ހައްޖުވެރިންނަށް ފެންވަރު ރަނގަޅު ހިދުމަތް ނުލިބުނީ ވެރިންގެ ފަރުވާކުޑަކަމުން: މެނޭޖިން ޑިރެކްޓަރ
އިސްލާމީ މުގައްދަސް ބިމަށް ޒިޔާރަތްކުރާ ދިވެހި ހައްޖުވެރިންނަށް މީގެ ކުރިން އެކަށީގެންވާ ފެންވަރުގެ ހިދުމަތްތަކެއް ނުލިބި އޮތީ، އޭރު ތިއްބެވި އިސްވެރިންގެ ފަރުވާކުޑަކަމުގެ ސަބަބުން ކަމަށް މޯލްޑިވްސް ހައްޖު ކޯޕަރޭޝަންގެ މެނޭޖިން ޑިރެކްޓަރު މުހައްމަދު ޝަކީލް ވިދާޅުވެއްޖެއެވެ.
ޝަކީލް މިހެން ވިދާޅުވީ، ރާއްޖެއިން ހައްޖަށްދާ މީހުންނަށް ދެމުންގެންދާ ހިދުމަތްތައް އިތުރަށް ހަރުދަނާކުރުމަށް ސަރުކާރުން ކުރަމުންދާ މަސައްކަތްތަކާ ގުޅޭގޮތުން ޕީއެސްއެމްގެ ރާއްޖެ މިއަދު ޕްރޮގްރާމުގައި ވާހަކަދައްކަވަމުންނެވެ. އޭނާ ފާހަގަކުރެއްވި ގޮތުގައި، މީގެ ކުރީގެ އަހަރުތަކުގައި ހައްޖުވެރިންނަށް ދިމާވި ދަތިތަކަކީ ހައްލުކުރެވެން ހުރި ކަންތައްތަކެއް ނަމަވެސް، އެކަންކަމަށް އޭރުގެ މެނޭޖްމަންޓުންނާއި ކަމާބެހޭ އިދާރާތަކުން ދޭންޖެހޭ ސަމާލުކަން ދީފައެއް ނުވެއެވެ.
ޝަކީލް ވިދާޅުވީ، ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުން ހައްޖުވެރިންގެ ކަންކަމަށް ހާއްސަ އިސްކަމެއް ދެއްވާ ކަމަށެވެ. އެގޮތުން، ހައްޖުވެރިންގެ ކެއިންބުއިމާއި، ތިބޭނެ ތަންތަނުގެ ފެންވަރު ރަނގަޅުކުރުމަށް ގިނަ ގުނަ މަސައްކަތްތަކެއް މިހާރު ކުރެވެމުންދާ ކަމަށް އޭނާ ވިދާޅުވިއެވެ.
“ކުރިން ފެނިގެންދިޔައީ ހައްޖުވެރިންނަށް ދޭންޖެހޭ ހިދުމަތްތަކާ މެދު އިސްވެރިން ފަރުވާކުޑަކޮށްލާފައި އޮތް މަންޒަރު. ނަމަވެސް މިހާރު މި ވަނީ އެ އުސޫލުތައް ބަދަލުކޮށް، ދިވެހި ހައްޖުވެރިންނަކީ އެންމެ ފުރިހަމަ ހިދުމަތް ލިބޭ ބަޔަކަށް ހެދުމަށް މަސައްކަތް ފެށިފައި،” ޝަކީލް ވިދާޅުވިއެވެ.
މީގެ އިތުރުން، މި އަހަރުގެ ހައްޖު އޮޕަރޭޝަންގައި ހައްޖު ކޯޕަރޭޝަނުން ކުރިން ދިމާވި ގޮންޖެހުންތައް ނައްތާލައި، ހައްޖުވެރިންނަށް ލުއިފަސޭހަ އިންތިޒާމުތަކެއް ހަމަޖައްސާފައިވާނެ ކަމުގެ ޔަގީންކަން ޝަކީލް ދެއްވިއެވެ. މި ބަދަލުތަކުގެ ބޭނުމަކީ ހައްޖުވެރިން އަޅުކަމަށް ހުސްވެގެން ތިބޭއިރު، އެމީހުންގެ އަސާސީ ހިދުމަތްތަކާ މެދު ކަންބޮޑުވާން ނުޖެހޭނެ ފަދަ މާހައުލެއް ގާއިމުކޮށްދިނުން ކަމަށްވެސް އޭނާ ފާހަގަކުރެއްވިއެވެ.
ރައީސް ޑރ. މުއިއްޒުގެ ޒައާމަތުގައި، ރާއްޖެއަށް ލިބޭ ހުރިހާ ހައްޖު ކޯޓާގެ ކަންކަން ހައްޖު ކޯޕަރޭޝަންގެ ދަށުން ކުރިއަށް ގެންދިއުމަށް ނިންމާފައިވަނީ ހިދުމަތުގެ ފެންވަރު އެއް ހަމައެއްގައި ހިފެހެއްޓުމަށެވެ. މިއީ ދިވެހި ހައްޖުވެރިންގެ މަސްލަހަތުގައި ސަރުކާރުން އެޅި މުހިންމު ފިޔަވަޅެއްގެ ގޮތުގައި ގިނަ ބަޔަކު ގަބޫލުކުރެއެވެ.
