ވަންޕްލަސްގެ ސީއީއޯ ހައްޔަރުކުރަން ތައިވާނުން އަމުރުކޮށްފި

ޗައިނާގެ މަޝްހޫރު ސްމާޓްފޯން ކުންފުނި، ވަންޕްލަސް (OnePlus) ގެ ސީއީއޯ ޕީޓް ލާއު ހައްޔަރުކުރުމުގެ އަމުރެއް ތައިވާނުގެ ޕްރޮސެކިއުޓަރުން ނެރެފިއެވެ. ޕީޓް ލާއު ހައްޔަރުކުރަން އަމުރު ނެރުނީ ތައިވާނުގެ އިންޖިނިއަރުންތަކެއް ގަވާއިދާ ހިލާފަށް ވަޒީފާއަށް ނެގި ކަމަށް ތުހުމަތުކުރެވޭ މައްސަލައެއްގައެވެ.

ބްލޫމްބާގް އިން ރިޕޯޓްކޮށްފައިވާ ގޮތުގައި، ތައިވާނުގެ ޝީލިން ޑިސްޓްރިކްޓް ޕްރޮސެކިއުޓާސް އޮފީހުން ވަނީ ޕީޓް ލާއުއާ އެކު މަސައްކަތްކުރި ތައިވާނުގެ ދެ މީހެއްގެ މައްޗަށް ވެސް ދައުވާ އުފުލާފައެވެ. މި ދެމީހުން ވަނީ އެއްވެސް ހުއްދައަކާ ނުލައި ތައިވާނުގެ 70 އަށްވުރެ ގިނަ އިންޖިނިއަރުން ވަންޕްލަސްއަށް ރެކްރޫޓްކުރުމުގައި އެހީތެރިވެދީފައި ކަމަށް ތުހުމަތު ކުރެވެއެވެ.

މި މައްސަލައަކީ ތައިވާނުގެ ހައި-ޓެކް އަދި ސެމީކޮންޑަކްޓަރ ސިނާއަތުން ޗައިނާގެ ކުންފުނިތަކުން ކުޅަދާނަ މުވައްޒަފުން ގެންދާ މައްސަލައިގައި އެ ގައުމުން އަޅަމުންދާ ހަރުކަށި ފިޔަވަޅުތަކުގެ ތެރެއިން ފެންމަތިވި ކަމެކެވެ. ތައިވާނުގެ ކަމާބެހޭ ފަރާތްތަކުން ބުނާ ގޮތުގައި، ހުއްދަނެތި މިފަދަ ގޮތްގޮތަށް މުވައްޒަފުން ނެގުމަކީ ގައުމީ ސަލާމަތަށް އޮތް ނުރައްކަލެކެވެ.

ދައުވާގައި ބުނެފައިވަނީ މިއީ “އެކްޓް ގަވަރނިންގ ރިލޭޝަންސް ބިޓްވީން ދަ ޕީޕަލް އޮފް ދަ ތައިވާން އޭރިއާ އެންޑް ދަ މެއިންލޭންޑް އޭރިއާ” އާ ހިލާފު ކަމެއް ކަމަށެވެ. މި ގާނޫނުގެ ދަށުން، ޗައިނާގެ ކުންފުނިތަކަށް ތައިވާނުގައި އޮފީސް ހުޅުވައި މުވައްޒަފުން ނެގޭނީ ސަރުކާރުގެ ރަސްމީ ހުއްދަ ލިބިގެންނެވެ.

މި މައްސަލައާ ގުޅިގެން ވަންޕްލަސް އިން ނެރުނު ބަޔާނެއްގައި ބުނެފައިވަނީ ކުންފުނީގެ ވިޔަފާރި އާންމު ހާލަތެއްގައި ކުރިއަށްދާ ކަމަށާއި، މި ކަމުގެ ސަބަބުން ކުންފުނީގެ މަސައްކަތްތަކަށް ބުރޫ ނާރާނެ ކަމަށެވެ. ނަމަވެސް، ރެކްރޫޓްމަންޓާ ގުޅޭ ތުހުމަތުތަކަށް އެ ކުންފުނިން ސީދާ ޖަވާބެއް ދީފައެއް ނުވެއެވެ.

ތައިވާނުގެ އިންވެސްޓިގޭޝަން ބިއުރޯއިން ހާމަކޮށްފައިވާ ގޮތުގައި، 2020 ވަނަ އަހަރުން ފެށިގެން ޗައިނާގެ ކުންފުނިތަކުން ގަވާއިދާ ހިލާފަށް މުވައްޒަފުން ނެގި 100 އަށްވުރެ ގިނަ މައްސަލަ އެ ބިއުރޯއިން ދަނީ ތަހުގީގު ކުރަމުންނެވެ. ބައެއް ކުންފުނިތަކުން އެހެން ގައުމުތަކުގެ ނަމުގައި ފޭކު ކުންފުނިތައް ހަދައިގެން ތައިވާނުގެ ތަޖުރިބާކާރުން ހޯދަން މަސައްކަތްކުރާ ކަމަށްވެސް ރިޕޯޓްތައް ބުނެއެވެ.

ޕީޓް ލާއު އަކީ މީގެ ކުރިން އޮޕޯ (OPPO) ގެ ހާޑްވެއާ އިންޖިނިއަރެއްގެ ގޮތުގައި މަސައްކަތް ކުރެއްވުމަށްފަހު، 2013 ވަނަ އަހަރު ވަންޕްލަސް އުފެއްދެވި ބޭފުޅެކެވެ. އޭނާއާ އެކު ވަންޕްލަސް އުފެއްދުމުގައި ބައިވެރިވި ކާލް ޕޭ ވަނީ 2020 ގައި ކުންފުނިން ވަކިވެ، ‘ނަތިންގް’ (Nothing) ކުންފުނި އުފައްދާފައެވެ. އޮޕޯގެ ސަޕްލައި ޗެއިން ބޭނުންކުރި ނަމަވެސް، ޕީޓް ލާއު އަބަދުވެސް ބުނަމުން އައީ ވަންޕްލަސް އަކީ މިނިވަންކޮށް ހިންގާ ކުންފުންޏެއް ކަމަށެވެ.