އިޓަލީގެ އެންމެ ނުރައްކާތެރި މާފިއާ ބޮސް ހޯދާތާ 30 އަހަރު ފަހުން އަތުލައިގެންފި

އިޓަލީގެ ކަމާބެހޭ ފަރާތްތަކުން މިދިޔަ ހޯމަ ދުވަހު ވަނީ އެ ގައުމުގެ އެންމެ ނުރައްކާތެރި މާފިއާ ބޮސް މަޓިއޯ މެސީނާ ޑެނާރޯ ހޯދާތާ 30 އަހަރު ފަހުން އަތުލައިގަނެވިއްޖެކަމަށް އިއުލާނުކޮށްފައެވެ. ޑެނާރޯ ފިލައިގެން އުޅޭތާ 30 އަހަރަށް ވުރެ ގިނަ ދުވަސް ވެއްޖެއެވެ.

އޭނާ ހައްޔަރުކުރީ އިޓަލީގެ ފުލުހުންނާއި އެންޓި މާފިއާ ޕްރޮސެކިއުޓަރުން ގުޅިގެން ޑެނާރޯގެ ހަރަކާތްތައް އެތައް މަހެއް ވަންދެން ބަލަމުން ދަނިކޮށެވެ. އޭނާ އަތުލައިގަތީ ހުޅަނގު ސިސިލީގެ ކުޑަ އަވަށެއްގައި ހުންނަ ފާމްހައުސްއެއްގައި ފިލައިގެން އުޅެނިކޮށެވެ.

“ޑިއަބޮލިކް” ގެ ނަމުން ވެސް މަޝްހޫރުވެފައިވާ ޑެނާރޯ އަކީ ޓްރަޕާނީ ޕްރޮވިންސްގެ ކޯސާ ނޮސްޓްރާގެ ވެރިޔާ ކަމަށާއި ސިސިލިއަން މާފިއާގެ އެންމެ ބާރުގަދަ އަދި ނުރައްކާތެރި އެއް މެމްބަރެއްގެ ގޮތުގައި އޭނާ ފާހަގަ ކުރެވެއެވެ. އޭނާ ހޯދަމުން ދަނީ މީހުން މެރުމާއި މަކަރާއި ހީލަތުން ފައިސާ ހޯދުމާއި މަސްތުވާތަކެތީގެ ވިޔަފާރި ކުރުން ފަދަ ގިނަ ދައުވާތަކަކާ ގުޅިގެންނެވެ.

ޑެނާރޯ ހައްޔަރުކުރުމަކީ އިޓަލީގައި އޯގަނައިޒްޑް ކްރައިމްއާ ދެކޮޅަށް ކުރަމުންދާ މަސައްކަތަށް ލިބުނު ބޮޑު ކާމިޔާބީއެއްގެ ގޮތުގައި ގިނަ ބަޔަކު ދަނީ ސިފަކުރަމުންނެވެ. އިޓަލީގެ ދާޚިލީ ވަޒީރު ލޫސިއާނާ ލަމޯގޭސް ނެރުއްވި ބަޔާނެއްގައި ވިދާޅުވެފައިވަނީ މިއީ ސިސިލިއަން މާފިއާއަށް ލިބުނު ވަރަށް ބޮޑު ގެއްލުމެއް ކަމަށާއި ހުރިހާ ކުށްވެރިން އިންސާފުގެ ކުރިމައްޗަށް ގެނެސްގެން ނޫނީ އަރާމު ނުކުރާނެ ކަމުގެ ވަރުގަދަ މެސެޖެއް ދޭ  ކަމަށެވެ.

ޑެނާރޯ ހައްޔަރު ކުރުމަކީ  އިޓަލީގެ އަންޑަވޯލްޑްގައި ޒަމާނުއްސުރެ ބޮޑު ބާރެއްގެ ގޮތުގައި އޮތް ކޯސާ ނޯސްޓްރާ ރޫޅާލުމަށް އެޅުނު މުހިންމު ފިޔަވަޅެއްގެ ގޮތުގައި ވެސް ބެލެވެ އެވެ. އެ ގްރޫޕަކީ މީގެ ކުރިން ވެސް މީހުން މެރުމާއި ބޮމުގެ ހަމަލާތައް ދިނުމުގައި އިސްކޮށް ހަރަކާތްތެރިވާ ޖަމިއްޔާއެއް ކަމަށާއި އެ ޖަމިއްޔާގެ ނުފޫޒު އިޓަލީގެ ސިޔާސީ އަދި އިގްތިސާދީ މައިދާނުގައި ވަރަށް ބޮޑު ކަމަށް ބެލެވެ އެވެ.

ޑެނާރޯ މިހާރު ހުރީ ބަންދުގައި ކަމަށާއި ކުރިއަށް އޮތް ހަފުތާތަކުގެ ތެރޭގައި އޭނާގެ މައްޗަށް ޝަރީއަތް ހިންގޭނެ ކަމަށް ބެލެވެ އެވެ. އިޓަލީ ސަރުކާރުން ވަނީ އޭނާގެ ކުށުގެ އެންމެ ބޮޑު އަދަބު ހޯދަން މަސައްކަތް ކުރާނެ ކަމަށާއި އޭނާގެ މުދަލާއި އޭނާގެ ޖިނާއީ ނެޓްވޯކްގެ މުދާތައް ހިފެހެއްޓުމަށް މަސައްކަތް ކުރާނެ ކަމަށް ބުނެފަ އެވެ.

މި ހައްޔަރުކުރުމަކީ އިޓަލީގެ ކަމާބެހޭ ފަރާތްތަކަށް ލިބުނު ވަރަށް ބޮޑު ކާމިޔާބީއެއް ކަމަށާއި ކުރިއަށް އޮތް ދުވަސްތަކާއި ހަފުތާތަކާއި މަސްތަކުގައި ސިސިލިއަން މާފިއާ އާއި އެ ޖަމާއަތުގެ އޮޕަރޭޝަންތަކަށް ވަރަށް ބޮޑު އަސަރެއް ކުރާނެ ކަމަށް ބެލެވޭ ކަމަށް ކަމާބެހޭ ފަރާތްތަކުން ހާމަކުރައްވައެވެ.