ކައުންސިލް އިންތިޚާބާއެކު ރިފަރެންޑަމް ބޭއްވޭނީ މިމަހުގެ 18 ގެ ކުރިން ގާނޫނީ މަރުހަލާ ނިންމައިގެން: އީސީ
ރިޔާސީ އިންތިޚާބާއި މަޖިލިސް އިންތިޚާބު އެއްކޮށްލުމާ މެދު ރައްޔިތުންގެ ހިޔާލު ހޯދުމަށް ބާއްވާ ރިފަރެންޑަމް، ކުރިއަށް އޮތް ލޯކަލް ކައުންސިލް އިންތިޚާބާ އެކު ބޭއްވޭނީ މި މަހުގެ 18 ގެ ކުރިން ގާނޫނުއަސާސީއަށް ގެންނަ އިސްލާހުގެ މަސައްކަތް ނިންމައިގެން ކަމަށް އިލެކްޝަންސް ކޮމިޝަން (އީސީ) އިން މިއަދު ބުނެފިއެވެ.
ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީގައި ވާހަކަދައްކަވަމުން އީސީގެ ރައީސް މުޙައްމަދު ޒާހިދު ވިދާޅުވީ، ރިފަރެންޑަމްގެ ކުރިން ރައްޔިތުން ހޭލުންތެރިކުރުމަށް ގާނޫނުން ލާޒިމްކުރާ 45 ދުވަހުގެ މުއްދަތު ބޭނުންވާތީ، މި މަހުގެ 18 ވަނަ ދުވަހަކީ ހުރިހާ މަރުހަލާތަކެއް ނިންމަންޖެހޭ އެންމެ ފަހު ތާރީޚު ކަމަށެވެ.
ޒާހިދު ފާހަގަކުރެއްވި ގޮތުގައި، ކައުންސިލް އިންތިޚާބާ އެކު ރިފަރެންޑަމް ކުރިއަށް ގެންދިއުމަށް އިތުރަށް ޚަރަދުވާނީ ގާތްގަނޑަކަށް 20 މިލިއަން ރުފިޔާއެވެ. އެއީ ވޯޓު ކަރުދާސް ޗާޕުކުރުމާއި އޮފިޝަލުންގެ މަސައްކަތްތަކަށް ހިނގާނެ ޚަރަދުތަކެވެ. ނަމަވެސް، މި ވޯޓު ވަކިން އެހެން ތާރީޚެއްގައި ބާއްވާ ނަމަ 60 މިލިއަނާއި 80 މިލިއަން ރުފިޔާއާ ދެމެދުގެ އަދަދެއް ހޭދަވާނެ ކަމަށް އީސީން ލަފާކުރެއެވެ. އެހެންކަމުން، ދެ އިންތިޚާބު އެއްކޮށްލުމަކީ ދައުލަތުގެ ބަޖެޓުން ބޮޑު ހޭދައެއް ސަލާމަތްކުރެވޭނެ ކަމެއްކަން އޭނާ ފާހަގަކުރެއްވިއެވެ.
މިނިވަން މުއައްސަސާތަކުގެ ކޮމިޓީގައި ބޭއްވި މި ބައްދަލުވުމުގައި އެޓާނީ ޖެނެރަލް އަޙްމަދު އުޝާމް ވެސް ބައިވެރިވެވަޑައިގެން މަޝްވަރާ ކުރައްވާފައިވެއެވެ. މި ބައްދަލުވުމުގައި ރިފަރެންޑަމަށް ދޭ މުއްދަތާ ގުޅޭގޮތުން މެންބަރު މީކާއީލް ނަސީމް ކުރެއްވި ސުވާލުތަކަކާ ގުޅިގެން ކޮމިޓީގެ ތެރޭގައި ހޫނު ބަހުސްތަކެއް ހިނގާފައިވީ ނަމަވެސް، އީސީން ބުނީ ގާނޫނީ އޮނިގަނޑު އަވަހަށް ނިމިއްޖެ ނަމަ އިދާރީ ގޮތުން ކުރަންޖެހޭ ހުރިހާ ކަމަކަށް ކޮމިޝަން އޮތީ ތައްޔާރަށް ކަމަށެވެ.
