ކުރީގެ މެންބަރު އަލީ ނިޔާޒުގެ ބަހުގެ ވަރުގަދަ ހަމަލާތަކެއް އަލީ އާޒިމްގެ ޓީމަށް

މާލޭގެ މޭޔަރު ކަމަށް އެމްޑީޕީގެ ޓިކެޓުގައި ވާދަކުރައްވާ އާދަމް އާޒިމްގެ ކެމްޕެއިން ޖަލްސާގައި ވާހަކަދައްކަވަމުން، ހުޅުމާލޭ ދާއިރާގެ ކުރީގެ މެންބަރު އަލީ ނިޔާޒް އާދަމް އާޒިމްގެ ވާދަވެރިޔާ އަލީ އާޒިމްގެ ޓީމަށް ބަހުގެ ވަރުގަދަ ހަމަލާތަކެއް ރައްދުކުރައްވާފިއެވެ.

ނިޔާޒް ވިދާޅުވީ ބައެއް ބޭފުޅުންގެ “ޕްލޭން ބީ” އެއް އޮތް ނަމަވެސް، އާދަމް އާޒިމްގެ ޕްލޭން އޭ އަދި ބީ އަކީ ވެސް އެމްޑީޕީ ކަމަށެވެ. މިއީ ރިޔާސީ އިންތިޚާބާ ދިމާކޮށް ޕާޓީ ދޫކޮށް ދިޔަ ބޭފުޅުންނަށް އިޝާރާތްކުރައްވައި އޭނާ ދެއްވި ރައްދެކެވެ.

ނިޔާޒް ފާހަގަކުރެއްވި ގޮތުގައި އެމްޑީޕީއަކީ ވަކި ލީޑަރެއްގެ ތާއީދަށް ބަރޯސާވެފައި އޮތް ޕާޓީއެއް ނޫން ކަމަށާއި، އެއީ އާ ލީޑަރުން އުފައްދާ ޕާޓީއެކެވެ. ޕްރައިމަރީން ވަކި ބޭފުޅަކު ބަލިވެއްޖެނަމަ 2028 ގެ އިންތިޚާބު ކާމިޔާބު ނުވާނެ ކަމަށް ބުނެ ދައްކާ ވާހަކަތަކަކީ ބަލައިގަނެވޭނެ ވާހަކަތަކެއް ނޫން ކަމަށްވެސް އޭނާ ވިދާޅުވިއެވެ. ކޮންމެ ނަތީޖާއެއް ނުކުތް ނަމަވެސް އާދަމް އާޒިމްގެ ޓީމުން ތިބޭނީ ސާބިތުކަމާއެކު “ތިލަފަތް” ދަމަހައްޓަން ކަމުގެ ޔަގީންކަން ނިޔާޒް ދެއްވިއެވެ.

ކެމްޕެއިން ތަޖުރިބާއަށް އަލިއަޅުވާލައްވަމުން ނިޔާޒް ވިދާޅުވީ، އާދަމް އާޒިމް ވަނީ އެމްޑީޕީގެ އާންމު މެންބަރުންގެ ލޯތްބާއި ތާއީދު ހޯއްދަވާފައި ކަމަށާއި، އަންނަ ހުކުރު ދުވަހު ބާއްވާ ޕްރައިމަރީ ބޮޑު ތަފާތަކުން އާޒިމް ކާމިޔާބު ކުރައްވާނެ ކަމީ ޝައްކެއް އޮތް ކަމެއް ނޫން ކަމަށެވެ.

މި ޕްރައިމަރީއަކީ އެމްޑީޕީގެ އެތެރޭގައި އޮތް ވާދަވެރިކަމެއް ފެނިގެންދާ ފޯރިގަދަ އިންތިޚާބެކެވެ.