ޓީބީ ނައްތާލުމުގައި ރާއްޖެ ހޯދަމުންދާ ކާމިޔާބީއަކީ ލިބޭ ފަޚުރެއް: ރައީސް މުއިއްޒު

ދުނިޔޭގެ އެހެން ގައުމުތަކާ އަޅާބަލާއިރު ރާއްޖެއަކީ ޓީބީ ބަލީގެ ނިސްބަތް މަދު ގައުމެއްގެ ގޮތުގައި އޮތުމަކީ ފަޚުރުވެރިވާ ކަމެއް ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.

ދުނިޔޭގެ ޓީބީ ދުވަހާ ގުޅިގެން ސޯޝަލް މީޑިއާ މެދުވެރިކުރައްވައި މިއަދު ދެއްވި މެސެޖެއްގައި، ރައީސް ފާހަގަކުރެއްވި ގޮތުގައި، ޓީބީއަކީ ފަރުވާކޮށްގެން ރަނގަޅުކުރެވޭ ބައްޔަކަށް ވީނަމަވެސް، މި ބަލި މުޅިން ނައްތާލުމަށްޓަކައި ހަރުދަނާ ޞިއްޙީ ނިޒާމެއް ބިނާކުރުމާއި ބަލި އަވަހަށް ދެނެގަތުމުގައި މުޖުތަމައުގެ ފަރުދުންގެ ބައިވެރިވުން އިތުރުކުރުމަކީ ނުހަނު ބޭނުންތެރި ކަމެކެވެ.

ރާއްޖޭގައި ޓީބީ ބަލި ދެނެގަތުމުގެ ނިޒާމު ހަރުދަނާކޮށް، ބޭނުންވާ ޓެސްޓުތަކާއި ފަރުވާ ފަސޭހައިން ލިބޭނެ މަގު ތަނަވަސްކުރުމަށް ސަރުކާރުން ގިނަގުނަ މަސައްކަތްތަކެއް ކުރަމުންދާކަން ރައީސް ފާހަގަކުރެއްވިއެވެ. އެމަނިކުފާނު އިތުރަށް ވިދާޅުވީ، ޓީބީން ސަލާމަތްވެފައިވާ މުސްތަގުބަލަކަށް ވާސިލުވުމަށްޓަކައި ޞިއްޙީ ޚިދުމަތްތެރިންނާއި އާންމު ރައްޔިތުން ގުޅިގެން މަސައްކަތްކުރުމުގެ އަޒުމް އާކުރަންޖެހޭ ކަމަށެވެ. މީގެ އިތުރުން، ބަލީގެ ނުރައްކާ ބޮޑު މީހުންނަށް ބޭނުންވާ ޚާއްޞަ އަޅާލުން ފޯރުކޮށްދިނުމަށްވެސް ރައީސް ބާރުއެޅުއްވިއެވެ.

ކޮންމެ އަހަރެއްގެ މާރިޗު 24 ވަނަ ދުވަހު ފާހަގަކުރާ ދުނިޔޭގެ ޓީބީ ދުވަހަކީ މި ބަލިން ރައްކާތެރިވުމަށް ހޭލުންތެރިކަން އިތުރުކުރުމަށް ކަނޑައަޅާފައިވާ ދުވަހެކެވެ.