އިންސްޓަގްރާމަށް ބާރުބޮޑުވެ މެސީގެ އެކައުންޓް ބަންދު ކޮށްފި
އާޖެންޓީނާގެ ފުޓްބޯޅަ ސުޕަސްޓާ ލިއޮނަލް މެސީ ދާދި ފަހުން އީއެސްޕީއެންއަށް ދިން އިންޓަވިއުއެއްގައި ބުނީ ވޯލްޑް ކަޕް ފައިނަލުގައި ފްރާންސް އަތުން އާޖެންޓީނާ މޮޅުވި މެޗަށް ފަހު ގިނަ އަދަދެއްގެ މެސެޖުތަކެއް ލިބުމުން އޭނާގެ އިންސްޓަގްރާމް އެކައުންޓް ބްލޮކް ކުރި ކަމަށެވެ. ޕެރިސް ސެއިންޓް ޖާމަން (ޕީއެސްޖީ) ގެ ފޯވާޑް ބުނީ އޭނާގެ އަމިއްލަ އެކައުންޓެއް ހިންގަމުން އަންނަ ކަމަށާއި އެ އެކައުންޓްގައި ދުނިޔޭގެ އެކި ކަންކޮޅުތަކުގައި އެތައް މިލިއަން ފޮލޯވަރުން އެބަތިބި ކަމަށެވެ.
ވޯލްޑް ކަޕް ފައިނަލަށް ފަހު ލިބުނު ތަރުހީބުން މުޅިން ހައިރާންވި،” ދުނިޔޭގެ އެކި ކަންކޮޅުތަކުން މެސެޖުތައް ލިބެމުން ދިޔައިރު އަހަރެންގެ އިންބޮކްސް ފުރިގެން ދިޔަ، ތެދަށް ބުނަންޏާ އެއީ ޕްލެޓްފޯމަށް ހޭންޑްލް ކުރެވޭ ވަރަށް ވުރެ މާ ބޮޑު ކަމެއް، އޭގެ ނަތީޖާއެއްގެ ގޮތުން އަޅުގަނޑުގެ އެކައުންޓް ބްލޮކްވީ.” އިންޓަވިއުގައި މެސީ ބުންޏެވެ.
މެސީ ވަނީ އޭނާގެ މުޅި ކެރިއަރުގައި ވެސް އޭނާއަށް އެއްބާރުލުން ދިން ސަޕޯޓަރުންނަށް ޝުކުރު އަދާކޮށްފަ އެވެ. ސަޕޯޓަރުންގެ ފަރާތުން ލިބުނު ލޯތްބާއި އެއްބާރުލުމަށް ޝުކުރު އަދާކުރަން. އެއީ އަޅުގަނޑަށް ވަރަށް ބޮޑު މާނައެއް އޮތް ކަމެއް، ހަގީގަތުގައި ވެސް އެ ހުރިހާ ކަމަކަށް ޝުކުރު އަދާކުރަން،” އޭނާބުންޏެވެ.
ހަ ފަހަރު ބެލޮން ޑިއޯ ކާމިޔާބުކޮށްފައިވާ މެސީ މިހާރު ދަނީ އޭނާގެ އެކައުންޓަށް އަލުން ވަދެ، އޭނާގެ ފޮލޯވަރުންނަށް އަޕްޑޭޓްތައް ޕޯސްޓް ކުރަމުންނެވެ. މަޝްހޫރު ފުޓުބޯޅަ ކުޅުންތެރިޔާގެ ސަޕޯޓަރުން މި މައްސަލަ އަށް ހައްލެއް ލިބުމުން ވަރަށް އުފާވި އިރު ގިނަ ބަޔަކު ވަނީ ސޯޝަލް މީޑިއާގައި އެކަމަށް ތާއީދުކޮށްފަ އެވެ.
އާޖެންޓީނާގެ ގައުމީ ޓީމުގެ ކެޕްޓަންގެ ހައިސިއްޔަތުން މެސީ ވަނީ ފާއިތުވި 28 އަހަރުގެ ތެރޭގައި ފުރަތަމަ ފަހަރަށް ވޯލްޑް ކަޕް ކާމިޔާބުކޮށްފަ އެވެ. މި ކާމިޔާބަކީ އެތައް އަހަރެއްގެ ބުރަ މަސައްކަތާއި އަމާނާތްތެރިކަމުގެ ނިމުން ކަމަށާއި އެ ތާރީހީ ކާމިޔާބީގެ އުފާ އަދިވެސް މުޅި ގައުމު ދަނީ ފާހަގަކުރަމުންނެވެ.
ވޯލްޑް ކަޕް ކާމިޔާބުކުރުމާ އެކު މިލިއަނެއްހާ މެސެޖް ލިބުމުން މެސީގެ އިންސްޓަގްރާމް އެކައުންޓް ބްލޮކް ކުރުމަކީ ފާއިތުވި އަހަރުތަކުގައި މެސީއަށް ލިބުނު ބޮޑު ތަރުހީބާއި ތާއީދު ދައްކުވައިދޭ ކަމެކެވެ.
