ލޯނަށް ފައިސާ ނުދެއްކުމުން މާލޭގެ ގެއެއް ނީލަމުގައި ވިއްކާލަން އިއުލާނުކޮށްފި
މާލޭގެ ގެއެއް އިމާރާތް ކުރުމަށް ނެގި ފައިނޭންސް ފެސިލިޓީއަކަށް ފައިސާ ނުދެއްކުމުން، އެ ގެ ނީލަމުގައި ވިއްކާލަން މޯލްޑިވްސް އިސްލާމިކް ބޭންކް (އެމްއައިބީ) އިން އިއުލާނުކޮށްފި އެވެ. މި ނީލަން ކުރިއަށްދާނީ މިދިޔަ އަހަރުގެ ނޮވެމްބަރު މަހު ސިވިލް ކޯޓުން ކުރި ހުކުމާ އެއްގޮތަށެވެ. މއ. ކުދިމަގޫގެ ވިއްކާލަނީ 2012 ވަނަ އަހަރު ނެގި 2.6 މިލިއަން ރުފިޔާގެ ކޮންސްޓްރަކްޝަން ފައިނޭންސިން ފެސިލިޓީއެއްގެ ދަށުން ދައްކަންޖެހޭ ފައިސާ ކަނޑައަޅާފައިވާ މުއްދަތުގައި ނުދެއްކުމުގެ ސަބަބުންނެވެ.
އެމްއައިބީގެ އިއުލާނުގައިވާ ގޮތުން، މި ނީލަމުގައި ވިއްކާލަނީ މއ. ކުދިމަގޫގެ އެވެ. މި ގެ ރަހުނުކޮށްފައިވަނީ 2012 ވަނަ އަހަރު އެ ބޭންކުން ނެގި 2.6 މިލިއަން ރުފިޔާގެ ކޮންސްޓްރަކްޝަން ފައިނޭންސް ފެސިލިޓީއަކާ ގުޅިގެންނެވެ. ފައިސާ ނުދެއްކުމުގެ ސަބަބުން މިދިޔަ އަހަރުގެ ނޮވެމްބަރު މަހު ސިވިލް ކޯޓުން ކުރި ހުކުމާ އެއްގޮތަށް އެ ގެ ނީލަމަށް ހުށަހަޅާފައިވަނީ އެވެ.
އެ ގެ ވިއްކާލުމަށް ނީލަން ފެށޭ އަގަކީ 12.6 މިލިއަން ރުފިޔާ އެވެ. ނީލަމަށް އަގު ހުށަހެޅުމުގެ ފުރުސަތު މިއަދުން ފެށިގެން މި މަހުގެ 26 ވަނަ ދުވަހާ ހަމައަށް ހުޅުވާލާފައިވާއިރު، ބިޑަށް ހުޅުވާލާނީ މި މަހުގެ 26 ވަނަ ދުވަހުގެ މެންދުރު 1 ޖަހާއިރު އެމްއައިބީގެ ހެޑް އޮފީހުގެ ތިންވަނަ ފްލޯގަ އެވެ. އެދުވަހު، ހާޒިރުވި މީހުންގެ ކުރިމަތީގައި އަގު ހުށަހަޅާފައިވާ ސިޓީތައް ކަނޑާނެ އެވެ.
އެމްއައިބީއިން ހާމަކުރި ގޮތުގައި، ހުށަހަޅާ އެންމެ މަތީ އަގަކީ ނީލަން ފަށާނެ އަގު ކަމުގައި ވިޔަސް، އެ އަގަށް ވުރެ ބޮޑު އަގެއް އެދުވަހު ހުށަހެޅުމުގެ ފުރުސަތު ވެސް ލިބޭނެ އެވެ. ކުރިން އަގު ހުށަހެޅި ފަރާތްތަކުގެ އިތުރުން، އެދުވަހު އަލަށް އަގު ހުށަހަޅަން ބޭނުންވާ ފަރާތްތަކަށް ވެސް މި ފުރުސަތު އޮންނާނެ އެވެ. އަގު ހުށަހަޅާއިރު މަދުވެގެން 500،000 ރުފިޔާއަށް ވުރެ ބޮޑު އަދަދެއް އިތުރަށް ހުށަހަޅަން ޖެހޭނެ ކަމަށް ބޭންކުން ބުނެ އެވެ.
ނީލަމުގައި އަގު އިތުރުކުރަން ހާޒިރުވި މީހުން ބޭނުންނުވާނަމަ އެ ހިސާބުން ނީލަން ނިންމާލާނެ އެވެ. ނީލަން ކާމިޔާބު ކުރާ ފަރާތުން އެ ބޭންކުން އަންގާ މުއްދަތުގެ ތެރޭގައި ހުށަހެޅި އަގަށްވާ ފައިސާ ދައްކަން ޖެހޭނެ އެވެ. ފައިސާ ނުދައްކައިފި ނަމަ އެ ހުށަހެޅުން ބާތިލް ކުރުމަށް ފަހު، ދެން އެންމެ ބޮޑު އަގެއް ހުށަހެޅި ފަރާތަކަށް އެތަން ވިއްކާލެވޭނެ އިންތިޒާމު ވަނީ ހަމަޖައްސާފަ އެވެ.
މި ނީލަމުގައި ބައިވެރިވުމަށް ބިޑް ސެކިއުރިޓީއެއްގެ ގޮތުގައި އެއް ލައްކަ ރުފިޔާ (100,000ރ.) ހުށަހަޅަން ޖެހޭނެ އެވެ. ބިޑް ސެކިއުރިޓީ ދައްކާ ފަރާތްތަކަށް އެކަނި މި ނީލަމުގައި ބައިވެރިވެވޭނެ ކަމަށް އެމްއައިބީ އިން ބުނެ އެވެ.
