ފިރުޢައުނުގެ ހަށިގަނޑު އޭނާގެ މަހާނައިން ފެނުނު ފަހުން، އެންމެ ބޮޑަށް އުފެދުނު ސުވާލަކީ އޭނާ މަރުވިތާ 3000 އަހަރަށްވުރެ ގިނަ ދުވަސްވެފައިވާއިރު، އޭނާގެ ހަށިގަނޑު މިހާ ރަނގަޅަށް ރައްކާތެރި ކަމާއެކު ދެމިއޮތީ ކީއްވެތޯއެވެ. މި ސުވާލު އުފެދުނީ 1975 ވަނަ އަހަރު ފިރުޢައުނު ރަމްސެސް 2 ގެ ހަށިގަނޑު ފެނުމާ ގުޅިގެންނެވެ. މިއީ މޫސާ ޢަލައިހިއްސަލާމުގެ ޒަމާނުގެ ފިރުޢައުނެވެ.
މި ސުވާލު އުފެދުނު މީހުންގެ ތެރޭގައި ފްރާންސްގެ މަޝްހޫރު ތަޙްޤީޤުވެރިއެއް ކަމުގައިވާ ޑރ. މޮރިސް ބުކާއިލް ވެސް ހިމެނެއެވެ. 2010 ވަނަ އަހަރު، އިތުރަށް ދިރާސާކުރުމަށްޓަކައި ފިރުޢައުނުގެ ހަށިގަނޑު ފްރާންސަށް ގެންދެވުނެވެ. ގިނަ ގަޑިއިރުތަކެއްގެ ދިރާސާތަކަށްފަހު، ޑރ. މޮރިސް ނިންމީ ފިރުޢައުނުގެ ހަށިގަނޑުގައި ހުރި ލޮނުގެ އަސަރުތަކަކީ އޭނާ ކަނޑުގައި މަރުވިކަމުގެ ސާފު ހެއްކެއް ކަމަށެވެ.
ޑރ. މޮރިސް އަށް ވަރަށް ބޮޑު ޝޮކެއް ލިބުނީ، މުސްލިމުންގެ އެންމެމާތްފޮތް ކީރިތި ޤުރުއާނުގައި 1400 އަހަރަށްވުރެ ކުރިން، ފިރުޢައުނު ކަނޑުގައި ޣަރަޤުވެ މަރުވިކަމާއި، އޭނާގެ ހަށިގަނޑު ދެމިއޮންނާނެކަން ބަޔާންކޮށްފައިވާކަން އެނގުމުންނެވެ. އޭނާއަށް ވަރަށް ބޮޑަށް ހައިރާންވި އަނެއް ކަމަކީ، ކިރިސްޓިއަން ދީނުގެ އިންޖީލުތަކުގައި (މަތިއު އަދި ލޫކާ) ހަމައެކަނި ފިރުޢައުނު މޫސާގެފާނުގެ ފަހަތުން ދުވަމުން ދިޔަކަން ބަޔާންކޮށްފައި އޮތުމެވެ. އިންޖީލުގައި ފިރުޢައުނު ކަނޑުގައި ޣަރަޤުވެ މަރުވިކަމެއް، އަދި އޭނާގެ ހަށިގަނޑު ދެމިހުންނާނެކަމެއް ބަޔާންކޮށްފައެއް ނުވެއެވެ.
ޤުރުއާނުގައި ފިރުޢައުނުގެ ނިމުން ސާފުކޮށް ބަޔާންކޮށްފައިވާކަން އެނގުމަށްފަހު، ޑރ. މޮރިސް ބުކާއިލް އިސްލާމްދީން ޤަބޫލުކުރިއެވެ. މިއީ ޤުރުއާނުގެ ޢިލްމީ މުޢުޖިޒާތެއްގެ ހެއްކެކެވެ. އަދި މިއީ އިސްލާމްދީނަކީ ﷲގެ ޙައްޤު ދީންކަމުގެ ހެއްކެކެވެ.
ޤުރުއާނުގައި ﷲ ވަޙީކުރައްވާފައިވެއެވެ: “ފަހެ، ތިމަންރަސްކަލާނގެ، މިއަދު ކަލޭގެ (ފުރާނަނެތް) ހަށިގަނޑު ސަލާމަތްކުރައްވާހުށީމެވެ. އެއީ، ކަލޭގެފަހުން އަންނަބަޔަކަށް، ޢިބްރަތެއް ކަމުގައި ކަލޭ ވުމަށެވެ. ހަމަކަށަވަރުން، މީސްތަކުންގެ ތެރެއިން ގިނަމީހުން ތިމަންރަސްކަލާނގެ އާޔަތްތަކާމެދު (އެބަހީ: ތިމަންރަސްކަލާނގެ ޤުދުރަތް ތެރިކަމުގެ މައްޗަށް ދަލީލުކުރާ ހެކިތަކާމެދު) غافل ވެގެންކަން ކަށަވަރެވެ.” (ޔޫނުސް: 92)
މި އާޔަތުން އަޅުގަނޑުމެންނަށް އެނގެނީ، ﷲ ފިރުޢައުނުގެ ހަށިގަނޑު ސަލާމަތްކުރެއްވި ސަބަބެވެ. އެއީ ފަހުގެ ޖީލުތަކަށް ޢިބްރަތެއްގެ ގޮތުގައެވެ. މިއަދު އަޅުގަނޑުމެންނަށް ފެންނަން އޮތް ފިރުޢައުނުގެ ހަށިގަނޑަކީ މި އާޔަތުގެ ތެދުކަން ސާބިތުކޮށްދޭ ހެއްކެކެވެ.
