ޔުނައިޓެޑްގެ ވަގުތީ ކޯޗު ބުނީ ބޭރުން އިވޭ އަޑުތަކަށް ސަމާލުކަން ނުދޭކަމަށް
މެންޗެސްޓާ ޔުނައިޓެޑްގެ ކޯޗުކަމާ ވަގުތީގޮތުން ހަވާލުވި މައިކަލް ކެރިކް ބުނީ، އެ ޓީމުގެ ކުރީގެ ކުޅުންތެރިން މިހާރުގެ ޓީމާ ބެހޭގޮތުން ދައްކާ ފާޑުކިއުންތަކަށް ސަމާލުކަން ނުދޭ ކަމަށެވެ.
ރުބެން އަމޮރިމް ވަކިކުރުމަށްފަހު، މި ސީޒަނުގެ ނިޔަލަށް ޓީމާ ހަވާލުވި ކެރިކް މިހެން ބުނީ މެންޗެސްޓާ ސިޓީއާ ދެކޮޅަށް ކުޅޭ މެޗުގެ ކުރިން ބޭއްވި ނޫސްވެރިންގެ ބައްދަލުވުމުގައެވެ.
ކެރިކް ފާހަގަކުރި ގޮތުގައި ކުރީގެ ކުޅުންތެރިން ކަމަށްވާ ގެރީ ނެވިލް އާއި ރޯއީ ކީން ފަދަ ފަރާތްތަކުން ދައްކާ ވާހަކަތަކުން އޭނާއަށް އެއްވެސް ޕްރެޝަރެއް ނެތެވެ. ޓީމުގައި ތިބީ ޕްރޮފެޝަނަލް ކުޅުންތެރިން ކަމަށްވާތީ، ބޭރުން އިވޭ އަޑުތަކަށް ފޯކަސް ނުގެއްލި މެޗުތަކަށް ތައްޔާރުވުމުގެ ގާބިލުކަން ކުޅުންތެރިންގެ ކިބައިގައި ހުންނާނެ ކަމަށް އޭނާ ބުންޏެވެ.
މި ސީޒަނުގެ ބާކީ އޮތް 17 މެޗުގައި ޔުނައިޓެޑް ގޮވައިގެން ކެރިކް ނުކުންނައިރު، އޭނާގެ އަމާޒަކީ އަންނަ ސީޒަނުގެ ޔޫރަޕްގެ މުބާރާތަކުން ޖާގަ ހޯދުމެވެ. ޔުނައިޓެޑް މިވަގުތު ތާވަލުގެ ހަތްވަނައިގައި އޮތް ނަމަވެސް، ކުރިއަށް އޮތް މެޗުތަކުން ރަނގަޅު ނަތީޖާއެއް ހޯދައި ތާވަލުގެ މަތީ މަގާމަކަށް ޖެހިލުމަކީ ޓީމަށް ލިބޭނެ ބޮޑު ކުރިއެރުމެއްކަމަށް ކެރިކް ގަބޫލުކުރެއެވެ.
