ރަޝިއާގެ މިލިޓަރީ އޮޕަރޭޝަން ކުޑަކޮށް، ޔޫކްރެއިންގެ ހުށަހެޅުންތައް ނިއުޓްރަލް ކުރަނީ

ޔުކްރެއިންގައި ކުރިއަށްގެންދާ ރަޝިއާގެ އަސްކަރީ އޮޕަރޭޝަންތައް ކުޑަކުރާނެ ކަމުގެ ވަޢުދު ރަޝިއާއިން ވެފައިވާއިރު، ޔޫކްރެއިން އިން އެމީހުންގެ ޑިމާންޑްތައް ނިއުޓްރަލް ކުރަން ހުށަހަޅައިފިކަމަށް ރިޕޯޓްތައް ބުނެފިއެވެ.

ޔޫކްރެއިންގެ ނެގޯޝިއޭޓަރުން ބުނީ އެމީހުން ހުށަހެޅީ އެ ގައުމުގެ އެލަޔަންސްތަކާއި ބޭރުގެ ފައުޖުތަކުގެ ހޯސްޓް ބޭސްތަކާ ނުގުޅޭނެ ފަދަ ސްޓޭޓަސްއެއް ކަމަށާއި ނަމަވެސް ނޭޓޯގެ ކަލެކްޓިވް ޑިފެންސް ކްލޯޒް ކަމަށްވާ “މާއްދާ 5” އާ އެއްގޮތްވާ ގޮތުގެ މަތިން އެ ގައުމުގެ ސަލާމަތާއި ރައްކާތެރިކަން ކަށަވަރުވާނެ ކަމަށެވެ.

އެމީހުން ވަނީ އިޒްރޭލާއި ނޭޓޯގެ މެމްބަރު ގައުމުތައް ކަމަށްވާ ކެނެޑާ، ޕޮލެންޑް އަދި ތުރުކީއަކީ މިފަދަ ގެރެންޓީތައް ދިނުމަށް އެހީތެރިވެދޭނެ ގައުމުތަކެއްގެ ގޮތުގައި ފާހަގަކޮށްފަ އެވެ.

މި ހުށަހެޅުންތަކުގެ ތެރޭގައި ރަޝިޔާއިން ހިސޯރުކޮށްފައިވާ ކްރައިމިއާގެ ހާލަތާ ގުޅޭ ގޮތުން 15 އަހަރުގެ ކޮންސަލްޓޭޝަން ޕީރިއަޑެއް ހިމެނޭނެ ކަމަށާއި، މި ހުށަހެޅުންތަކަށް އަމަލުކުރަން ފެށޭނީ މުޅިން ހަނގުރާމަ ހުއްޓާލުމުގެ ހާލަތެއް މެދުވެރިވެއްޖެނަމަ ކަމަށް އިސްތަންބޫލްގައި ނޫސްވެރިންނާ ވާހަކަ ދައްކަވަމުން ޔޫކްރެއިންގެ ނެގޯޝިއޭޓަރުން ވިދާޅުވިއެވެ.

ރަޝިޔާގެ ދިފާއީ ވަޒީރުގެ ނާއިބް އެލެގްޒެންޑަރ ފޮމިން ވިދާޅުވީ، ރަޝިޔާއިން މަޝްވަރާކުރުމުގެ ޝަރުތުތައް އުފެއްދުމަށް ޓަކައި، ކިއެވް އާއި ޗެރްނިހިވް ކައިރީގައި ހަނގުރާމަ ތައް ކުޑަކުރަން ނިންމާފައިވާ ކަމަށެވެ.

ރަޝިޔާގެ އެންމެ އިސް ނެގޯޝިއޭޓަރ ވްލަޑިމިއަރ މެތިންސްކީ ވިދާޅުވީ، ޔޫކްރެއިންގެ ހުށަހެޅުންތައް ދިރާސާކޮށް، އެ ހުށަހެޅުންތަކާ ބެހޭ ރިޕޯޓް ރައީސް ވްލަޑިމިއަރ ޕޫޓިންއަށް ހުށަހަޅުއްވާނެ ކަމަށެވެ.

ޔޫކްރެއިންގެ ހުށަހެޅުންތަކަކީ ކައިވް ފާޅުގައި ގެނެސްދިން އެންމެ ތަފްސީލީ އަދި ކޮންކްރީޓް ހުށަހެޅުންތަކެވެ.

“މި މުހިންމު މާއްދާތައް އެއްފަސްކުރަން އަޅުގަނޑުމެންނަށް މަސައްކަތް ކުރެވިއްޖެނަމަ، އަދި އަޅުގަނޑުމެންނަށް މިއީ އެންމެ އަސާސީ ކަންތައް، ދެން ޔޫކްރެއިން އޮންނާނީ ހަގީގީ މާނައިގައި ނޮން-ބްލޮކް އަދި ނޮން-ނިއުކްލިއަރ ދައުލަތެއްގެ ގޮތުގައި ދާއިމީ ނިއުޓްރަލިޓީއެއްގެ ސިފައިގައި އެގައުމުގެ މިހާރުގެ ހާލަތު ރަނގަޅު ކުރެވޭނެ ހާލަތެއްގައި،” ޔޫކްރެއިންގެ ނެގޯޝިއޭޓަރު އޮލެކްސަންޑަރ ޗާލީ ވިދާޅުވި އެވެ.

“އަހަރެމެންގެ ބިމުގައި ބޭރުގެ އަސްކަރީ ބޭސްތައް ނުބޭއްވުމަށާއި، އަހަރެމެންގެ ބިމުގައި އަސްކަރީ ފައުޖުތައް ނުބޭތިއްބުމަށާއި، އަސްކަރީ-ސިޔާސީ އެލަޔަންސްތަކުގެ ތެރެއަށް ނުވަންނާނެ” ޒެލެންސްކީ ވިދާޅުވިއެވެ. އަސްކަރީ ތަމްރީނުތައް ކުރިއަށް ގެންދަން ވާނީ ގެރެންޓީ ދޭ ގައުމުތަކުގެ ރުހުމާ އެކު އެވެ.

ޔޫކްރެއިންގެ ނެގޯޝިއޭޓަރުން ބުނީ ޔޫކްރެއިންގެ ރައީސް ވޮލޮޑިމީރް ޒެލެންސްކީއާއި ރަޝިޔާގެ ރައީސް ވްލަޑިމިއަރ ޕޫޓިންއާ ދެމެދު ބައްދަލުވުމެއް ބޭއްވުމަށް ބޭނުންވާ މިންވަރަށް މެޓީރިއަލް އެބަހުރި ކަމަށެވެ.