ޤުރުއާނުގައި އަދިވެސް ވަޙީކުރައްވާފައިވެއެވެ: ” ކަނޑުހުރަސް ކުރައްވައި، ތިމަންރަސްކަލާނގެ އިސްރާއީލްގެ ދަރިން ގެންދެވީމެވެ. ފަހެ، ފިރުޢައުނާއި، އޭނާގެ ލަޝްކަރު ދެކޮޅުވެރިކަމާއި، ޢަދާވާތްތެރިކަމުގެ ގޮތުގައި އެއުރެންގެ ފަހަތުން ދިޔައޫއެވެ. ދެން އެ ފިރުޢައުނު، ޣަރަޤު ވީހިނދު އޭނާ ބުންޏެވެ. އިސްރާއީލް ގެދަރިން އީމާންވީ ކަލާނގެ މެނުވީ، އެހެންކަލަކު ނެތްކަމަށް އަހުރެން އީމާން ވެއްޖައީމެވެ. އަދި އަހުރެން ވަނީ މުސްލިމުންގެ ތެރެއިންނެވެ.” (ޔޫނުސް: 90)
މި އާޔަތުން އެނގެނީ ފިރުޢައުނު މަރުވީ ކަނޑުގައި ޣަރަޤުވެގެންކަމެވެ. އަދި މަރުވާން ކައިރިވީ ހިނދު، އޭނާ އީމާންވިކަމެވެ. ނަމަވެސް، އެހާ ލަސްވުމުން އެ އީމާންވުން ބަލައިނުގަނެވުނެވެ. މިއީ ދުނިޔޭގެ ދިރިއުޅުމުގައި ކުރާ ނުބައި ޢަމަލުތަކުގެ ނަތީޖާއެވެ. އަދި މަރުވާން ކައިރިވީމާ ވާ އީމާންކަމުގެ ބޭކާރުކަމުގެ ހެއްކެކެވެ.
ޤުރުއާނުގެ މި ބަޔާންތަކާއި، ޒަމާނުގެ ޢިލްމީ ހޯދުންތަކާ ދިމާވުމަކީ ޤުރުއާނުގެ ޙައްޤުކަމުގެ ހެއްކެކެވެ. އަދި އިސްލާމްދީނަކީ ﷲ ބާއްވާލެއްވި ޙައްޤު ދީންކަމުގެ ހެއްކެކެވެ. މިފަދަ ހެކިތައް ދައްކުވައިދެނީ އިސްލާމްދީނުގެ މަތިވެރިކަމާއި، ޤުރުއާނުގެ މުޢުޖިޒާތްތެރިކަމެވެ.
ފިރުޢައުނުގެ ހަށިގަނޑު މިހާ ރަނގަޅަށް ދެމިހުރީ ﷲގެ ޤުދުރަތްތެރިކަމުންނެވެ. އެއީ އަޅުގަނޑުމެންނަށް ޢިބްރަތެއް ލިބުމަށްޓަކައެވެ. އަދި ﷲގެ ބަސްފުޅުގެ ތެދުކަން ސާބިތުކޮށްދިނުމަށްޓަކައެވެ. މި ހެކިތަކުން އަޅުގަނޑުމެންގެ އީމާންކަން އިތުރުވެ، ﷲއަށް ކިޔަމަންތެރިވުމަށް ބާރުއެޅެއެވެ. އަދި ދުނިޔޭގެ ދިރިއުޅުމުގައި ހެޔޮ ޢަމަލުތައް ކުރުމަށް ހިތްވަރު ލިބެއެވެ.
ފިރުޢައުނު ކަނޑުގައި ޣަރަޤުވެ މަރުވިތާ އެތައްހާސް އަހަރު ވީފަހުންވެސް، އޭނާގެ ހަށިގަނޑު މިއަދު އަޅުގަނޑުމެންނަށް ފެންނަން އޮތުމަކީ ހަމަކަށަވަރުންވެސް ﷲ ސުބުޙާނަހޫ ވަތަޢާލާގެ މަތިވެރިކަމުގެ ނިޝާނެކެވެ.
މިއީ ވަރަށް އަޖައިބުވެވޭ ކަމެކެވެ. ޤުރުއާނުގައި ފިރުޢައުނުގެ ހަށިގަނޑު ދެމިހުންނާނެކަމާއި، މުސްތަޤުބަލުގައި އެއްދުވަހަކުން އޭނާގެ ހަށިގަނޑު ފެންނާނެކަން ބަޔާންކޮށްފައިވާކަމީ އަޅުގަނޑުމެން އަބަދުވެސް އީމާންކަމުގައި ދެމިތިބުމަށާއި، ﷲގެ ކުޅަދުންވަންތަކަމުގެ ނިޝާންތަކާމެދު ޣާފިލުނުވުމަށް ލިބޭ ހަނދާންކޮށްދިނުމެކެވެ.
މިހާރު ފިރުޢައުނުގެ ހަށިގަނޑު ބާއްވާފައި ވަނީ މިޞްރުގެ ވެރިރަށް ޤާހިރާގައި ހުންނަ “ރޯޔަލް މަމީސް އޮފް އީޖިޕްޓް” މިއުޒިއަމްގައެވެ.
