ރައީސް މުއިއްޒު ވަކިކުރަން މަޖިލީހަށް ހުށަހަޅައިފިނަމަ ވޯޓަށް އެހުން ނޫން ގޮތެއް ނޯންނާނެ: ނަޝީދު

ރައްޔިތުންގެ މަޖިލީހުގެ ތިންބައިކުޅަ އެއްބައި މެންބަރުންގެ ސޮޔާއެކު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މަގާމުން ވަކިކުރުމުގެ މައްސަލައެއް ހުށަހަޅައިފިނަމަ، އެކަމަށް ވޯޓަށް އެހުން ނޫން އެހެން އެއްވެސް އިޚުތިޔާރެއް މަޖިލީހުގެ ރިޔާސަތަށް ނޯންނާނެ ކަމަށް ވިދާޅުވެ ކުރީގެ ރައީސް މުޙައްމަދު ނަޝީދު، މަޖިލީހުގެ ރައީސް ޢަބްދުއްރަޙީމް ޢަބްދުاللهއަށް ވަރުގަދަ ރައްދެއް ދެއްވައިފިއެވެ.

ނަޝީދު މިހެން ވިދާޅުވީ، މަޖިލީހުގެ ތެރެއިން ރައީސް މުއިއްޒުގެ އިތުބާރު ނެތްކަމުގެ ވޯޓެއް ނެގުމުގެ އެއްވެސް ފުރުސަތެއް ސަރުކާރު ހިންގާ ޕާޓީން ނުދޭނެ ކަމަށް ޢަބްދުއްރަޙީމް ރޭ އައްޑޫ ސިޓީގައި ވިދާޅުވުމާ ގުޅިގެންނެވެ.

އެކްސްގައި ކުރެއްވި ޕޯސްޓެއްގައި ރައީސް ނަޝީދު ވިދާޅުވީ، ގާނޫނުއަސާސީގައި ކަނޑައެޅިގެން ބަޔާންކޮށްފައިވާ މިފަދަ މާއްދާތަކަށް އަމަލުކުރުމަކީ ވަކި މީހެއްގެ މައްޗަށް ބާރު ހިނގާ ކަމެއް ނޫން ކަމަށާއި، އެއީ ދިވެހިރާއްޖޭގެ މައިގަނޑު ގާނޫނީ އަސާސް ކަމަށެވެ. މީގެ އިތުރުން، މި އަހަރު ނިމުމުގެ ކުރިން ރައީސް މުއިއްޒު ވެރިކަމުން ދުރުކުރައްވާނެ ކަމުގެ އިޝާރާތްތަކެއް ނަޝީދު މީގެ ކުރިން ވެސް ވަނީ ތަކުރާރުކޮށް ދެއްވާފައެވެ.

މި ސިޔާސީ ހޫނުގަނޑުގެ ތެރެއިން ނަޝީދު އިތުރަށް ތުހުމަތު ކުރެއްވި ގޮތުގައި، މަޖިލީހުގެ ނައިބު ރައީސް އަޙްމަދު ނާޒިމްގެ އިތުބާރު ނެތްކަމުގެ މައްސަލައެއް ޕީއެންސީގެ ޕާލަމެންޓަރީ ގްރޫޕުން ކުއްލިއަކަށް ހުށަހެޅީ ހަގީގަތްތަކެއް ފޮރުވުމަށެވެ. އެގޮތުން، ނާޒިމްއާއެކު ޕީއެންސީގެ 23 މެންބަރަކު ރައީސް މުއިއްޒުގެ އިތުބާރު ނެތްކަމުގެ މައްސަލައެއް ހުށަހެޅުމަށް މަސައްކަތް ކުރަމުންދާތީ، އެކަން ހުއްޓުވަން ޕާޓީން ފިޔަވަޅު އެޅީ ކަމަށް ނަޝީދު ވިދާޅުވިއެވެ.

ނަމަވެސް، ވެރިކަންކުރާ ޕީއެންސީން ވަނީ ނަޝީދުގެ މި ވާހަކަތައް މުޅިން ދޮގުކޮށްފައެވެ. އެ ޕާޓީން ހާމަކުރި ގޮތުގައި ނާޒިމް މަގާމުން ވަކިކުރަން ހުށަހެޅީ، އޭނާގެ މަގާމުގެ ނުފޫޒު ބޭނުންކޮށްގެން މަޖިލީސް ތެރޭގައި ފިތުނަ އުފައްދައި، މަސްލަހަތު ގެއްލުވާލަން އުޅޭތީއެވެ. މި ގަރާރުގައި ޕީއެންސީގެ 73 މެންބަރުން ވަނީ ސޮއިކުރައްވާފައެވެ.