ކެރިކްގެ އިރުޝާދުގެ ދަށުން ޔުނައިޓެޑުން ސިޓީ ބަލިކޮށް ތާވަލުގެ ހަތަރުވަނައަށް ޖެހިލައިފި

އިނގިރޭސި ޕްރިމިއާ ލީގުގައި މިއަދު ކުޅުނު ފޯރިގަދަ މެންޗެސްޓަރ ޑާބީ، 2-0 ގެ ނަތީޖާއަކުން މެންޗެސްޓަރ ސިޓީ ބަލިކޮށް މެންޗެސްޓަރ ޔުނައިޓެޑުން ކާމިޔާބުކޮށްފިއެވެ.

ރުބެން އަމޮރިމް ވަކިކުރުމާ ގުޅިގެން ވަގުތީ ކޯޗު މައިކަލް ކެރިކްގެ އިރުޝާދުގެ ދަށުން ޔުނައިޓެޑުން ކުޅުނު ފުރަތަމަ މެޗުން ލިބުނު މި މޮޅާއެކު، އެ ޓީމު ވަނީ 22 މެޗުން 35 ޕޮއިންޓް ހޯދައިގެން ތާވަލުގެ ހަތަރުވަނަ މަގާމަށް ކުރިއަށް ޖެހިލާފައެވެ.

އޯލްޑް ޓްރެފަޑްގައި 74،000 އަށްވުރެ ގިނަ ސަޕޯޓަރުންގެ ކުރިމަތީގައި ކުޅުނު މި މެޗުގެ ފުރަތަމަ ހާފުގައި ޔުނައިޓެޑުން ޖެހި ދެ ލަނޑެއް ވީއޭއާރުން ބޭރުކޮށްލި ނަމަވެސް، ދެވަނަ ހާފުގައި އެ ޓީމުން ވަނީ ކުޅުން ރަނގަޅުކޮށްފައެވެ. އެގޮތުން މެޗުގެ 65 ވަނަ މިނިޓުގައި ބްރޫނޯ ފެނާންޑޭޒް ތަނަވަސްކޮށްދިން ފުރުސަތަކުން ބްރަޔަން އެމްބުއޭމޯ ފުރަތަމަ ލަނޑު ޖަހައިދިންއިރު، އޭގެ 11 މިނިޓު ފަހުން މެތިއުސް ކޫނިއާގެ އެހީތެރިކަމާއެކު ޕެޓްރިކް ޑޯގޫ ވަނީ ޔުނައިޓެޑުގެ ދެވަނަ ލަނޑު ކާމިޔާބުކޮށްފައެވެ.

މި ނަތީޖާއާއެކު، ތާވަލުގެ އެއްވަނައިގައި އޮތް އާސެނަލްއާ ދެމެދު އޮތް ފަރަގު ތިން ޕޮއިންޓަށް ކުޑަކުރުމަށް ސިޓީއަށް ލިބުނު ފުރުސަތު ވަނީ ގެއްލިފައެވެ. މެޗުގެ ފަހުކޮޅު ސިޓީގެ ކޯޗު ޕެޕް ގާޑިއޯލާ ތިން ބަދަލެއް ގެނައި ނަމަވެސް ޔުނައިޓެޑުގެ ވަރުގަދަ ޑިފެންސް ފޫއަޅުވާލެވޭ ގޮތެއް ނުވިއެވެ. މެޗުގެ އިތުރު ވަގުތުގައި މޭސަން މައުންޓް ޖެހި ލަނޑުވެސް އޮފްސައިޑްވުމުގެ ސަބަބުން ބަލައިނުގަތް ނަމަވެސް، ޔުނައިޓެޑުން ވަނީ ހިތްހަމަޖެހޭ މޮޅަކާއެކު ތިން ޕޮއިންޓް ކަށަވަރުކޮށްފައެވެ.