އިސްރާއީލުން ޣައްޒާ އެއްކޮށް ހިފަން އުޅޭ ވާހަކަ ޓްރަމްޕް ދޮގެއް ނުކުރި
އިސްރާއީލުން މުޅި ޣައްޒާ އިސްތިޢުމާރުކުރަން ރާވަމުން އަންނަ ކަމަށް ދެކެވޭ ވާހަކަތައް އެމެރިކާގެ ރައީސް ޑޮނަލްޑް ޓްރަމްޕް ދޮގުކުރައްވާފައެއް ނުވެއެވެ.
ނޫސްވެރިޔަކު މިކަމާ ގުޅޭ ގޮތުން ސީދާ ސުވާލު ކުރުމުން، އެކަމަށް ޖަވާބު ދެއްވުމުގެ ބަދަލުގައި ޓްރަމްޕް ވިދާޅުވީ، މިވަގުތު އެންމެ މުހިންމީ ބަނޑުހައިހޫނުކަމުގައި ތިބި ޣައްޒާގެ ރައްޔިތުންނަށް ކާބޯތަކެތި ފޯރުކޮށްދިނުން ކަމަށެވެ.
މި ހަފުތާގެ ތެރޭގައި ނޫސްތަކުން ވަނީ އިސްރާއީލުގެ ބޮޑުވަޒީރު ބެންޖަމިން ނަތަންޔާހޫއާ ހަވާލާދީ، ޣައްޒާއަށް އަރައިގަނެ އެ ސަރަޙައްދު އެއްކޮށް އިސްތިޢުމާރު ކުރުމަށް ސިފައިންނަށް އަމުރުކުރެއްވި ކަމުގެ ޚަބަރުތައް ފަތުރާފައެވެ.
ނަތަންޔާހޫ ބުނި ކަމަށް ރިޕޯޓުކޮށްފައިވާ ގޮތުގައި، މި ނިންމުމަކީ ރައީސް ޓްރަމްޕްގެ ރުހުމާއި ތާއީދު ވެސް ލިބިގެން ނިންމި ނިންމުމެކެވެ.
އެއާއެކު، އިސްރާއީލުގެ ބައެއް ނޫސްތަކުން ވަނީ ޣައްޒާގައި ބޭނުން ކޮންމެ ފިޔަވަޅެއް އެޅުމުގެ ‘ފެހި ބައްތި’ އެމެރިކާ ސަރުކާރުން އިސްރާއީލަށް ދީފައިވާ ކަމަށް ވެސް ބުނެފައެވެ.
ނަމަވެސް، އިސްތިޢުމާރުގެ ވާހަކަތަކަށް އަލިއަޅުއްވާލެއްވުމެއް ނެތި، ޓްރަމްޕް ވަނީ އެމެރިކާގެ އެންމެ އިސް އެޖެންޑާއަކީ ޣައްޒާއަށް ކާބޯތަކެތި ފޯރުކޮށްދިނުން ކަމަށް ތަކުރާރުކުރައްވާފައެވެ. އޭނާ ވިދާޅުވީ، ކާނާ ނެތިގެން އެތައް ބަޔަކު މަރުވަމުންދާ ވާހަކަ ރަނގަޅަށް ބަލައި، މެދުއިރުމަތީގެ ޤައުމުތަކާ ގުޅިގެން އެހީ ފޯރުކޮށްދިނުމަށް އެމެރިކާ މަސައްކަތް ކުރަމުން އަންނަ ކަމަށެވެ.
އިސްރާއީލުން މުޅި ޣައްޒާ އިސްތިޢުމާރު ކުރުމުގެ ވާހަކަތައް ފެންމަތިވެފައި މިވަނީ، މިދިޔަ އަހަރުގެ އޮކްޓޯބަރު މަހުގެ 7 ވަނަ ދުވަހު ޙަމާސްއިން އިސްރާއީލަށް ދިން ހަމަލާއަށްފަހު، އިސްރާއީލުން ޣައްޒާއަށް ދެމުންގެންދާ އަސްކަރީ ހަމަލާތައް މަސްތަކަކަށް ދިގުލައިގެން ގޮސްފައިވާ ދަނޑިވަޅެއްގައެވެ.
މި ހަމަލާތަކުގެ ސަބަބުން ޣައްޒާގެ ވަރަށް ބޮޑު ބައެއް ވަނީ ސުންނާފަތިވެ، މިލިއަނަކަށްވުރެ ގިނަ މީހުން ގެދޮރު ގެއްލިފައިވެއެވެ. އަދި ބައިނަލްއަޤްވާމީ އެހީދޭ ޖަމާޢަތްތަކުން ދަނީ ކާބޯތަކެތީގެ ދަތިކަން އިންތިހާއަށް ގޮސް، ބަނޑުހައިހޫނުކަމުގެ ކާރިސާއެއް ކުރިމަތިވެފައިވާ ކަމުގެ އިންޒާރު ތަކުރާރުކޮށް ދެމުންނެވެ.
ހަނގުރާމަ ހުއްޓާލުމަށް ބައިނަލްއަޤްވާމީ ފިއްތުންތައް އިތުރުވަމުން އަންނަ އިރު، އެމެރިކާއަކީ އަބަދުވެސް އިސްރާއީލަށް އަސްކަރީ އަދި ސިޔާސީ ގޮތުން އެންމެ ބޮޑު ތާއީދެއް ދެމުން އަންނަ ޤައުމެވެ.
