އިމިގްރޭޝަންގެ ކުރީގެ ކޮންޓްރޯލާ ޝައްމާނުގެ ޖިނާއީ މައްސަލައިގެ ނިޔާ މާދަމާ ކަނޑައަޅަނީ
ދައުލަތުން އުފުލާފައިވާ ބޮޑެތި ޖިނާއީ ދައުވާތަކަކާ ގުޅިގެން، އިމިގްރޭޝަންސްގެ ކުރީގެ ކޮންޓްރޯލާ ޖެނެރަލް މުހައްމަދު ޝައްމާން ވަހީދުގެ މައްޗަށް ހުކުމް ކުރުމުގެ ފަހުގެ އަޑުއެހުން މާދަމާ ހަވީރު 4:00 އަށް ކްރިމިނަލް ކޯޓުގައި ތާވަލުކޮށްފިއެވެ.
މީގެކުރިން އޭނާގެ ފަރާތުން އެދިގެން ހުކުމް އިއްވުން ފަސްކޮށްފައި އޮތުމަށްފަހު، މާދަމާގެ ބައްދަލުވުމުގައި ކޯޓުން ގޮތެއް ނިންމާނީ އޭނާގެ މައްޗަށް ތުހުމަތުކުރެވޭ ފޭރުމާއި، މަގާމުގެ ނުފޫޒު ނަހަމަގޮތުގައި ބޭނުންކުރުމުގެ އިތުރުން މަނީ ލޯންޑްރިންގެ މައްސަލައިގައެވެ. ނަމަވެސް ޝައްމާން ވަނީ ފެށުނީއްސުރެ މި ހުރިހާ ތުހުމަތުތަކަކަށް މުޅިން އިންކާރުކޮށް، މިއީ ހަގީގަތާ ޚިލާފު ދައުވާތަކެއް ކަމަށް ބުނެފައެވެ.
ޝައްމާންގެ މައްޗަށް ދައުލަތުން ކުރާ އެންމެ ބޮޑު އެއް ތުހުމަތަކީ ބިދޭސީއެއްގެ އަތުން ބައި މިލިއަން ރުފިޔާ ފޭރުނު ކަމަށް ބުނާ މައްސަލައެވެ. ފުލުހުންގެ ތަހުގީގާ ހަވާލާދީ ދައުވާގައި ބަޔާންކޮށްފައިވާ ގޮތުގައި، އެ ފައިސާގެ ތެރެއިން ބައެއް އޭނާ އަމިއްލަ ބޭނުންތަކަށް ހޭދަކޮށްފައިވާއިރު، ބާކީ ބައި ބޭނުންކޮށްފައިވަނީ އޭނާ ނަގާފައިވާ ސްޓޫޑަންޓް ލޯނެއް ދެއްކުމަށެވެ. އިމިގްރޭޝަންގެ އެންމެ މަތީ ވެރިޔާގެ މަގާމުގައި ހުންނަވަނިކޮށް އޭނާ ހައްޔަރުކުރީ، ރާއްޖޭގައި އުޅޭ ބިދޭސީންގެ އަތުން ރިޝްވަތުގެ ގޮތުގައި ފައިސާ އަތުލުމަށްފަހު އެމީހުން ބަންދުން ދޫކޮށްލާ ކަމުގެ ތުހުމަތުގައެވެ.
މި މައްސަލައިގެ ހެކިބަސް ނެގުމުގެ މަރުހަލާގައި ޝައްމާންގެ ދިފާއުގައި އޭނާގެ މަންމައާއި ބައްޕަގެ އިތުރުން އަންހެނުން ވެސް ވަނީ ކޯޓުގައި ބަޔާން ދީފައެވެ. އާއިލާގެ މެންބަރުން ހެއްކެއްގެ ގޮތުގައި ހުށަހެޅީ ޝައްމާންގެ ސްޓޫޑަންޓް ލޯނަށް ފައިސާ ދެއްކީ އޭނާގެ ބައްޕަ ދިން ހަލާލު ފައިސާއިންކަން ސާބިތުކޮށްދިނުމަށެވެ. މި މައްސަލައިގައި ޝައްމާނާއެކު ހައްޔަރުކުރި ބައެއް މީހުން ދައުލަތާއެކު އިއުތިރާފުގެ އެއްބަސްވުން ހަދައި ލުއި އަދަބުތަކެއް ހޯދާފައިވާއިރު، ޝައްމާން ވަނީ ގިނަ ދުވަސްތަކެއް ވަންދެން “ވާނުވާ” ބަންދުގައި ހުރުމަށްފަހު މިދިޔަ އަހަރުގެ ޑިސެމްބަރު މަހު މިނިވަންވެފައެވެ. ބަންދުން ދޫކޮށްލި ފަހުން އޭނާ ގެންދަނީ ސަރުކާރުގެ ސިޔާސަތުތަކަށް ސޯޝަލް މީޑިއާގައާއި އެކި މަންސަ ތަކުގައި ވަރަށް ބޮޑަށް ފާޑުކިޔަމުންނެވެ.
