ނޫސްވެރިކަމުގެ މިނިވަންކަމާއި ރައްކާތެރިކަން ކަށަވަރުކޮށްދިނުމަކީ ސަރުކާރުގެ އެންމެ އިސް ސިޔާސަތު: ރައީސް މުޢިއްޒު
ދިވެހި ނޫސްވެރިންނަށް ބިރުވެރިކަމެއް ނެތް، އަމާން އަދި ފަހި މާހައުލެއް ބިނާކޮށްދިނުމަކީ މި ސަރުކާރުން އެންމެ އިސްކަންދޭ އެއް މަޞްލަޙަތު ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ދުނިޔޭގެ ނޫސްވެރިކަމުގެ މިނިވަންކަމުގެ ދުވަހުގެ މުނާސަބަތުގައި ފޮނުއްވި ޚިޠާބުގައި ރައީސް ވިދާޅުވީ، ނޫސްވެރިކަމަކީ ދައުލަތުގެ “ހަތަރުވަނަ ބާރު” ކަމަށާއި، ޒިންމާދާރު ނޫސްވެރިކަމުގެ ސަބަބުން ރައްޔިތުން ބާރުވެރިވެ، ހާމަކަންބޮޑު ޑިމޮކްރެޓިކް ވެށްޓެއް ކަށަވަރުވެގެންދާނެ ކަމަށެވެ.
ރައީސްގެ ޚިޠާބުގައި އިސްލާމްދީނުގެ މަތިވެރި އުޞޫލުތަކުގެ ތެރެއިން ޚިޔާލުފާޅުކުރުމުގެ މިނިވަންކަމަށް ދީފައިވާ އަހައްމިއްޔަތު ފާހަގަކުރައްވައި، އަޚުލާޤީ މިންގަނޑުތަކާއި މުޖުތަމަޢުގެ މަޞްލަޙަތަށް ބޯލެނބުމަށް އިލްތިމާސްކުރެއްވިއެވެ. އަދި ދުނިޔޭގެ އެކި ކަންކޮޅުތަކުގައި ނޫސްވެރިންނަށް ދޭ ހަމަލާތަކާއި ހިންގާ ޖަރީމާތައް ކުށްވެރިކުރައްވައި، ޒަމާނީ ޓެކްނޮލޮޖީގެ އެހީގައި ފަތުރާ ދޮގު މަޢުލޫމާތާއި “ޑީޕް ފޭކް” ފަދަ ނުރައްކާތަކަށް ސަމާލުވުމަށް އެމަނިކުފާނު ގޮވާލެއްވިއެވެ. މީޑިއާގެ ދާއިރާ ތަރައްޤީކޮށް، ނޫސްވެރިންނަށް މާލީ މިނިވަންކަން ހޯދައިދިނުމަށްޓަކައި ދައުލަތުގެ ބަޖެޓުން ވަކި އިންސައްތައެއް ދިނުމަށް ނިންމާފައިވާކަން ރައީސް ހާމަކުރެއްވިއެވެ. މީގެ އިތުރުން، ނޫސްވެރިންނަށް ޚާއްޞަ “މީޑިއާ ވިލެޖެއް” ދާދި އަވަހަށް ޤާއިމުކުރައްވާނެ ކަމަށާއި، ސަރުކާރު ޒިންމާދާރުކުރުވުމަށް ކުރެވޭ ބިނާކުރުވަނިވި ފާޑުކިޔުންތަކަށް އަބަދުވެސް މަރުޙަބާ ކިޔާނެކަމުގެ ޔަޤީންކަން ރައީސް ޑރ. މުޢިއްޒު ދެއްވިއެވެ.
