ރައީސް ޔާމީން ބައިވެރިވެ ވަޑައިގަންނަވާ ޕީޕީއެމްގެ ބޮޑުޖަލްސާއެއް އަނެއްކާވެސް ބާއްވަނީ
ރައީސް ޔާމީން ބައިވެރިވެ ވަޑައިގަންނަވާ ޕީޕީއެމްގެ ބޮޑުޖަލްސާއެއް އަނެއްކާވެސް ބާއްވަން ހަމަޖެހިފައިވާ ކަމަށް އެޕާޓީން ބުނެފިއެވެ.
“ކޮތަރުކޮށި” ނަމުގައި ކުރީގެ ރައީސް ޔާމީނާއިއެކު ބާއްވާ ބޮޑު ޖަލްސާއެއް ހުކުރު ދުވަހުގެރޭ ހިޔާ ފްލެޓް ސަރަހައްދުގައި ބޭއްވުމަށް ޕީޕީއެމްއިން ނިންމާފައިވާއިރު މިދިޔަ ހަފްތާގައިވެސް ވަނީ ރައީސް ޔާމީން ބައިވެރި ވަޑައިގެންނެވި ބޮޑު ޖަލްސާއެއް ކާނިވާ ސަރަޙައްދުގައި ބާއްވާފައެވެ.
މިއީ ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމަށް އިއްވި ޖަލު ހުކުމުން މިނިވަންވެވަޑައިގަތުމަށްފަހު ބާއްވަ މިފަދަ ބޮޑު ދެވަނަ ޖަލްސާއެވެ. މިއަދު ބޭއްވި ޕްރެސް ކޮންފަރެންސްގައި ޖަލްސާ އިންތިޒާމު ކުރައްވާ ޕީއެންސީގެ ނައިބް ރައީސް އިބްރާހިމް ޝުޖާ ވިދާޅުވީ މިޖަލްސާ އޮންނާނީ ހިޔާ ފްލެޓްތަކުގެ މެދުގައި އޮންނަ ހުސް ބިމުގައިކަމަށެވެ.
މިޖަލްސާގައި ހުޅުމާލޭގެ އެންމެހައި ރައްޔިތުންނަށާއި، މާލެސަރަހައްދުގެ އެންމެހާ ރައްޔިތުން ބައިވެރިވުމަށް ޝުޖާ ވަނީ ދަންނަވާފައެވެ. މިޖަލްސާގައިވެސް ރާއްޖޭގައި ތިބި އިންޑިއާ ސިފައިން ބޭލުމަށާއި، އިންޑިއާ މިލިޓަރީ ސިފައިން ބޭލުމަށް ސޮއިކުރަމުންދާ ޕެޓިޝަންގައި ސޮއި ކުރުމަށް ހަމަޖެހިފައިވާކަމަށެވެ.
މި ޕްރެސްގައި ވާހަކަ ދައްކަމުން މިހަރަކާތުގެ އިންޒާމު ކޮމެޓީގެ މެމްބަރު މުހައްމަދު އިސްމާއިލް ވިދާޅުވީ މިއީ ރައީސް ޔާމީންވެސް ބައިވެރިވަ ޖަލްސާއަކަށްވުމުން ގިނަ ބަޔަކު ޖަލްސާގައި ބައިވެރިވާނެކަމަށެވެ. އެހެން ކަމުން ޖަލްސާގައި ބައިވެރިވާން ބޭނުންވާ ބޭފުޅުން ކުރީބައިގައި ޖަލްސާއަށް ވަޑައިގެން ދެއްވުމަށް ވަނީ ދަންނަވާފައެވެ. އެންމެފަހުން އިދިކޮޅުން ރައީސް ޔާމީނާއިއެކު ބޭއްވި ބޮޑު ޖަލްސާ ގިނަ އަދަދެއްގެ ބަޔަކު ވަނީ ބައިވެރިވެފައެވެ.
