އެމްޑީޕީގެ މޭޔަރު ޓިކެޓަށް “ދެ އާޒިމު” ގެ ވަރުގަދަ ކުރިމަތިލުމެއް މާދަމާ

އެމްޑީޕީގެ މޭޔަރު ޓިކެޓަށް “ދެ އާޒިމު” ގެ ވަރުގަދަ ކުރިމަތިލުމެއް މާދަމާ އޮންނާނެއެވެ.

އިދިކޮޅު އެންމެ ބޮޑު ސިޔާސީ ޕާޓީ، އެމްޑީޕީގެ ތެރޭގައި އުފެދުނު ބައިބައިވުންތަކަށްފަހު ޕާޓީ އަލުން އެކުލަވައިލުމަށް ކުރާ މަސައްކަތުގެ މުހިންމު އިމްތިހާނަކަށް ވެގެންދާނެ ލޯކަލް ކައުންސިލް އިންތިހާބުގެ ޕްރައިމަރީ މާދަމާ ބޭއްވުމަށް ހަމަޖެހިފައިވާއިރު، ވަކިން ހާއްސަކޮށް، މާލެ ސިޓީގެ މޭޔަރު ކަމަށް އެ ޕާޓީގެ ޓިކެޓުގައި ވާދަކުރާނެ ކެންޑިޑޭޓަކު ހޮވުމަށް ބާއްވާ ޕްރައިމަރީ ވެފައިވަނީ، ދެ ކެންޑިޑޭޓުންގެ މެދުގައި ބަހުގެ ހަމަލާތަކާއި ތުހުމަތުތައް ބަދަލުކުރެވުނު ފޯރިގަދަ ކުރިމަތިލުމަކަށެވެ.

މާލޭގެ މޭޔަރު ކަމަށް އެމްޑީޕީން ވާދަކުރައްވަނީ މިހާރުގެ މޭޔަރު އާދަމް އާޒިމްގެ އިތުރުން، ހެންވޭރު މެދު ދާއިރާގެ ކުރީގެ މެންބަރު އަލީ އާޒިމް އެވެ. މި ދެ ބޭފުޅުންނަކީ ވެސް އެމްޑީޕީގެ ތެރޭގައި އުފެދުނު ދެ ފަޅި ރަމްޒުކޮށްދޭ ދެ ބޭފުޅުންނެވެ. އެގޮތުން އާދަމް އާޒިމަކީ ކުރީގެ ރައީސް އިބްރާހިމް މުހައްމަދު ސޯލިހުގެ ތާއީދު އޮތް ބޭފުޅެއްގެ ގޮތުގައި ފާހަގަކުރެވޭއިރު، އަލީ އާޒިމް ނުކުމެ ހުންނެވީ ކުރީގެ ރައީސް މުހައްމަދު ނަޝީދުގެ ތާއީދާ އެކުގައެވެ.

ކެމްޕޭން ފޯރިގަދަވެގެން ދިޔައިރު، ދެ ފަރާތުން ވެސް ވަނީ އެއް ބޭފުޅަކު އަނެއް ބޭފުޅަކަށް ސިޔާސީ ބޮޑެތި ފާޑުކިޔުންތަކެއް އަމާޒުކޮށްފައެވެ. އަލީ އާޒިމަށް ބޮޑަށް ފާޑުކިޔުން އަމާޒުވީ އެމްޑީޕީ ދޫކޮށް “ދަ ޑިމޮކްރެޓްސް” އުފެއްދުމުގައި އުޅުއްވުމަށްފަހު އަލުން ޕާޓީއާ ގުޅިވަޑައިގަތުމުންނެވެ. އަނެއްކޮޅުން އާދަމް އާޒިމަށް އަމާޒުވި ފާޑުކިޔުންތަކަކީ އޭނާ މީގެ ކުރިން އެހެން ޕާޓީތަކުގައި އުޅުއްވާފައިވުމާއި، މޭޔަރު ކަމުގައި ހުންނަވައިގެން ވަކި ބަޔަކަށް ފައިދާވާ ގޮތަށް އަމަލުކުރެއްވި ކަމަށް ބުނާ ތުހުމަތުތަކެވެ.

ވޯޓަށް 24 ގަޑިއިރަށް ވެފައިވާއިރު، އާދަމް އާޒިމް ވިދާޅުވީ އޭނާގެ ކެމްޕޭން ކުރިއަށް ގެންދިޔައީ ހަގީގަތް ހާމަކޮށްގެން ކަމަށާއި، ބަލިވިޔަސް މޮޅުވިޔަސް އެމްޑީޕީގައި ދެމިހުންނަވާނެ ކަމަށެވެ. އަލީ އާޒިމް ވިދާޅުވީ މާލެއަށް ހަގީގީ ބަދަލެއް ގެނެވޭނީ އޭނާއަށް ކަމަށާއި، ޕާޓީގެ އިދާރީ ބައެއް ކަންކަމާ މެދު ހިތްހަމަނުޖެހުން ހުއްޓަސް، އޭނާއަކީ “ކޮމްޕްރޮމައިޒް” ވާނެ މީހެއް ނޫން ކަމަށެވެ.

މާދަމާގެ ޕްރައިމަރީއާ ގުޅޭގޮތުން އެމްޑީޕީގެ އިންތިހާބީ ކޮމިޓީގެ މުގައްރިރު މުހައްމަދު ފަލާހު ވިދާޅުވީ، އިންތިހާބުގެ ހުރިހާ ތައްޔާރީތަކެއް މިހާރު ނިމިފައިވާ ކަމަށެވެ. މުޅި ރާއްޖޭގައި ޖުމުލަ 65 ވޯޓު ފޮށި ބަހައްޓާއިރު، އޭގެ ތެރެއިން 31 ފޮށި ހުންނާނީ މާލޭގައެވެ.

މާލެ ސިޓީގެ މޭޔަރު ކަމުގެ ޕްރައިމަރީގައި ވޯޓުލުމުގެ ހައްގު 5،475 މެންބަރުންނަށް ލިބިގެންވެއެވެ. އިންތިހާބީ ކޮމިޓީން އެދެނީ ހުރިހާ މެންބަރުން ވެސް ނުކުމެ ސުލްހަވެރިކަމާއެކު ވޯޓުލުމުގެ ހަރަކާތް ކުރިއަށް ގެންދިއުމަށެވެ. މާދަމާގެ މި އިންތިހާބަކީ ކުރިއަށް އޮތް ބޮޑު އިންތިހާބަށް އެމްޑީޕީ ތައްޔާރުވެފައި އޮތް މިންވަރު ވަޒަންކޮށްލެވޭނެ މުހިންމު ދުވަހެކެވެ.