އެމްޑީޕީގެ ރިޔާސީ ޓިކެޓަށް ޝާހިދު ކެމްޕޭން ފަށްޓަވައިފި: ނަޝީދުގެ ފެކްޝަނާ ބޮޑު ކުރިމަތިލުމަކަށް!
ކުރިއަށް އޮތް 2028 ވަނަ އަހަރުގެ ރިޔާސީ އިންތިޚާބުގައި އެމްޑީޕީގެ ރިޔާސީ ޓިކެޓް ހޯއްދެވުމަށްޓަކައި ކުރީގެ ފޮރިން މިނިސްޓަރު ޢަބްދުﷲ ޝާހިދު ރަސްމީކޮށް ކެމްޕޭން ފަށްޓަވައިފިއެވެ. މި ހަރަކާތާއެކު، ޕާޓީގެ އެތެރޭގެ މަސްލަހަތު ހޫނުވެ، ކުރީގެ ރައީސް މުޙައްމަދު ނަޝީދުގެ ފެކްޝަނާއި ޝާހިދާ ދެމެދު ބޮޑު ސިޔާސީ ކުރިމަތިލުމަކަށް ދާނެކަމުގެ ނިޝާންތައް ފެންނަން ފަށާފިއެވެ.
ޝާހިދުގެ ކެމްޕޭންގެ ފުރަތަމަ ހަރަކާތެއްގެ ގޮތުން ރޭގެ ވަގުތެއްގައި ވަނީ އެމްޑީޕީގެ މެދު ހެންވޭރު ދާއިރާގެ ބައެއް މެންބަރުންނާ ބައްދަލުކުރައްވައި، މާލޭގެ ރައްޔިތުންނަށް ދިމާވެފައިވާ އެކި ތަކުލީފުތަކާ ގުޅޭގޮތުން މަޝްވަރާ ކުރައްވާފައެވެ. މި ބައްދަލުވުމުގެ ވީޑިއޯއަކާއެކު އެކްސްގައި ކުރެއްވި ޕޯސްޓެއްގައި ޝާހިދު ވިދާޅުވީ، މާލޭގެ މައްސަލަތަކަށް އޮތް ހަމައެކަނި ދާއިމީ ހައްލަކީ އެމްޑީޕީގެ ސަރުކާރެއް އަލުން ގާއިމުވެ، ޕާޓީގެ ފަލްސަފާ ހިންގުން ކަމަށެވެ.
އދ. ގެ 76 ވަނަ އާންމު މަޖިލީހުގެ ރައީސްކަން ކުރައްވައި ބައިނަލްއަގުވާމީ މައިދާނުގައި ބޮޑު ކާމިޔާބީއެއް ހޯއްދަވާފައިވާ ޝާހިދަށް، ފާއިތުވި އެމްޑީޕީ ސަރުކާރުގައި ރާއްޖޭގެ ފޮރިން މިނިސްޓަރުކަން “ޕާޓް-ޓައިމް” ކޮށް ކުރެއްވި ކަމަށް ބުނެ ގިނަ ފާޑުކިޔުންތަކެއް ވަނީ އަމާޒުވެފައެވެ. ނަމަވެސް، މި ފާޑުކިޔުންތަކާއެކުވެސް އޭނާ ވަނީ މިހާރުވެސް ރާއްޖޭގެ 80 އަށްވުރެ ގިނަ ރަށެއްގައި ކެމްޕޭން ޓީމުތައް އެކުލަވާލައްވައި، އައްޑޫ ސިޓީގެ މަޖިލީސް މެންބަރުން ކަމަށްވާ ނާޒިލް އާއި ދީދީގެ ތާއީދު ކަށަވަރު ކުރައްވާފައެވެ.
އަނެއްކޮޅުން، ސިޔާސީ މަސްރަހުން އެނގޭ ގޮތުގައި ރައީސް ނަޝީދު ބޭނުންފުޅުވަނީ 2028 ގެ އިންތިޚާބަށް އެމްޑީޕީގެ ފަރާތުން ކުރީގެ އިގްތިސާދީ ވަޒީރު ފައްޔާޒު އިސްމާޢީލް ނެރުއްވުމަށެވެ. ނަޝީދުގެ ތާއީދު ފައްޔާޒަށް އޮތް ދަނޑިވަޅެއްގައި، ޝާހިދު ވަކިން ކެމްޕޭން ވަރުގަދަކުރައްވަން ފެއްޓެވުމަކީ ޕާޓީގެ ތެރޭގައި ދެ ބާރެއް އުފެދި، ރައީސް ޑރ. މުޢިއްޒުގެ ސަރުކާރާ ދެކޮޅަށް އިދިކޮޅު ވަރުގަދަ ބާރެއްގެ ގޮތުގައި އޮންނަންޖެހޭ އެމްޑީޕީ އިތުރަށް ބަލިކަށިވެ، ބޮޑު ކޯޅުމަކަށް މަގުފަހިވާނެ ކަމެއް ކަމަށް ސިޔާސީ ދިރާސާކުރާ ފަރާތްތަކުން ދެކެއެވެ.
