށް ބެލެވެ އެވެ. އޭނާގެ މިހާރުގެ އަމާޒަކީ ކްލެސިކަލް މިއުޒިކަށް ބޮޑު އިސްކަމެއް ދިނުން ކަމަށް ވާއިރު، މިއީ އޭނާގެ ފަންނުގައި ހުރި ތަފާތު ދިމާތައް ހޯދުމަށް ލިބުނު ފުރުސަތެއް ކަމަށް މިއުޒިކް ދާއިރާގެ ތަޖުރިބާކާރުން ބުނެ އެވެ.