ތާޖް އެގްޒޯޓިކާ ރިސޯޓް ކައިރިން މުދާ އުފުލާ ބޯޓެއް ބަންޑުން ޖަހާލައި ދެމީހަކު ގެއްލިގެން ހޯދަނީ
މާލެ އަތޮޅު ތާޖް އެގްޒޯޓިކާ ރިސޯޓު ކައިރިން “ބަލްމާ-6” ނަމަކަށް ކިޔާ މުދާ އުފުލާ ބޯޓެއް ބަންޑުން ޖަހާލުމާއި ގުޅިގެން، އޭގައި ދަތުރުކުރި ދެ މީހަކު ގެއްލިގެން ހޯދުމުގެ މަސައްކަތް އެމްއެންޑީއެފް ކޯސްޓްގާޑުން މިއަދު ފަށައިފި އެވެ. މި ހާދިސާގައި ބޯޓުން ދަތުރުކުރި އަނެއް ދެ މީހުން ވަނީ ސަލާމަތް ކުރެވިފަ އެވެ.
އެމްއެންޑީއެފް އިން މައުލޫމާތު ދެއްވި ގޮތުގައި، “ބަލްމާ-6” ނަމަކަށް ކިޔާ އެ ބޯޓު ބަންޑުން ޖަހާލި ސަރަހައްދުގައި އެމްއެންޑީއެފް މާލޭ އޭރިއާ ކޮމާންޑް ކޯސްޓްގާޑް ސެކަންޑް ސްކޮޑްރަން އާއި ކޯސްޓްގާޑް ޑައިވަރުންގެ ޓީމެއް ދަނީ ހަރަކާތްތެރިވަމުންނެވެ. ގެއްލިގެން ހޯދުމުގެ މި މަސައްކަތުގައި ސްޕީޑްބޯޓްތަކާއި އެހެނިހެން އުޅަނދުތައް ބޭނުންކުރެވެމުންދާ ކަމަށް ވެސް އެމްއެންޑީއެފް އިން ހާމަކުރެ އެވެ.
ބޯޓުން ޖުމްލަ ހަތަރު މީހުން ދަތުރުކުރިއިރު، އޭގެ ތެރެއިން ދެ މީހުން އެ ސަރަހައްދުން ދަތުރުކުރި ދޯންޏަކަށް ނަގާފައިވާ ކަމަށް އެމްއެންޑީއެފް އިން ބުނެފައިވެ އެވެ. ސަލާމަތް ކުރެވުނު މީހުންގެ ހާލު ރަނގަޅު ކަމަށް މައުލޫމާތު ލިބިފައިވާއިރު، އެ ދެ މީހުންނަށް ބޭނުންވާ އެހީތެރިކަން ދެމުންދާ ކަމަށް ވެސް ރިޕޯޓުކުރެ އެވެ.
މުދާ އުފުލާ އެ ބޯޓު ބަންޑުން ޖަހާލި ސަބަބެއް މިހާތަނަށް އެނގިފައެއް ނުވެ އެވެ. އޭގެއިތުރުން އެ ބޯޓުގައި ހުރީ ކޮން ކަހަލަ މުދަލެއްކަން ވެސް އަދި ސާފެއް ނުވެ އެވެ. ކަމާބެހޭ ފަރާތްތަކުން ދަނީ މި ހާދިސާއާ ގުޅޭގޮތުން ތަހުގީގު ކުރަމުންނެވެ.
ގެއްލިގެން ހޯދަމުންދާ ދެ މީހުންނަކީ ދިވެހިން ކަމެއް ނުވަތަ ބިދޭސީން ކަމެއް އަދި ހާމައެއް ނުކުރެ އެވެ. އެމްއެންޑީއެފް އިން ބުނީ، މިކަމާ ގުޅޭ އިތުރު މައުލޫމާތު ލިބިފައިވާ ފަހުން އާންމުކުރާނެ ކަމަށާއި، ހޯދުމުގެ މަސައްކަތް ހުއްޓުމެއްނެތި ކުރިއަށްދާނެ ކަމަށެވެ.
